Вормон Нуналлы 80 ар!

Ожлудысь бертымтэ кузпалъёс, атайёс, бабайёс, пиос но нылъёс сярысь малпаса, синкылиос вияло та нуналэ котькуд семьяын. Сыӵе ыштон соку трос семьяос адӟиллям. Милям бабаймы, Щер-баков Иван Андреевич, та кышкыт ожлудысь бертымтэ. Песянаймы со сярысь тазьы вералляз: «Бадӟым чорыгъёс сиыса быдтӥзы, луоз, солэсь мугорзэ». Ми пичиесь вал соку, соин юатэк но кылим, кыӵе вуын солэн мугорыз, малы озьы вераз песя-наймы.

Кузпалылэн бабаез но, Иванов Фёдор Иванович, 1942 арын оштолэзе бырем. Солэн но вить нылпиосыз атайтэк кылё. Милям песяймылэн 3 нылпиез атайтэк кыле. 

Ваньзэ чидаллям нылкышноос со дыре. Нылпизэс но вордӥллям, колхозын но ужаллям. Огзылэсь но улонзылы ӝожтӥськемзэс ӧй кылы мон. Мынам песянае туж яратэ вал бигер кырӟан кылзыны, эктыса но басьтэ вал.
Секыт ке но луэм соослэн улонзы, озьы ке но улонэз яратыса, нылпиоссэс пыд йылазы султыто. Та мон сямен батырлык!

Нош ожысь бертымтэ геройёслы сӥзьыса, таӵе кылбур гожтӥ:

Аръёс сьӧры, аръёс ортчо.
Вуос кадь соос дырто.
Секыт ож куараос пумен шыпчо.
Сюлэм яраосыз нош уг буйгато.
Ожысь бертымтэ атайзэ
Нылпиос витё али но.
Тямыстон ар ортчыса
Сюлэмзы уг буйга, утча на.
Ожгарчи атайёс, бабайёс
Кыӵе пиналэсь вал соос!
Мусо семьязэс кельтыса,
Оже кошкизы воргоронъёс.
Котькуд семья гуртын но городын
Оже келяз атайзэс но агайзэс.
Гуртысь секыт ужзэс быдэстыса,
Возьмазы, луоз, умой иворъёссэс.
«Секыт ожын быриз герой сямен!»
Таӵе ивор вуиз тросаз юртэ.
Инмез вотсазы сьӧд пилемъёс.
Калык бамысь васькизы синкылиос.
Малы меда кылдэм дунне вылэ,
Секыт, вир кисьтыса ожъёс?
Малы ӧвӧл меда калыкъёс пӧлын
Тупаса кенешыса улон?
Кинлы кулэ кулон но вир кисьтон?
Бомбаослэн но снарядлэн пуштылэмзы?
Ведь котькинлэн та дуннеын
Шудо но кузь гумыро потэ ук улэмез.
1945 ар. Укмысэтӥ куартолэзь.
Шаермылы ваиз со шумпотон.
Котькуд семья витиз, дыр, соку, 
Атай-бабайзылэсь улэп берытскемзэ
Нош бертымтэ солдатэз витьыса,
Анай сюлэм утчаз, дыр, туж кема.
Кышет пумын синзэ ӵушылыса,
Лушкем бӧрдӥз, витиз кема.
Ожын луэм геройёслэн тэльмыремзы,
Милям сюлмын уз вуны ноку но!
Соослэн эрикез утемзы,
Милемлы улон сётӥз даурлы!
Дан, тӥледлы, бертымтэ солдатъёс!
Дан, вормыса бертэм солдатъёслы!
Милемлы, соослэн внукъёссылы,
Шудо улон сётэмзылы — пумтэм Тау!

Екатерина Иванова,
Вылын Ушма гурт