Ужаны, кӧт тырыны луэ, шулдыръяськыны — уг…

Бадӟым Лӧзя 1 люкет гурт Покчи Лӧзялы туж матын интыяськемын, шоръёзо школа но артын гинэ. Кыдёкын ӧвӧл ке но, татысь пиналъёс школае автобусэн ветло. Гуртын 7 аресозь 23 нылпи, дас тямыс аресозь 43 нылпи лыдъяське. Дошкольной аресэн ваньзы шуымон пиналъёс озьы ик Покчи Лӧзяысь нылпи садэ ветло, вань Балтасьысь нылпи садъёсы ветлӥсьёсыз но. Тужгес но валтӥсез, гуртын ужан интызы вань — сюро таза пудо вордон ферма. Татын скал кыско, кунян будэто, вал вордо. Фермазы юн, чылкыт, тупатъян-лэсьтӥськон ужъёс нуисько. Ми лыктон нуналэ пудо утисьёс, пудоез ӵукна сюдыса-утялтыса, оген-оген фермаысь потыса кошко вал. Доразы дырто, малы ке шуоно отын но соосты пудо вите. «Сурнай» возёсын ужасьёс быдэн 3-4 скал возё, йӧлзэс «Ак алтын» йӧл люкан пунктэ сёто, коньдон ӵошатымон умой тыро, пе. Ильнар Васильев, Владимир Ефремов, Евгений Плотников, Иван Кузьмин, Маргарита Сергеева, Вячеслав Мойсеев, Валерий Иванов, Ольга Сергеева, Людмила Димитриева, Виталий Агеев… Скал вордӥсьёсты туж трос вераны луэ. Пудо лыдзы трос луэмысь кутьызы но бадӟым шуыса эн малпалэ, кутьы возьман интызы ӧвӧл шуымон пичи, гурт поселение вазисько, музъем куро, но туннэ нуналлы та ужпум лэчыт сылэ на.

Ужаны яратэмзы адӟиське: гурт таза улонэн улэ, юртъёссы ӝикыт, укноосын сяськаос сыло, рассадазы будэ, сюрессы но урод ӧвӧл кадь… Ми лыктон нуналэ куазь кезьыт тупаз бере, сюрес вылын асфальт ӧвӧл шуыса ӧз но шӧдӥськы вал, фермаысь бертӥсь одӥг пиосмурт верамысь гинэ синме йӧтӥз: векчи из гинэ вӧлдэмын вылэм. Нош гурт калыклы асфальт но кулэ: солы уже но дыртыса мыноно, машинаез но сӧриськытэк мед ветлоз, нылпизэ но остановка дорозь вольыт сюрес вылтӥ нуллэмез потэ. «Нурма-Лызи маршрут но милям гуртмы пыр ортчысал, та выро-гопо интыос ке ӧй луысалзы», — пыдыныз возьматыса вера пиосмурт.

— Та туж чебер гурт, — шуэ Покчи Лӧзя гурт поселенилэн главаезлэн воштӥсез Лариса Михайлова. — Калык татын эшлыко но огмылкыдэн улӥсь. Кыӵе гинэ уж борды ӧз басьтӥське, малпаськыса, пайдаё карыса лэсьто. Кулэ ке луиз, ужпумез ёрос кивалтэтозь но ӝуто, республика уровеньын но сэрттыны-пертчыны быгато.

Гуртын кык депутат вань, огез пудо врач Владимир Филиппов, мукетыз ужбергатӥсь Сергей Плотников. Владимир Петровичен нимаз хозяйствоосысь пудолы прививка лэсьтонэз но пӧртэм кун юрттэт басьтонэз умой радъяськом, нош Сергей Геннадиевичен гуртысь коньдон юрттэтэн герӟаськем шуг ужпумъёс сярысь вераськыны луэ. Сергей Плотников «Элви-Плюс» организациен кивалтэ. 2020 арын ас коньдонэныз гуртысь нылпи шудон площадкаез тылэн обеспечить карем, Покчи Лӧзяысь ошмес котыре но тыл лэсьтэм.

Гуртын кык магазин сылэ: огез ужбергатӥсьлэн, мукетыз ёросысь потребительёслэн обществозылэн. Ужбергатӥсьёслэн «Тургай» магазинзы умой ужа, вузкарон мынэ, нош тани райполэн магазинэз малы ке пайдаен ужаны быгатымтэ, пытсаськем, нош со ведь выль пуктэм магазин, вужез ӝуам.

