Удмурт лулчеберет котыраз ваньзэсты люказ

13 пӧсьтолэзе Вукогуртын Гуртлэн нуналэз радъяськиз, маиз тужгес тунсыко — со Семьялэн арезлы сӥземын луиз. Чебертэм сцена, вӧлмыт пуксён интыос, гур, табань, ӝук, чай — та ваньмыз адямилэсь мылкыдзэ бугыртӥз.

Татын ваньзы огкылысь шулдыръяськизы, ӵошатскизы, котькуд адями — нимысьтыз бадӟым куно луиз.

Вукогуртын туж мыло-кыдо адямиос уло, соос котькуд ужрадэз радъяны дась. Тросэзлы асьсэос кутскон сёто, калыкез вырто. Узыр концертной программа пӧртэм эктонъёсын, кырӟанъёсын, кылбуръёсын тырмиз. Удмурт лулчеберетэз данъян но юнматон уже вукогуртъёс эшшо одӥг вамыш лэсьтӥзы. Но сыӵе вамышез одӥг адями гинэ лэсьтыны уг вормы, татын азьветлӥсьёс но бадӟым юрттӥсь команда кулэ. Сыӵе азьветлӥсьёс пӧлын Ципья шоръёзо школаын дышетӥсь Марина Залкеева но. Со ужрадэз радъян но ортчытон сярысь вераз:

— Шулдыръяськонмес яркытгес, сюлэме пыӵамонгес карон понна, «Сяська фестиваль» конкурс ортчытыны малпамы. Вожвылъяськонэ пырон понна сяськаослэсь кыӵе ке композиция лэсьтыны кулэ вал. Сяськаос луыны быгато вал кагазлэсь, фоамиранлэсь, лентаослэсь но мукет пӧртэм материалъёслэсь. Вераны кулэ, котькудӥз конкурсэ пыриськись вань сюлэмзэ, быгатонзэ пыртыны тыршем аслаз киужаз. Пӧртэм сямен чебермам зонтикъёс, дарали лентаослэсь лэсьтэм шундыберганъёс, обручлэсь лэсьтэм но пӧртэм сяськаосын чебермам фоторамка, ромашкаосын фотозона — ваньзэ тае адӟыны луэ вал праздникамы. Тау кылъёс вераны кулэ вань пыриськисьёслы, кудъёсыз дасяськизы но ужъёссэ калык азьын возьматӥзы: Алиса Филиппова, Анжелика Кузнецова, Ольга Петрова, Ольга Степанова, Маша Григорьева, Кристина Григорьева, Валерия но Виктория Вагаповъёс. Ваньзы соос пӧртэм номинациын нимысьтыз дипломен но кузьымен пусйиськизы. «Сяська фестивальлэн» яркыт буёлъёсыз праздникамы зэмос гужем шӧм пыртӥзы. Бадӟым тау шуыны кулэ ваньзылы, кин та ужрадэ кужымзэ но дырзэ сётӥз: Сергей Перемечев мыло-кыдо юрттӥськиз, Михаил Щербаков но Юрий Степанов интыез радъязы, беседка лэсьтӥзы, Михаил Щербаков но Сергей Григорьев беседкаын брусчатка вӧлдӥзы, Юрий Лобанов выль гур поттӥз, татын эшшо но ческытгес табань пыжизы, Галина Лобанова но Алевтина Степанова ӝук, чай пӧзьтӥзы, табань пыжизы, Валерий Тимофеев но Юрий Сидоров тыл кыскизы. Озьы ик гурт клубен кивалтӥсь — Антонина Перемечева — но аслэсьтыз кужымзэ пыртӥз та ужрадэ. 

