«Ужме туж яратӥсько»

Ӵапак со фельдшерской пунктын ужа туннэ статьямылэн героез — Манашева Валентина Ивановна. Герой шуэме юнме ӧвӧл — Валяпай кадь нылкышноосты, трос аръёс ӵоже асьсэ кужымзэс адямилэн улонэзлы но гурт калыклы сӥзьыса ужасьёсты «герой» сяна кызьы шуод на?

...Вордскем вылэм Валяпай Тюменьын, нош пинал дырзэ ортчытэм ини асьме районамы, Покчи Лӧзя гуртын. Асьме дорысь ик, Вылын Ушмаысь, кузпалыз но луэ.

— Мон пичи дырысеным ик врач луыны малпай. Соку ик ас поннам тодӥ ини: мынам адямиослы юрттэме потэ. Пичи дыръязы, тодӥськоды, луоз, ваньзы нылпиос шудо — кин дышетӥсь, кин пӧраськись, кин визьнодась луыса. Нош мон, кӧня асме тодӥсько, котьку врач луыса шудӥ. Аслэсьтым но, юлтошъёсылэсь но мунёоссэс эмъяй. Соин но школаме йылпумъям бере Можгаысь медициная училищее пыреме нокинэ но ӧз паймыты, дыр, — шуэ Валентина Ивановна.

Пичи дырысеныз ик врач луыны малпамысьтыз, со сяна адямиосын умой кусыпъёс возьыны быгатэмысьтыз, дыр, Валяпай ини 26 ар ӵоже Вылын Ушмаын фельдшер пунктын тырше.

1992-1996-тӥ аръёсы со огназ куинь гуртын ужам — Улын, Шор, Вылын Ушма гуртъёсын. Собере ини та гуртъёсын соос кык кузя ужаны кутскиллям. Туннэ нуналэ Валяпай Вылын но Шор Ушмаысь гурт калыклы медициная юрттэт сётэ. Кыӵе гинэ куазь ӧз луы — кезьыт буранъёс-а, пӧсь нуналъёс-а — Валяпай нуналлы быдэ ветлэ гуртысь гуртэ, юртысь юртэ адямиосты эмъяса, аслэсьтыз ужзэ быдэстыса. «Пӧртэмез луиз, мазэ веранэз. Секыт дыръёс но вань вал — адямиосын ужаку, ма гинэ луыны уг быгаты. Вань вал сыӵе учыръёс но, кудъёссэ газетэ гожтымон но, адямиослы но верамон ӧвӧл. Но озьы ке но, ужме туж яратӥсько, тани кӧня ар ӵоже ужасько ини. Дыр но туж ӝог ортче, шӧдыса вуымон но ӧвӧл. Азьло гинэ со ваньмыз секыт потэ вылэм, дыр ортчыса, вань шуг-секытъёслы дышиськод но «колеяе» пыриськод вылэм со. Валтӥсез — адямиосын котьку умой кусып возьыса, соосын огъя кыл шедьтыса улыны но ужаны быгатыны кулэ».

— Адямиосын но гурт калыкен умой кусыпъёсты возьыса, котькуд минутэ висись адями доры мыныны дась луыса улыны, но со ик дыре семьялы но дыр шедьтыны секыт, дыр. Котькинлэн кузпалыз но, ӵыжы-выжыосыз но уз валалэ, — шуисько.

— Зэм, озьы. Капчи ӧвӧл, тужгес но нырысетӥ ужаны кутскем дыръёсы озьы вал. Нош али семьяе дышиз ни. Куд-ог дыръя уйин кин ке доры мыноно луиз ке, кузпалэным Алексеен ӵош но мынӥськомы. Со монэ вала, быгатэмезъя юрттыны но тырше. Уколъёсты но карыны дышетскиз ини. Нылъёсы но монэ умой валало — кыкназы ик асьсэос но медицина удысэз бырйизы ук. Бадӟым нылмы Лена Ижевскысь медициная колледжез йылпумъяз, тани кык ар ужа но ини. Лариса нылы но туэ медициная колледжез йылпумъялоз... Соин та ласянь нокыӵе проблемаос ӧз кылдэ. Кыкназы ик нылъёсы медсестралы дышетскизы. Мон понна со туж шумпотымон, малы ке шуоно соос асьсэ мылкыдзы луыса та ӧнерез бырйизы. Табере милемлы ог-огенымы вераськыны капчигес но, вераськон темаосмы но тросгес — милемыз медицина герӟа ук. Куддыръя мон кенеш сётӥсько нылъёсылы, куддыръя соос но мыным сёто — озьы ик улӥськом, — вераз Валяпай.

Бен, нылкышнолэн ваньмыз борды вутскемез кабинетаз пыремен валче ик шӧдӥське — татын ваньмыз радызъя, аслаз интыяз сылэ. Нош кӧня та пичи кабинетын сяськаос! Паймымон,  кызьы вутскыны быгатэ меда со? Ужез но капчи ӧвӧл солэн — калыкен профилактической вераськонъёс ортчытъяно, нылпиосын но, бадӟымъёсын но, висёнъёссэс шараяно, соосты эмъяно но! Адямиос но пӧртэм луо, шедё, луоз, сыӵеосыз но, кудъёсызлы мар ке но уг кельшы. Сыӵе адямиосын но ужаны тупа, дыр, Валяпайлы.

— Керетонъёс но луыло, сотэк нокытын но ӧвӧл, дыр. Но котьма ке но, аслэсьтыд уждэ яратыса быдэстӥд ке, ваньмызлы дышиськод но ваньмыз умой луэ. Одӥгез гинэ ӝожомытэ: егитъёслэн фельдшерлы дышетскыны мынэмзы уг поты. Туж кылкутымон ук ужмы, документациез гинэ но кӧня. Та уж борды басьтӥськон понна котькуд адямилы нимысьтыз подход шедьтыны быгатыны кулэ, озьы ик кылзыны быгатоно. Котькуд муртлы саклык висъяно. Соку адями но тон борды кыстӥськоз, тыныд но ужаны капчигес луоз, — пальпотыса вераз Валентина Ивановна.

Котькуд адямиен тодматскем но вераськем бере кыӵе ке мылкыдъёс кылдо. Валентина Ивановна сярысь тазьы вераме потэ: ӝикыт, каньыл, визьмо, нодос нылкышно со. Солэн нодос луэмез вераськемезъя ик тодмо. Ми соин нылкышноос сямен пӧртэм темалы вераськыса но вутскимы, Валентина Ивановна мыным кенешъёс но сётӥз. «Котькуд ведралэн аслаз пытсэтэз вань, — шуиз со. — Соин но улонын нокытчы дыртоно ӧвӧл, ваньмыз ас радызъя мыныны кулэ».

Гажано Валентина Ивановна! Тӥледыз сюлмысен вуоно Нылкышноослэн калыккуспо нуналэнызы ӟечкыласько. Сӥзисько тӥледлы юн тазалык, семьяяды тупаса улон но ваньзэ умойзэ. Туннэ нуналлы луэм кужымды, ужан энергиды нуналысь нуналэ мед юрттоз тӥледлы секыт но кылкутымон уждэс быдэсъяыны.