Ваньмыз вань, гуртын шутэтскон, шулдыръяськон интызы гинэ уг тырмы. Йӧскалык сямъёсты, калык фольклорез, кырӟан-эктонъёсты туж утьыса улӥсь удмурт, ӟуч калыклэсь мылкыдзэ ӝутыса ужам клубез, куашканы быгатэ шуыса, пытсаллям. Клублэн ӧсэз ворсамын, историез гожтэмын. Нош гожтэм сое татын кема аръёс ӵоже ужаса дано шутэтсконэ потэм Валентина Железовская. Туж тунсыко, пичи гурт клубъёслэн историзы эскериське меда мукет интыосын? Сыӵеез луэ ке но, шер, дыр. Гурт калыклы шулдыръяськыны, люкаськыса вераськыны инты кулэ, али адямиосты гуртлэн ватсапын «Лызинцы» шуэм группазы гинэ буйгатэ.

300 аръем историен гуртын нырысь поръёс улӥллям шуыса малпан вань, собере удмуртъёс лыктыса интыяськиллям. Гуртэз Шошма шур кыклы люке. Одӥг палыз — Бадӟым Лӧзя 1 люкет, кудӥз Покчи Лӧзя гурт поселение пыре, мукетыз Бадӟым Лӧзя 2 люкет шуиське, соиз Шубан гурт поселенилы йӧтэ. Дас укмысэтӥ даурлэн нырысетӥ ӝыныяз Бадӟым Лӧзя 1-тӥ люкетэ ӟучъёс лыктыса интыяськиллям. 1760 арын татын 146 удмурт но 8 ӟуч адями улэм. Улыса-улыса тросгес луиллям, 1908 арын 322 удмуртъёс, 187 ӟучъёс улӥллям шуыса тодмо. Али дыре калыклэн лыдыз кулэсмем, гуртын 269 мурт лыдъяське, 70 хозяйство вань. Ёросын кылдытэм ӟуч обществолэн председателез Анастасия Данилова но татын улэ.

— Татчы улыны выжем одӥг мурт Бадӟым Лӧзя гуртлэн 1 люкетэз куштэм гурт шуыса вераны яратэ. Нош ачиз татын гань-гань улэ, — шуэ Лариса Михайловна. — Та кылъёсын мон ачим чик но соглаш уг луиськы. Малы ке шуоно татын улон понна луонлыкъёс тырмыт, гурт зэмзэ но умой интые пуксемын: шур но артэ гинэ, ёрос центр но, центральной больница но, школа но, нылпи сад но матын, бадӟым сюреслэсь но кыдёкын ӧвӧл, гуртын асфальт ӧвӧл ке но, сюрес тупатэмын, вылӥ кивалтӥсьёслэн юрттэменызы дамбае чагыр тусо из вӧлдэмын, магазин вань, нылпиослы шудон площадка лэсьтэмын, спорт площадка гужем футбол, волейбол шудонъёслы чакламын, толалтэ хоккей шудон, конькиен нискылан понна кынтӥське. Самообложение коньдонэн урамъёсысь сюресъёс тупатэмын, туэ тани, гужем ке вуиз, кышкытлык кылдытӥсь писпуосты вандыны дасяськиськом.

Гуртын юртъёс эркын интыяськемын, татын ваньзэ-ӧвӧлзэ кык урам — Голубева но Новая урамъёс. Тулыс каникулъёсы нылпиос али ческыт изё (та гуртэ мынонмы сыӵе дырлы тупаз), нош анай-атайёссы ужын. Эльвира Иванова гинэ кытысь ке но лыктэ:

— Туж умой гурт та, — шуэ со. — Ӝожтӥськыны уг луы. Школа кыдёкын ӧвӧл, магазин вань, машинаос ветло, инкуазь чебер. Ужаса улӥсь адямилы туж умой.

Пичи гуртысен бадӟым шаере вуттӥсь гуртъёсмылы ум ӝожтӥське, соосты ум курлалэ. Тани, адӟиськоды ук, Бадӟым Лӧзялэн 1-тӥ люкетаз гинэ но кыӵе устоесь, оскымонэсь адямиос уло, бадӟым ужъёсты лэсьто. Соос азинлыко мед луозы.