Толлэсь чеберзэ адӟимы (+фото)

Паймоно кадь, милемыз, йырысен пыдозямы лымыен курмем нылпиосты, толалтэ улляса но корка пыртыны уг быгато вал ук. Нош туала нылпиосты толалтэ шутэтсконзы дыръя урамын шудыны, чылкыт омырен шоканы улляса сямен поттоно луэ. Зэм, куд-ог гуртъёсын вань на сыӵе сям – толалтэ гурезьысен салазкиен («ледянка» яке «ватрушка» шуонэн) нискылан, куас сюресъёсты волятон яке конькиен йӧ вылтӥ шертон. Нош ик Сизнер гуртэз пример карыса вераме потэ. Берлозэ бертыкум, эшелэн нылыз (городын улӥсь нылаш, шуыны кулэ) туж шумпоттӥз, али гинэ конькиен нискыласа бертӥмы, тани табере гурезе нискыланы мынӥськом шуыса вераменыз. Со сяна, эше но чылкак паймытӥз. «Ми но мамаен али гинэ куасэн ветлыса пыримы», - шуиз со. Асьсэлэн шур сьӧрын куас сюресъёссы но вань вылэм. Мынам таин уг поты вераме, мукет гуртъёсын ваньмыз урод шуыса, адями уго котькытын одӥг, мукет интыосын но вань, дыр, сыӵе муртъёс. Но котьма ке но, нылпиосты компьютер, телефон бордысь кыскон понна бадӟым тыршон кулэ.

Нискыланы потыны луэ эшъёсын, семьяен но … классэн. Ӵапак озьы потӥмы ми, Покчи Лӧзя шоръёзо школаысь 6-тӥ классын дышетскись нылпиос, классэн кивалтӥсьмы Н. Л. Антонова но анай-атайёс, толалтэ каникулъёс дыръя. Куазез но туж умой, небыт тупаз. Термосэн чай, бутербродъёс басьтыса, вамыштӥмы ми гурезь баме. Мылысь-кыдысь нискыламы, мылкыдъёсмес ӝутимы. Нылпиосмы толаллэсь чеберзэ адӟизы, нош ми пичи дырамы берытскимы.