Ужано — улон понна, улоно — семья понна

Семёновъёслэсь семьязэс Кӧргемын гинэ ӧвӧл, матысь гуртъёсын но, ёросын но умой тодо — соос эшлыко улӥсь, ужась, тыршись семьяос пӧлысь тужгес ушъямонъёсыз, тужгес адӟем карымонъёсыз луо. Семьяын ньыль выжы улэ — тямыс адями. Со шоры учкытэк, соос куспазы тупаса, гуртооссы понна пример возьматыса улыны быгато.

Семьялэн узырлыкез — Антонина Алексеевна     Семёнова

Бадӟым семьяын самой мӧйыез, но улонысь троссэ адӟем-тодэмез Антонина Алексеевна луэ. Со 1930-тӥ арын Кӧргем гуртын ик вордскем.

Антонина Алексеевналы пичи дырысеныз трос ужаны, шуг-секытъёсты адӟыса будыны кылдэм. Атаез оже кошкем но отысь берытскымтэ ни. Жугиськон йылпумъяськыку, Антонина быдэ вуэм ныл луэ ини. Чебер, тыршись нылэз Кӧргем гуртысь ик тракторист луыса ужась Владимир нимо егит пи синйылтэ. Оло, Тоня апай гырись луыса ужакуз яратонзы кылдэм (нялтас вераса, Антонина Алексеевна кунян утись луыса но ужам, бадӟым ошъёсты но утем) — таиз тодмо ӧвӧл. Но кызьы луиз ке но, егитъёс юн семья кылдытыса улыны кутско. Кыкназы ик гумырзы ӵоже колхозын тыршизы, гуртооссы пӧлын гажанэ вутскизы. Семёновъёслэн огез сьӧры мукетыз Павел но Валерий пиоссы вордско. Павел Владимирович туннэ нуналэ аслаз семьяеныз Ижевскын улэ, нош Валерий Владимирович — атай юртаз.

Антонина но Владимир Семёновъёс яратӥсь анай-атай, песяй-бабайёс луо. Тани ма вера соос сярысь кензы Евгения Семёнова:

— Кузпалэным кыкнамы но ужамы, нош гуртын нылпи сад ӧй вал. Соин нылпиосмы песяй-бабаен улӥзы, соос нылпиосмес утизы, будэтӥзы ини. Со понна пумтэм тау соослы.

Жаляса вераны кулэ, Владимир Семёнов 1994-тӥ арын кулэм ини. Нош Антонина Алексеевна пересьмон даурзэ Валерий пиезлэн семьяеныз ӵош пумита.

Валерий но Евгения Семёновъёс — «Активист» обществолэн данъяськонзы

Валерий Владимировичлы уж ласянь быгатонлыкъёсыз атаезлэсь выжтӥсько. Школазэ йылпумъямез дырысен, шонергес вераса 1979-тӥ арысен, со «Активист» колхозэ ужаны интыяське.

— Атае гумыраз тракторен ужам бере, мон та ужез умой тодӥсько вал ини, соин тракторист луыса ужаны кутски. Кема ветлӥ мон руль сьӧрын, 2009-тӥ арозь. Собере мукет ужын асме ути, но колхозысь нокытчы ӧй кошкы, — шуэ Валерий Владимирович.

Фермаен но кивалтэм со, 2017-тӥ арысен возьмась (охранник) луыса ужа вылэм. Огъя вераса, фермаын луэм тросаз ужъёсын со ассэ эскерем ини. Солэн кышноез Евгения сярысь но ӵапак озьы ик вераны луэ.

Евгения Валерьяновна ачиз Ярак-Чурма гуртысь кышномурт. Кӧргеме со эшеныз ӵош вуэ, соку ик вуоно кузпалэныз тодматске. Питере кошкыны малпам Евгениялэн огдыре вань планъёсыз воштӥсько: егитъёс ог-огзылы синмасько но кӧня ке дыр ортчыса, 1985-тӥ арын, семья кылдыто. Ужаны Евгения Семёнова интыяське гуртысьтызы парсь фермае. Со но, кема аръёс ӵоже фермаын ужаса, валче ужано эшъёсыз, кивалтэтэз пӧлын гажанэ вутске, кӧня ке дыр ӵоже, кузпалэз кадь ик, фермаен но кивалтэ.

— Улонмы ӵоже пудоен улӥськомы ини, — вера кышномурт. — Ужын но пудо утимы, дорамы но пудо вордӥмы. Али но вордӥськомы. Яра али юрттӥсьёсмы вань.

Юрттӥсьёсы шуыса, кышномурт Александр пиез но Анастасия кенэз сярысь вера.

Александр но Анастасия — семья выжыез азьланьтӥсьёс

Валерий но Евгения Семёновъёслэн бадӟым нылзы Людмила аслаз семьяеныз Ципья гуртын улэ. Нош Александр пизы но Анастасия кензы вӧзазы, соос семьялэн осконэз, вуоноез но самой матысь юрттӥсьёссы.

Егит кузпалъёс но «Активист» обществоын ужало. Александр — зоотехник, нош Анастасия — механизацияя бухгалтер. Кыкназылэн но ужзы секыт, кылкутымон.

Александр но Анастасия 2013-тӥ арын семья кылдыто. Куинь нылпизы вань ини — Ульяна, Ангелина, Алёша.

— Ципья шоръёзо школаез йылпумъяме бере, Савалиын дышетски. Собере кошки Казане, но мынам сюлмы отын улыны ӧз чида — одӥг арскын вордскем гуртам бертӥ. Ужаны интыяськи «Активист» колхозэ, со вал 2011 арын. Кутски шофёрысен, али ньылетӥ арзэ зоотехник луыса ужасько, — маде Александр. — Ватытэк верасько, уж капчи ӧвӧл, вазь ӵукнаысен бер ӝытозь ужано, адямиосын кусып возьыны быгатоно. 2 гуртъёсысь фермаосын ужасько — Дургаын но Улисьялын. Та кык скал фермаосын огъя 1600 йыр пудо лыдъяське.

Кылкутымон ужез «Активист» обществолэн кивалтӥсез Рафиль Закиев Александр Семёновлы кышкатэк оскем, со сярысь огпол но жалямтэ. Рафиль Наилевичлэн верамезъя, «Активистын» егитъёс ӧжыт ӧвӧл, та кивалтӥсез туж шумпоттэ. Соос понна кивалтӥсь умой условиос кылдытыны тырше, Александр Семёнов но, кылсярысь, ёросысь кык мукет ӧнерчиосын ӵош 2019-тӥ арын Краснодар городэ дышетскыны ветлэм.

Семьяед ке вӧзад, сюлмыд но интыяд

Калыкын озьы шуо. Та верам кылъёс Семёновъёслы туж тупало. Бадӟым семьяязы соос ог-огзы понна юрттӥсь, визь-кенеш сётӥсь адямиос луо. Эшлыко улыны быгатэмзылэн секретсы ма бордын? Та семьяын котькин ог-огзэ вала, кылзӥське. Соос вань ужъёсты дэмен ужало. Огъя луэмзы ик соосты огазея, герӟа.