Ушма палъёсысь «сюро» улӥсьёс дорын

Туэ понна куарусён толэзь аслэсьтыз узыр но чебер буёлъёссэ шуныт куазен валче кузьмаз. Ёросысь котькуд возёслэн одӥгез валтӥсь ужез йылпумъямын ини: будэтэм урожаез ӟечен басьтыны кылдӥз, музъем дасян ужъёс но дыраз быдэстӥсько. Озьы ке но гурт возёсъёслэн сюлмаськонъёссы бусы ужъёсын гинэ ӧвӧл, пудо вордонэн но герӟаськемын.

«Сурнай» возёслэсь пудо вордон ужъёссэс эскеронмес Вылын Ушма гуртын интыяськем куайытон ферма бордысен кутским. Территориез туж чылкыт, кунянъёслэн но интызы эркын, куро валемын. Сюдӥсьёсыз но ужзэс валаса быдэсто.

Кема аръёс ӵоже ужась механизатор Юрий Назаров ӵапак татчы ошъёсты ваем вал. Стажез 40 ар луэмын, сюлэмзэ гурт ужлы сӥзьыса, али но ужан мылкыдыз бырымтэ на. Со комбайнёр но, механизатор но. Нокыӵе ужлэсь уг палэнтӥськы. 

Собере Улын Ушма гуртысь фермае сюрес кутӥм. Бадӟымесь выль гидъёс соку ик син шоры йӧтӥзы. Ми лыктыку, валтӥсь зоотехник Азат Габдулхаков нуналмысь быдэстоно планъёсыз сярысь ужасьёсыныз вераське вал. Ӧнерчилэн ужез зэмзэ ик серьёзной, кулэ луись. «Гуртын ферма ке вань, гурт но улэ» шуэмез котькин тодэ кадь ини. Гуртлэн азьланез одно ик гуртын улӥсь тыршись калык вылын возиське. Тросэз возёсъёсын ужъёс автоматизация пыр ортчемын ке но, адями киос ноку мултэс уг луо угось. 

Валтӥсь зоотехникен вераськонмы выль пуктэм юртъёс бордысен кутскиз. 
— Туж кулэ вал милемлы та гидъёс, — шуэ Азат Габдулхаков. — Зэм, лэсьтӥськон понна миллионъёс кулэ луизы, но солэн бервылыз экономика ласянь азинсконын юн шӧдӥськиз: кунян вордскон йылӥз, кулон учыръёс кулэсмизы, тырмымтэосты быдтон бордын ужаса, йӧл, сӥль поттон показательёс но ӵошатымон умойгес луизы.

Кунян гид но кунян ваён корпус 2020 арын пуктэмын, огъя дунъяса, соослы 40 миллион пала коньдон кутэмын. Котыраз чылкыт, скалъёслы сиён но тырмыт, ветлон интыоссы эркын. Кунян ваён корпус туннэ нуналэ 70-80 скалъёсын тырмемын (лыдзы вошъяське, соин шонер лыдпус пуктыны уг луы). Татчы скалъёсты кунян вайытозязы интыяло, кунян ваем беразы, кунянъёсты артын интыяськем гидэ выжто. Та гидын котькуд кунянлэн аслаз нимысьтыз интыез вань. Гожтосъёсысь адӟыны луэ кунянлэсь нимзэ но вордӥськем нуналзэ. Али гинэ вордӥськемъёсты нимаз возё, пыд йылазы йӧн-йӧн сылыны кутскем беразы соосты огазеяло но нимысьтыз блоке интыяло. 

Скалъёсын но кунянъёсын татын ужало Бадӟым Лӧзя 1 люкет гуртысь Елена Петрова (30 ар пала ужзэ яратыса быдэстэ ни), Покчи Лӧзя гуртысь Наталья Ахметзянова (10 ар ужа), Шор Ушма гуртысь Олеся Фёдорова но Улын Ушма гуртысь Людмила Романова. Озьы ик тырше на пудо-живот эмъясь Алексей Васильев. Ачиз егит ке но, ужан стажез 10 ар пала луэмын ини солэн.

