Улонысь эшшо одӥг бадӟым лыдпус

Адямилэн улонэз — валантэм дунне. Со тырмемын пӧртэм учыръёсын, мылкыдъёсын но малпанъёсын. Макем бадӟым адямилэн арлыдэз, сокем трос солэн тодон-валанъёсыз, сокем бадӟым улон опытэз. Арлыдоос ас вылазы вань секыт дыръёсты шӧдӥзы, соин соос али улонысь шуг-секытъёс ласянь чидасесь но зӥбытэсь. 

Малпасько, удмуртъёс гинэ ӧвӧл, тросэз ёросысь адямиос Сырья гуртысь Толя агаез умой тодо, малы ке шуоно со тодмо калык эмчи луэ. Солэн эмъясь зарни киосыз сярысь туж усто гожтӥз ни вал газетлэн бамъёсаз Сырья гуртысь азьветлӥсь Леонид Сапожников. Туннэ дано воргоронэз пичияк мукет паласен возьматомы. Эшшо ке мугез но туж шумпотымон: 12 тулыспалэ Анатолий Максимович аслэсьтыз 85 аресъем юбилейзэ пусйиз. 

1939-тӥ арын Сырья гуртысь Черновъёслэн семьяязы вуиз куинетӥез бадӟым шумпотон — вордӥськиз муспотон пизы — Анатолий. Атаез — Максим Степанович — финн оже но Быдӟым Атыкай оже пыриськем воргорон. Польшаез мозмытон понна нюръяськонын бырыны шедиз, Рюкфорт городын ватэмын. Анаез — Пелагея Павловна, Бадӟым Лӧзялэн 2 люкетаз вордӥськиз. 

Черновъёслэн семьяязы будо ни вал Зоя нылзы но Пётр пизы. Жаляса верано, Зоя апайзы 3 ар гинэ югыт дуннеез адӟыса вуиз, висьыса кулӥз. 1953 арын анайзы, Быдӟым ожен сэрен кузпалэзлэн юрттэтэзтэк кыльыса, 2 пиосыныз выль юртэ улыны выжиз. Озьы Черновъёслэн улоназы нош ик выль шокан пыриз, юртъер котыр кылдэм ужъёс каллен ӝож тодэ ваёнъёсты палэнэ кельтӥзы.

Гуртысьтызы мукет нылпиос кадь ик, пияш Ципья шоръёзо школаын дышетскиз. 7 классэз йылпумъяса, анаез висемен, ужаны кутсконо луиз. Валэн Шеморданэ ветлӥз, пӧртэм вузъёсты Ципья гуртысь сельпое вайылӥз. 
1960 арын сое армилэн радъёсаз басьто. Котькуд егит пилэн дано ужпумез — шаермес но семьязэ тушмонъёслэсь утьыны быгатон. Соин со дырысь пиос понна армия со бадӟым улонэ дасясь сюрес кадь луэмын. Солэн службаез Азербайджанын ортче. Татын со ожгаружысь валтӥсь тодон-валанъёсты басьтэ. Армиысь ӟечен бертыса, колхозлэн кивалтӥсез сое дышетскыны лэзе. 1964 арын машинаен ветлыны право басьтэ. 

— Котькуд пиосмурт служить карем аръёссэ тодэ, дыр. Татын эшъяськон но ог-огедлы юрттон туж бадӟым инты басьто. Нимаз вылтӥяськыса улӥд ке, тонэ зэмос ожын но кулэ уз каре, секыт учыръёсы но уз юрттэ. Ог-огедлы юрттон — адямилэн валтӥсь сямез. Соин егит пилы армие одно ик ветлоно. Служить кари Турья пиосын — Петяен но Мишаен. Шуныт палъёсын трос емышъёс будо бере, туж ӵем арбуз сиылӥм, сокем тырмиз, туннэ нуналэ адӟем но уг поты ни, — армиын ортчытэм нуналъёсыз сярысь вера воргорон.

Гуртысь пиосмурт котькуд ужзэ валаса но рос-прос лэсьтэ, малы ке шуоно ас киыныз лэсьтэм ужез кемалы мед луоз кадь потэ, дырез трос ӧвӧл, соин но котькуд ужез пайдаё но ӟечлыко лэсьтоно. Анатолий Максимович но сыӵе ик: машинаен но, тракторен но ужакуз, оскем ужзэ мылысь-кыдысь, тыршыса быдэстӥз. 

Секыт дыръёс луизы ке но, егит пияшез яратон ӧз палэнты. Аслэсьтыз шудбурзэ но, улонысь сюлмаськонъёсын, шуг-секытъёсын ӝожомытэм дыръёссэ но люкылӥз кузпалэныз — Анна Петровнаен — чырткем но ӟеч сюлэмо нылкышноен. 1964 арын ӵыжы-выжыосыз но матысьёсыз пӧлын гинэ шулдыр сюан шудӥзы. Яратонзы зэмзэ но туж югыт но шуныт мылкыдъёсын тырмытскиз, улонзэс шулдыртӥзы нылпиоссы: Маргарита, Михаил но Николай. Асьсэ кужыменызы корка пуктӥзы, колхозын ужазы, нылпиоссылы вань ӟечсэ но умойзэ гинэ сётыны тыршизы. Яратӥсь анай но атай ноку но нылпиоссэс ӧз люке, ваньзылы огкадь дышетскыны луонлык кылдытӥзы. Жаляса верано, туннэ нуналлы Толя агайлэн кузпалэз кулэмын ни, но пиосмурт улонлы уг ӝожтӥськы, со кужым шедьтӥз аслэсьтыз яратонзэ но сюлэм шунытсэ шонер интые лэзьыны — нылпиосызлы но нунокъёсызлы. Соос но солы сыӵе ик мылкыдъёссэс кузьмало.

