«Тулыс нуналэ тодэ ваёнъёс»

Та рубрика улсын Быдӟым тылож, Вормон, ожысь но тылысь ветеранъёс сярысь куке но газетамы печатласькем статьяосты поттомы. Арлыдогес лыдӟисьёс понна со тодэ ваён луоз, нош егитгес лыдӟисьёс понна — со шимес вакытэз ас синмынызы адӟем, вань секытсэ ас вылазы шӧдэм адямиосын тодматскон. Туннэ 1984 арын «Азьлане» газетлэн 57-тӥ номераз «Тулыс нуналэ тодэ ваёнъёс» ним улсын потэм статьяез лыдӟыны ӵектӥськом. Сӥземын со Ӟаны гуртысь ожысь ветеранлы Иван Макарович Ермаковлы. Статьяез тупатъянъёс пыртытэк но вакчиятытэк сётӥськом.

«Гуртысь вань кадь механизаторъёслэн сямен ик дуриськисьёслэн но али самой ӟырдыт дырзы. «Дружба» колхозын ини кызь арлэсь кема дурись луыса ужась Иван Макарович Ермаков котькуд тулысэз пумита нимаз ик сюлэмшугъяськыса. Мугез но вань угось. Тулыс ӟырдыт бусы ужъёсын гинэ ӧвӧл, аслаз тодэ ваёнъёсыныз вунонтэм. Котькудӥз — лек ожъёс пыр потэмез но, тылын ӟырдыт уженыз люкет пыртэмез но, жугиськонэз книгаосысь лыдӟыса но киноысь учкыса тодэмез но та нуналъёсы тодаз вае кызьы вуиз та Быдӟым Вормон. Тани Иван Макарович но мур лулскыса веранзэ кутске. 

— Милемлы, 1925 арын вордӥськемъёслы, 1943 арлэн январаз али 18 арес но тырмымтэ вал. Нош та дырозь ини гуртэ ож бусые быремъёслэсь уно похоронкаос вуэмын вал. Ми пинал луимы ке но ӟеч валамы, та жугиськон ми понна но оло берпуметӥ сюрес луоз шуыса. 

Соин ӵош кошкем 9 егит пиослэн но ньылез Родинамылэсь эриксэ утьыса ож бусые кылизы. Соос жугиськонэ пырыку ини Советской Армия тушмонэз берлань улля вал. Озьы дас тямыс арес но тырмымтэ гуртысь пиос Харькове вуизы. Иван Макаровичлэн нырысетӥ кужмо жугиськонэ пыриськемез со ик арын 2-тӥ Украинской фронтлэн 5-тӥ Гвардейской армилэн составаз Киев уллапалась Куцеваловка гурт дорын Днепр шурез выжыку луиз. Тӥни соку со сӧсырмыны шеде. Кык толэзь мында госпитальын кыллемез бере, выльысь шунды пуксён пала вамыштэ. Азьло миномётчик ке вал, собере ини мукет армилэн составаз зенитно-артиллерийской полкын бадӟым калибръем зенитной пулемётлэн пулемётчикез луэ. 1944 арын асьмелэн армимы государственной границаез выжиз.

Кышкасьтэм боецъёс пӧлын мынӥз Средний Кушкетысь удмурт пи Иван Ермаков но. Южный Буг шурез выжыку батырлыкез понна солы сётэмын нырысетӥез боевой награда — «За боевые заслуги» медаль. Собере соос Одесса паласен Румыние пыро. Нырысетӥ Украинской фронтлэн составаз Польшаез мозмытонэ пыриське. 

1945 арлэсь 9 майзэ Иван Макарович Прагаын пумита, отысен ик со кылэ вормон иворез. 1945 арлэн гужемаз уноез боецъёс вордскем музъемазы берытскизы. 

Нош И. Ермаков но со выллем пинал солдатъёс понна служба ӧз быры. 1950 арлэн мартаз гинэ со вуиз вордскем гуртаз. Жугиськон йылпумъяськем бере вить ар мында служить кариз. 1947 аре армиын ик партилэн радъёсаз кутӥськиз.

Мирной улонын но Иван Макарович котьку азьпалан луиз. Демобилизоваться каремен нялтас гуртысь клублэн уженыз кивалтӥз, егитъёс пӧлын валэктон уж нуиз. Собере колхозысь партийной организацилэн секретарез вал. Огдыре выль кылдэм колхозэн но кивалтӥз. Кема аръёс ӵоже сельсоветлэн председателез луыса ужаз. Война бере луэм воштӥськонъёс, выль лэсьтӥськонъёс — ваньмыз солэн син азьтӥз ортчиз. Коммунист луэмысьтыз, котькуд оскем ужын вань кужымзэ сётытэк ужаны правоез ӧй вал солэн. Тани туннэ но али одӥгез механизатор, али мукетыз мар ке но лэсьтыны, тупатыса сётыны куриськонэн вазиське. Дурись но, тракторист сямен ик тулыс бусы ужын главной муртъёслэн одӥгез. 

А. Михайлов."

Туспуктэм: Шор Кушкет шоръёзо школалэн архивез