— Бадӟым опытэн ужасьёс татын. Асьсэлэсь ужзэс умой тодо, ваньзэ вератэк быдэсто. Ужлэсь аспӧртэмлыкъёссэ валэктоно ӧвӧл. Дыраз быдэсто, куспазы уг керето, ужзэс чаклано ӧвӧл. Ужасьёс тырмо, но кошкисьёсыз но вань. Улон ук со, ваньмыз луэ. Соин ик кема ужасьёсты гажаса, югдурзэс валаса ужаны тыршиськом, — шуэ валтӥсь зоотехник.

Гидлэн «пичи улӥсьёсыз» соку ик котькуд лыктӥсьлэсь сюлэмзэ басьто. Гурт ужъёсы пыриськисьтэм мурт но гидысь «пичи улӥсьёслы» синмаськоз. Кышкась, мусо, нюлӥськись кунянъёс соку ик адями борды кыстӥсько. Улон интызы чылкыт, пыд улазы небыт куро валемын. Туннэ нуналлы татын 60 кунянъёс будо, кык толэзь тырмыса, соос мукет гидэ выжозы.

Ужасьёслэн пудооссэс нуныосты кадь утемзы уж вылын адӟиське. «Пичи нунокъёссы» соос шоры мусо синъёсын учко. Кызьы уд яраты соосты! 

Ми лыктон нуналэ (27-тӥ куарусёнэ) татын лэсьтӥськон ужъёс мыно вал: «Сурнай» возёсысь Ильнур Зиганшин ужасьёсыныз 120 пала кунянъёслы тусьёс вошъязы. Огъя ваньзэ чакласа, эскерыса, нуналысь нуналэ умойгес, азинлыко карыны тыршо.

Бусы ужъёсты но чаклано. Котькуд возёсын кадь ик татын пудо вордон понна силос, турын но сенаж дасямын. Озьы ик монокорм, кыӵ, кукуруза сётӥське.
— Пудо сиён паласен сюлмаськонъёсмы ӧвӧл, туннэ нуналлы кылем арлэн запасъёсыз но тырмыт, туэ но трос дасяны луонлык кылдӥз. Ваньмыз шонер, ас черодэзъя мынӥз ке, шуг-секытъёс уз кылдэ, малпасько. Туннэ нуналлы 10741 тонна сенаж дасямын, 6667 тонна силос тыремын, — юн оскемзэ вера Азат Анасович.

Гурт ужъёсты быдэсъяны капчи шуид ке, одно ик янгыш луод. Учкыса гинэ ваньмыз капчи адӟиське, мургес выйид ке, ужлэн шуг-секытъёсыз шӧдӥсько. Ужлэн аспӧртэмлыкъёсыз тазалыклы но нагрузка сётэ. Котькуд удысын тодыса, тыршыса ужаны кулэ, эшшо ке пудо вордонын, та удыс кык поллы сак луэмез кулэ каре: пудо адямилэсь мылкыдзэ соку ик вала. Огъя вераса, «Сурнай» возёсысь чылкыт, сайкыт интыын но эшлыко коллективын ужасьёс ушъяськыны быгато ужам бервылъёсынызы. Котькуд адями ас ужзэ ӟеч тодӥсь, воштонтэм адями луэ. Озьы ик луыны кулэ: гурт калык ог-огез борды юн кырмиськыса, ужан ӧнерзылэн азьпалэз сярысь сюлмаськыса, ӵош ужасьёссэ гажаса, данъяса улыны кулэ. 

Азьланяз но Ушма-Лӧзя палъёсысь ужасьёслы сӥзиськом юн тазалык, котькуд ужады мылкыдды бурдъяськыса мед улоз. Ужан сюресты шуг-секытъёстэк, капчи мед азинтӥськоз! Кивалтӥсьёсыныды кусыпъёсты но нуналысь нуналэ оскымон, юн мед луозы!