Улисьялъёс ужаны но шутэтскыны устоесь

Улисьял! Со асьме ёросын одӥг гинэ пор гурт. Гурт нимлэн потэмез сярысь пӧртэм верало. Кылсярысь, со, пе, кылдэмын кӧня ке кыллэсь: У — выль, лусь — лыс, ял — гурт. Озьыен, Выль лысо гурт.

Та палась удмуртъёс Улисьялэз Чарагурт шуозы вал. Чара порен но, удмуртэн но гольык, гольыш шуэм луэ, гольык инты. Азьло пичиосты тышкасько вал: «Чара (гольыш) пыд эн ветлы, кезьыт йӧтоз!»

Улисьял сярысь кыл поттэме юнме ӧвӧл. Кӧня ке нунал талэсь азьло Улисьялэ Гурт Нуналазы мыныны шуд усиз. Соос таӵе праздникез арлы быдэ ортчытъяло вылэм. Со сярысь веразы котырысь удмурт гуртъёсысь лыктэм тодмоосы. «Ми арлы быдэ ветлӥськом», — шуо. Праздник ортчытон интызы писпуосын котыртэмын, майданэ пырон флагъёсын чебермамын, со но мылкыдэз ӝутэ. Нош сценазы кыӵе бадӟым! Одӥг удмурт гуртын но сыӵеез ӧвӧл, Ципьялан гинэ но ӧвӧл. Ципьяла Гырон Быдтонэ лыктэм нимо-дано Удмурт кун академической «Италмас» ансамбльысь артистъёс зор улын кырӟано-эктоно луизы. Та нуналэ зоронэз азьло ик тодӥмы ук, маке кароно вал. 

Улисьялын сценазы липето, паськыт но кузь, вӧлдэтаз югдытонъёс, сцена азьын дискотека ортчытыны бадӟым буш инты. Котырак пуксьыны ӟусъёс пуктылэмын. Со сьӧрын ог дасо метрын магазинъёс, аттракционъёс, пыжиськон-пӧзьтон интыос. 

Ми лыктыку, калык лачак люкаськемын ни вал. Удмуртъёс кадь ик ческыт ӝук, чай дасяллям. Нош сценаез Улисьял клубысь артистъёс шулдыртӥзы: трос кузя но, кык кузя но тапырлато экто, пыдъёсыз эктыны кыскало, эктонъёс сьӧры мылкыд кузьмась кырӟанъёс! Улисьял клубысь усточиос пӧртэм фестивальёсы конкурсъёсы пыриськыса, вормись луыса бертыло. Азьвыл клубен кивалтӥсьсы — котькыӵе ужъёсты яратӥсь, усто, вуттыса ужась Виктор Фёдоров. Табере солэсь ужзэ азинтэ кузпалыз Лада Фёдорова. 

Гуртоосын дасям концерт бере, Йошкар-Олаысь лыктэм артистъёс Сергей Пакеев, Ирина Яркаева но Павел Филиппов (Йорга Каче) бадӟым шулдыр кӧттырымон концерт возьматӥзы. Йорга Каче ачиз Карлыганысь вылэм. Со ветлэмын отысь Мария Главатскихен кивалтоно «Ӟардон» ансамбле. Йорга Каче — удмурт сямен Шаян пияш шуыса берыктӥське вылэм. Та артистъёс кырӟам улсын, люкаськем калык дугдытэк пырля-пырля (ӵошен-ӵошен) эктӥзы. Куное лыктэм удмуртъёсыд но пор крезьгурен ӧз чидалэ эктытэк! Мыным туж но туж кельшиз!

Улисьял гуртын ужась калыклэн шулдыр шутэтсконэз понна Кугунур гурт интывыллэн но «Активист» ООО-лэн кивалтӥсьёссылэн, Егоров Руслан Олеговичлэн но Закиев Рафиль Наилевичлэн, бадӟым саклык висъямзы, юрттэтсы шӧдӥське. Котькытын озьы мед луоз вылэм! Нош вуоно арын Улисьял гуртын Республиканской Семык праздник ортчытӥськоз шуыса ивор кылӥськиз на. Кыӵе шумпотон, ӟеч мед ортчоз вынлыко калыклэн праздникез!

Василий Никитин, 
Карек-Серма гурт

Туспуктэмъёс: Лада Фёдорова