Толэз келян – шудон уж ӧвӧл (1 люкет)

Вӧйдыр — вашкала калык праздникъёс пӧлысь одӥгез, кудзэ али но паськыт пусйиськом. Та праздник быдэс арня ӵоже кыстӥське но Быдӟым кӧсутён кутскон азьын луэ. Туэ Вӧйдыр арня 24 тулыспалысен 2 южтолэзёзь кыстӥськиз. 

Арлэсь самой ненег но шуныт вакытсэ пумитан — калыклэн аспӧртэмлыко йылолэз луэ ини. Ӵапак шутэтскон нуналъёсы ик тупа солэн самой шулдырез — кырӟанъёс, яркыт дӥськут, калык эктонъёс, хороводъёс, вань калык гурла, сайка тол иземысь. Нимысьтыз тодметъёс но луо та нуналэ: табань пыжон, сульдэр (чучело) лэсьтыса сутон. Вашкала осконъёсъя, озьы толэз келяса, зэмос тулысэз пумитаськом. Зэмзэ но, омырын шӧдӥське ни тулыс, инкуазь каллен сайка кезьытлэсь но пеймытлэсь. Улӥын гожтэм материалэз лыдӟыса, тододы, кызьы но кыӵе мылкыдэн соосты пумитаз калык.

Сырья

— Вӧй праздник дыръя милям нимысьтыз спонсоръёсмы уг луо, ваньмыз черодэн ортче. Туэ табань котӥз Нина Плотникова. Арлы быдэ табань пыже Марина Плотникова. Ӝӧк вылэ сиён-юон котькуд мылкыд карись адями ачиз поттэ. Быдэс гуртэн озьы тӥни праздник ортчытӥськом. Шудонъёсты клублэн но нылпи сад-школалэн коллективез радъя, Галина Сапожникова ортчытэ но шулдыртэ. Вань сырьяос шулдыръясько но шутэтско. Озьы тӥни толэз келяськом ми Сырья гуртын. Номыр аспӧртэмлыкоез ӧвӧл, котькуд гуртын озьы ик, дыр. Инмарлы тау, ӵошен люкаським, шулдыръяським, азьланяз но та йылолмы медаз ышы вал, — ивортӥз Сырья гурт клублэн заведующиез Леонид Сапожников. 

Ципья

Та трос йӧскалыкъем гуртын котькуд календарной праздник аспӧртэмлыко но чебер ортчытӥське. Арлы быдэ мар ке тунсыкоез шеде. Туэ калык люкаськиз черк вӧзысь площадкаын. Татын ӵукнаысен ик шуымон шулдыръяськонъёс мынӥзы ини. Нышыр вадес ини куараос жингресгес чузъяськыны кутскизы, нылпиос но уно люкаськизы. Татын ик кырӟанъёс, эктонъёс, нылпиос но бадӟымъёс понна чырмыт шудонъёс, турын чай но табань — ваньмыз калыкез шулдыртон понна. 
— Ваньзылы тау, кин празднике гажаса но мылкыд карыса лыктӥз. Черклы но отын ужасьёслы тау кариськом ческыт сиён понна, коньдонэн юрттӥсьёсмы но ӧжыт ӧй вал: «Авылым», «Берекет», «Балкыш» («Авокадо») магазинъёс, озьы ик вань Ципья калык, кин ӧз жаля коньдонзэ но кужымзэ праздникез ортчытон понна. Ваньдылы шудбуро улон, тазалык, шуныт семья кусыпъёс, тынӥсь но умой улон сӥзиськом! — ивортӥзы Ципья лулчеберетъя юртлэн кивалтӥсез Елена Демеева но устолыкъя кивалтӥсь Евгения Михайлова.

Туспуктэмъёс: Е.Михайлова, Л.Сапожников