Со сяна калыкез туж синмаськытӥз семьяосты данъян ужрад. Сцена вылэ ӧтизы юбилей датаоссэс пусйись кузпалъёсты. Татын нырысетӥ бадӟым лыдпусысен (5 ар) кутскыса, изумруд сюанзэс (55 ар) пумитась паръёс дорозь синпельлы кузьымен пусйиськизы.
Официальной люкет бӧрсьы эктонъёс радъяськизы ини. Пӧртэм кылын кырӟанъёс мӧйыосты егит дауразы берыктӥзы, нош егитъёсты азьло лулчеберетэн тодматӥзы. Но та ӝытэ вань лыктэм адямиос одӥг тулкымын «уязы», сюлмаськытӥсь юанъёсты эскеризы, эшъёсынызы адӟиськизы, выль адямиосын тодматскизы. Дыраз мызганэн эктонъёс но радъяськизы, зэмос удмурт шулдыръяськон котыраз трос гинэ калыклэсь мугорзэс пӧсятӥз. Татын ӧй вал мултэс адями, бер ӝыт но калык пазяськыны ӧз дырты.

Асьсэлэсь дырзэс жалятэк, чебер концертной программа дасямзы понна бадӟым тау шуыны кулэ Марина Залкеевалы, Елена Никитиналы, Римма Кузнецовалы, Алина Фёдоровалы, Юлия Щербаковалы, Анна Григорьевалы, Лариса Сидоровалы, Антон Никитинлы, Карина Яковлевалы, София Яковлевалы, Ольга Кузнецовалы, Надежда Черновалы. Озьы ик пичи артистъёс но туж яркыт выступлениосынызы паймытӥзы: Камилла но Кирилл Пармановъёс, Алексей но Андрей Фёдоровъёс, Эльза Филиппова, Людмила Щербакова, Мария Григорьева, Кристина Григорьева, Станислав Степанов, Лаврентий Никитин. Праздникез усто нуиз Анжелика Кузнецова. Озьы ик аслэсьтыз бадӟым люкетсэ пыртӥз гуртлэн старостаез — Юрий Афанасьевич Степанов. 

Таӵе ужрад зэмзэ но туж бадӟым адями кужымез но мылкыдэз куре. Куке калык огазе шулдыръяське, гуртэз понна тырше, соку бертӥсьёс, куноос но тросгес луо, гуртысь улон но шулдырен ортче. Котькуд гуртын сыӵе ик азьветлӥсьёс луизы ке, гуртъёсмы эшшо но сяськаялозы, егитъёс гуртазы кылёзы но семья кылдытыса, гуртлэсь чеберлыксэ но узырлыксэ утёзы. Гуртын улон уг сылы интыяз, со ялан кытчы ке дыртэ, бызе. Тае Вукогуртын умой валало, соин но, дыр, ужрадэз радъяны но спонсоръёс интыысь калык ик луиз, котькуд адями кужымезъя юрттӥз.

Огъя вераса, ёросамы котькуд калык праздник — со нимысьтыз дунъянтэм мерас. Котькуд лулчеберет аслаз аспӧртэмлыко луэменыз висъяськыса, чеберман тӥрлыкъёсыныз синмаськытэ но азьпал улонлы сюрес усьтэ. Йӧскалыккуспо ужрадъёс луысалзы ке, эшшо но умойгес луысал. Но туннэ нуналлы котькуд гуртын нимысьтыз шӧмо ужрад кылдытӥськиз ке, гуртлэн азьлань улонэз вань на шуыны луоз!

P.S. Озьы ик 13 пӧсь-толэзе Мамадыш ёросысь Зюри гуртын крашин бигеръёслэн Элькун Питрау праздниксы ортчиз. Асьме ёросысь паськыт вӧлмись ужрадэ Субаш гуртысь «Туганай» калык ансамбль но пыриськиз.

Вукогуртъёслэн «Сяська фестиваль» конкурсазы вормисьёс:

Самой яркыт фотозона — Кристина Григорьева;
Самой аспӧртэмлыко фоторамка — Мария Григорьева;
Самой аспӧртэмлыко зонт — Алиса Филиппова;
Самой чебер ваза — Ольга Степанова;
Самой кужмо дэмдор (оберег) — Ольга Петрова;
Самой аспӧртэмлыко кузьым — Анжелика Кузнецова;
Самой тунсыко плакат — Валерия но Виктория Вагаповъёс.