Вормисьмы но, призёрмы но вань

Отын, котьку сямен, Удмуртиысь сяна, тодон-валанъёссэс эскеризы на бускель Татарстан но Башкортостан элькунъёсысь пиналъёс но. 

Сяме пыремъя удмурт кылъя но литературая улосвылкуспо олимпиадаын Татрстанлэсь данзэ Балтась но Кукмор ёросъёсысь тужгес визьмо нылпиос утё. Туэ Балтась ёросысь олимпиадае Покчи Лӧзя шоръёзо школаын тодон-валан басьтӥсь ньыль визьмокай нылъёс пыриськизы: 9 классысь Антонова Елена но Гаврилова Елизавета, 10 классысь Петрова Виктория, 11 классысь Ефремова Алина.

Данъяськыса вераны быгатӥськом, улосвыл олимпиадалэн йылпумъянъёсыз асьме понна туж шумпотымонэсь: вормисьёс но призо интыен пусъем пиналъёс пӧлын асьме дышетскисьёсмы но вань. 9 классын дышетскись но удмурт кылэз умой тодӥсь, удмуртэн эркын вераськись пиналъёс пӧлын Антонова Елена, тужгес визьмо луэмзэ юнматыса, вормись луиз, нош со ик туркымысь (группаысь) Елизавета Гаврилова призёре потӥз. Та сярысь ивортӥз нылъёслэн дышетӥсьсы Наталия Антонова. 

— Асьме ёросмылэсь данзэ утьыса, Ижкарын ортчем улосвылкуспо олимпиадае Ӟаны но Ципья шоръёзо школаосысь дышетскисьёс но пыриськыны кулэ вал, но пӧртэм мугъёсын сэрен соос Ижкаре мыныны ӧз быгатэ. Оглом 116 нылпи визьзэ сыназ та эскеронын. Соос пӧлын вал кызьы удмурт кылэз тодӥсь, удмурт кылын вераськыны быгатӥсь визьпогъёс но, озьы ик удмуртэз умой тодӥсьтэм пиналъёс но. Валамон, соослэн тодон-валанъёссы но нимаз дунъясько. Озьы ик лыдэ басьтыны кулэ созэ но, кин ке кужмо удмурт кылын, кин ке — литератураын. Шумпотӥсько, асьме нылъёсмы понна, быгатӥзы асьсэ тодон-валанъёссэс возьматыны, — бурдъяськем мылкыдзэ ватытэк вера Наталия Львовна.

Нялтас вераса, 2024 арын 19-21 толсуре удмурт кылъя но литературая Казаньын ортчем элькун олимпиадаын асьме ёросысь куать пиналъёс призо интые потӥллям вал: 9 классын дышетскисьёс пӧлын Покчи Лӧзя школаысь Антонова Елена но Гаврилова Елизавета, 10 классын тодон-валан басьтӥсьёс пӧлын Покчи Лӧзя школаысь Петрова Виктория, Ӟаны школаысь Кешишева Ангелина но Ципьяысь Тургенева Мария; 11 классъёс пӧлын Покчи Лӧзяысь Ефремова Алина.

Шумпотон мылкыдъёссэ милемын люкиз Елена Антонова но:
— Удмурт кылъя но литературая олимпиадаосы Лизаен кыкнамы ик 7-тӥ классысен пыриськиськомы. Кинлы ку, кызьы шуд усе (призёрлэсь но вормисьлэсь интызэ куспамы люкиськом). Туэ нырысьсэ элькун но улоскуспо этапъёсаз пыриським (9 классысен гинэ элькунэ басьто). Олимпиадалы покчи классъёсысен ик дасяськиськом, урокъёсын ваньзэ пыр-поч эскериськом, валаны тыршиськом. Олимпиадалэн тунсыко юанъёсыз мылкыдэз бурдъяло, выльзэ тодыны ӧтё. Кылсярысь, туэ таӵе аспӧртэм ужъёс пумиськизы: генеалогической древоя ӵыжы-выжы луись кылъёсты валэктоно, ханты, селькуп, венгер, немец, финн кылъёсысь логической переводъёс лэсьтоно, компьютер сьӧрын писательлы сӥзем презентация быдэстоно. Мыным туж кельшо удмурт кылъя но литературая урокъёс. Литература капчиенгес сётӥське. Олимпиада ужъёсты быдэстыку котьку сюлмаськисько. Ӧй малпа вормисе пото шуыса, озьы ке но, ас поннам оски.

Сюлмысь ӟечкыласьком нылъёсты но, соослэсь ды-шетӥсьсэс но та бадӟым вормонъёсынызы! Сыӵе вормонъёссы азьланяз мед гинэ йылозы!