Войнаысь одӥг нунал

Жугиськон кутскем бере, соку ик фронтэ. Вал кышкытэсь ожъёс Новороссийск дорын. Ӝоген тани Польша граница матынъяське, собере Вормон но вуоз ни, доре бертон...

Василий ӝыт сиськемзы бере, кыскыса пуке ӝужыт кыз улын но тодаз вае вордскем Турья Починка гуртсэ, семьязэ, ӵош шудэм но ужам эшъёссэ. Уж бере ӝыт юмшаны потыло вал. Ох, шулдыр луылэ вал, нош вазь ӵукна вырӟыса, колхоз уже вамыштоно. Тани анаезлы но 60 арес тырмоз, пересь ни. Атаез жугиськонлэсь азьло ик кулӥз. Семьяязы кылиз Вера сузэрыз, Валентин выныз, Надя нылыныз Марья кенакез — Иван агаезлэн кышноез. Иван агаез 1942 арын жугиськонын быриз. Секыт али анайлы, мугорыз бадӟым ӧвӧл ке но, туж ужась. Али ӵапак турнан дыр, собере — аран-кутсан. Василий анаезлэн нырысетӥ юрттӥсез вал ни. Юртын зэмос вуэм воргорон.

Тазьы малпаськыса пукыкуз, бызьыса лыктэм куара кылӥськиз. Ильяс нимо бигер эшез вылэм:

— Васил абый, синэ командир чакыра (Васьлэй агай, тонэ командир ӧте).

Ильяс радиотелефонист, Василий кадь ик. Котьку озьы «агай» шуыса, гажаса бигер сямен вазиськылэ, ар кусыпсы трос ӧвӧл ке но. Кыкназы кыльыкузы, соос бигерен лабырто. Одӥг шуытозь, чырткем Василий землянкаын командир дорын ни.

— Ӧтиды-а, командир эш!

Ӝӧк сьӧрын разведка группаысьёс пуко ни вал.

— Ойдо, пыры, пуксьы! Соку ик вераськом уж сярысь. Асьме войскоос быдэс фронтын азьлань мыно. Асьмелэн ужмы, — азинтэ командир, — тушмонлэн резервезлэсь, штабезлэсь интыяськемзэ тодоно, тодоно артиллерия но миномёт батареяослэсь интыяськемзэс...

Уйшоре разведгруппа командирлэсь приказзэ быдэстыны кутскиз. Тодмотэм нюлэс сюресъёстӥ, нюръёс но пичиесь шуръёс вамен, ог-огзы сьӧры ӟазегъёс сямен, чакласькыса вамышъяло. Котькуд сэрегысь фашистъёс потыны быгато. Вуизы. Ини шунды ӝужан но матэктэ. Тани нюлэс дурысь вырйылогес инты. Татысен кырымпыдэсын кадь адске. Разведкалэн командирез но топограф интыяськизы, тушмонлэсь интыяськем координатъёссэ пусйизы. Пусъемын 5 батарея, 4 ДЗОТ, ... Рядовой Игнатьев но аппаратуразэ радъяз, соку ик тодмоям координатъёсты бригадалэн командирезлы ивортӥз. Командирлэн разведчикъёслы сётэм приказэз быдэстэмын...

Шунды ӝужамен ӵош одӥгез сьӧры мукетыз ваньмыз асьме орудиос штаблэн приказэзъя ыбылыны кутскизы. Со тазьы ыбыло разведкалэн сётылэм координатъёсызъя. Немецъёс ӧз вите вал ӵукна ик советской артиллериез, асьмелэнъёслэсь наступление потэмзэс. Кӧня ке улыса, тушмон артиллерия но ыбылыны кутскиз. Музъем зурка, музъем ӝуштэ... Та ож бере бригадалэн командирезлэн верамезъя, бригадалэн участокысеныз 1466 пол ыбылэмын, разведчикъёс вылӥ шонерлыкен тодмояллям тушмонлэсь интыяськемзэ, одӥг красноармеец сӧсырмемын, техникаын ыштон ӧвӧл...

Красноармеец Василий Игнатьевлэн наградной листаз пусъемын: «18 июле 1944 арын Нырысетӥ Белорусской фронт тушмон оборонаез тӥяку, со корректировщикъёслэн группаязы пыриз. Артиллерилэн, пулемётъёслэн ыбылэмзы улын, пехотаен ӵош, ас ужзэ ӟеч тодэм-валаменыз, кышкасьтэм луэменыз, быдэс ож бырытозь вис карытэк радиокусып радъяны быгатӥз».

Батареялэн командирез капитан Комиссаренко.

«За отвагу» медален пусйымон. Бригадалэн командирез майор Высоцкий...

Красноармеец Василий Игнатьевлы Берлин дорозь ик ожмаськыны уг тупа: кема ожмаськытэк, сӧсырмыны шеде. Госпитальын кема эмъяськем бераз, вордскем гуртаз бертэ. Война бере кӧня ке ар улыса кышнояське, кельшытэ картэз оже бырем кышномуртэз Пелагеяез. Валче улыса, огез сьӧры мукетыз нылъёс но пиос вордско, 7 кузя: Галя, Геня, Валя, Толя, Тоня, Рита, Люба. Табере соос ваньзы пазяськемын ни, но вордскем атыкай юртсэс уг вунэто, бертыло, праздникъёсы гинэ ӧвӧл, юрттӥськыны но. Лиза апайзы (анайзылэн нырысетӥ картэзлэсь нылыз), Валя кенак-ичимензы соосты анайзы кадь матын карыса пумитало. Атай юртазы Толя пиез кылем вал. Со Чапаев нимо колхозын (берло «Шушма» СХПК) азьмынӥсь механизатор вал, усто лэсьтӥськись. Жаляса верано, дырызлэсь вазь кулӥз.

Война бере Васьлэй агай колхозын пӧртэм ужъёсты быдэсъялляз: лэсьтӥськон ужъёс, бригадир, кутьычи... 1972 арын Василий Игнатьев, кема висемез бере, кулӥз.

Кемалась ортчизы ож гудыриос, но йырысьтымы, сюлмысьтымы ноку уз кошке асьме югыт улон понна нюръяськем, война пыр потэмъёслэн нимъёссы.

Уже кутэмын интернетысь Василий Игнатьевлэн служить карем 124 ГА бригадаезлэн ортчем сюресысьтыз материалъёс но.

Василий Никитин, Карек-Серма гурт

Та туспуктэмын бур паласез Яковлев Кузьма — Кисаль гурт пи. Одӥг бригадаын ожмаськиллям. Игнатьев Василий — телефонист, Яковлев Кузьма — орудилэн наводчикез.