Тулыс но тӧл 

Тулыс но тӧл 
Толалтэез тулыс воштӥз, 
Но ӧз, ӧз кошкы шаян тӧл, 
Тӧлэз тулыс синмаськытӥз, 
Солы, мискинь, изён ӧвӧл. 

Тулыс азьын котыръяське, 
Тӧдьы дэрем бордаз йӧтске. 
Я со шула муръё гыркын, 
Шуш укылтэм егит сямен. 

Со гӧр возьма писпуосысь, 
Йыбыртъяло солы тэльёс. 
Писпуосты кужмо выртэ, 
Калык азьын возьдаськытэк. 

Но горд-ӵыжыт бамо тулыс 
Уг синйылты шудэмъёссэ, 
Пальпотонъёс пазя шуныт 
Ӵукна шулдыр ӟардон вакыт. 
(Георгий Скрипкин) 

Пегӟон 
Кытчы ке но ӵукна пегӟизы ни гӧпъёс. 
Кытчы ке кыдёке ватскизы кезьытъёс. 
Кышкатскем тол шуныт шубазэ куштыса, 
Капчияк лушкемен олокытчы вольтчиз. 

Уйёсы со выльысь берытске шубалы, 
Пеймытын лулӟылэ, мерталля, учкылэ. 
Но маке зӧк мамык шубаез кезьытлэн 
Вакчия, ӟоскыта нуналысь нуналэ. 
(В. Орлов) 

Йӧӟузыриос 
Милям азбарамы, 
Шыпыт сэрегамы 
Толон ӟузыриос 
Лумбыт бӧрдылӥзы: 

«Милем ӝокыт, чоп-чоп! 
Бырон вуиз, чоп-чоп!» 
Шунам вуэд жингыр 
Пазяськылэ котыр. 

Шунды азбар вадьсы 
Ӟутскиз ни вылэгес, 
Синву липет вылысь 
Бызе ни ошмесэн. 

Мискинь ӟузыриос 
Бӧрдо, бӧрдо тулыс, 
Котькуд синкылиен 
Кылё ук пичигем. 

Лумбыт бӧрдылыса, 
Арнянунал ӵукна 
Со кык йӧӟузыри 
Вулы пӧрмиз, быриз. 

Пукись вуэд ӝытозь 
Копак куасьмиз, пыӵаз — 
Уг юртто ноку но 
Бӧрдэм синкылиос! 
(Леонид Дербенёв) 

Южтолэзь 
Я кезьыт, 
Я чагыр пукись ву, 
Я гӧпъёс, 
Я сайкыт нуналъёс. 
Меӵ гурезь бамалын, 
Ӟужыт кыз вужерын 
Сьӧд лымы виштыос 
Ватӥсько шундылэсь. 
Нош музъем вадьсамы 
Луд ӟазег жильыос, 
Быдэс ву выламы 
Сайкало ни шуръёс. 
Лек толлы бадь бычы 
Возьматэ 
Укылтэм вож кылзэ. 
(Владимир Орлов)

Василий Никитинлэн берыктэм кылбуръёсыз