— Анаен атай, ог-огзэс валаса но ог-огзылы юрттыса, 50 ар ӵошен улӥзы. Паймымон кусыпъёссы котьку синмаськыто вал, ас примерзы вылын милемлы улонын кулэ луись семья кусыпъёсты возьматӥзы. Инмарлы тау шуисько сыӵе семьямылы. Кылем аръёссэ анаймы туж висьыса улӥз, атай сое утялтӥз, сюдӥз, вордӥз, вань секытъёсты вылаз басьтӥз. Милемлы ӵем бертыны дыр уг йӧты вал, соин анаез утён атай вылэ усиз. Ачим но трос пол тӥяськыны шеди: киме но, сюрлыез но. Ваньзэ атай бурмытӥз. Данъяськиськом атаенымы. Туж удалтӥз милемлы соин. Инмарлы тау, вань мылкыдъёсмес вераны адями вань, вордэмезлы, тодон-валан сётэмезлы бадӟым тау шуиськом, — шараяз мылкыдъёссэ Маргарита нылэз.

Туннэ нуналэ Анатолий Максимовичлэн улоназ ваньмыз тынӥсь. Маргарита нылэз улэ бускель Вукогуртын, Николай пиез бордаз, Сырья гуртын ик. Михаил пиез гинэ, жаляса верано, улонысь кошкемын ни. Нылпиосыз улоназы асьсэлэсь сюрессэс шедьтӥзы, гажамон но данъяськымон адямиос луизы.

— Атай котькуд адямилэн улоназ бадӟым инты басьтэ. Кулэ дыръя со юн пыкет но луэ, интыяз чурыт, курон пуктӥсь луыны но быгатэ, секыт дыръёсы буйгатыны но небыт кылъёс шедьтыны пӧрмытэ. Атаймылы таӵе узыр семья пӧлын но тыр ӝӧкен юбилейзэ трос пол пусйыны мед кылдоз на. Солы юн тазалык но сайкыт нуналъёс сӥземмы потэ. Улонысьтыз шуг-секытъёс шундыё нуналъёсын но шулдыресь иворъёсын гинэ мед воштӥськозы. Милемлы юн пыкет но визь-кенеш сётӥсь луыса кема мед улоз на, — шуныт кылъёссэс веразы нылпиосыз.

Анатолий Максимович яратӥсь атай, валась атайзы но сюлмаськись песятай. Солэсь дано выжызэ азьланьто внукъёсыз — Артём, Вероника но Александр. Соос ас семьяоссэс кылдытӥзы ини, каньыл мылкыдын песятайзы доры куное вуыло. Озьы ик Анатолий Максимовичлэн выжыяз будо ни 2 правнукъёсыз — Игорь но Матвей. Бурятиын улэ на Мария сводной сузэрез (анайзыя), солэн вань 2 нылъёсыз но 4 внукъёсыз. Улэ со бадӟым нылэзлэн семьяяз. Вордскем палъёсаз ӵем бертыны уг йӧтылы ке но, вань иворъёсты дыраз тодыны тырше. Дор музъемез бордаз золгес кыскыны кутске, соин мӧзмон мылкыдъёсты агаеныз телефон пыр буйгатыны тырше. 

Анатолий Максимович улэ Николай пиеныз но Ирина кенэныз. Соос понна со воштонтэм адями луэ. Семьялэн узырлыкез — мӧйыослэн тазалыксы но пиналъёслэн вордӥськемзы бордын. Пересьёсмылэсь вань улон опытсэс лыдэ басьтыса семья кылдытон, сое юнматон вашкала дырысен асьмелы сяме пыӵамын. 

— Семьяын арлыдоос луизы ке, корка но тыр кадь потэ. Песятай котькуд адямилэн улоназ уг луы, соин асьмеды узырен лыдъяськом, туннэ нуналлы со милям юрттӥсьмы но матысь эшмы, правнукъёсызлы но туж шумпотэ. Пиналъёслэн жингрес куараосыныз ачиз но пинал дыраз берытске кадь. Сӥзиськом солы азьланяз но арлыдэз шоры учкытэк азьлань мыныны, улонысь чеберзэ адӟыса, пиналъёсызлэсь шумпотонъёссэс валче люкыны, котькуд нуналэз шундыё, пиштӥсь медло. Нош ми солы оскымон пыкет луыны, котькуд секыт учыръёсы юрттыны тыршом, — шуо Толя агайлэн внукъёсыз.

Анатолий Максимовичлэн азьпал улонэз но югыт, сайкыт нуналъёсын, матысьёсызлэн сюлэм шунытэнызы мед тырмоз, юн тазалык но быронтэм кужым умоезлы осконзэ мед юнматозы, сяськаяськись нуналъёс но яркыт пиштӥсь шунды улонзэ мед шулдыртозы. Вордэм пиналъёсыз, муспотон нунокъёсыз ас улон радъяменызы нуналысь нуналэ шумпоттӥсь иворъёс гинэ мед ваёзы.