Выльдӥськон – ӟеч азьпаллэн инъетэз медло (3 люкет)

Выль кивалтӥсь

Нош собранилэсь ог люкетсэ калык сокем шумпотыса ик ӧз пумита. Собраниын эскероно одӥгез валтӥсь ужпум Татарстанысь удмуртъёслэн лулчеберетъя йӧскалык автономизылэсь кивалтӥсьсэ воштонэн герӟаськемын вал. Тросэз асьсэлэсь куаразэс Алексей Андреевич Арзамазовлы сётӥзы. Кивалтӥсьёс солы бадӟым осконъёс пуктӥзы, удмурт калыкез азинтон понна пӧртэм пумо юрттэт сётӥськоз шуыса оскытӥзы.
Бен, одӥг ӧре пырыса ужаны кутскем командалы адями дыше ини. Выльзэ кышкасагес пумита. Пӧртэм пумо шугъяськонъёс кылдо. Озьы ке но, туала улон воштӥськонъёсты но выльдӥськонъёсты куре. Сотэк улон азьлань нокызьы но уз мыны. Интыын лёгаськыса, номыр но воштыны уг луы, со валамон ни. Соин но, выль кивалтӥсез но гажаса пумитаны кулэ. 

Алексей Андреевич но аслаз вераназ удмурт калыклы синмаськемзэ но яратэмзэ вераз. Оскытӥз: Андрей Сергеевичен кутскем ужъёсты утьыса, элькунысь удмуртъёс понна мар ке выльзэ кылдытыса ужалоз. Ми но оскиськом выль кивалтӥсьлэн кужымезлы.

Арзамазов Алексей Андреевич ,
Татарстан Республикаысь наукаосъя Академиысь профессор,

Вордӥськемын 1985 арын Нижний Новгородын. Анаез — экономист, атаез — ожгар удысысь ӧнерчи, удмурт. Алексей Андреевичлэн удмурт кыллы тунсыкъяськонэз выжы писпузэ эскерон вакытаз вордӥське. Та ик солэн улоназ бадӟым воштӥськонъёс пыртӥз. 16 аресэн со удмурт кылын вольыт вераськыны но кылбуръёсты гожъяны кутскиз. 2002 арын Удмурт кун университетлэн историяя факультетаз дышетскыны пыриз, кыкетӥ курсаз удмурт филологилэн венгер отделенияз выжиз. 
Туннэ нуналэ Алексей Андреевич гуманитарной анализъя но когнитивной филология трос факторъем лабораторилэн кивалтӥсез, ТР-ысь наукаосъя академиысь Г. Ибрагимов нимо сопоставительной татароведени лабораторилэн научной сотрудникез, Патрис Лумумба нимо Россиысь калыкъёслэн эшъяськонзылэн университетысь ӟуч кылъя институтлэн профессорез. 
Соин кылдытэмын удмурт (2022 ар) но мари (2023 ар) кылъёсъя ас коже дышетскон книгаос. Озьы ик Алексей Андреевич луэ 27 научной монографиослэн но 170 научной статьяослэн авторзы. Соос пӧлын монографиос, дышетскон книгаос, кылбуръёсын бичетъёс, публицистика, со финно-угристикая но тюркологияя, литературалэн теориезъя сюлэсь но трос научной ужъёсты гожъяз.

Калык дӥськутъёслэн адӟытонзы

Огъя собрани бере ваньзы таркаськизы шуыса эн малпалэ. Кремльын ик радъям «Казанское Поволжье: образы народной культуры» шуыса нимаськем адӟытонэ вамыштӥм. Татын огъя 29 дӥськут комплекс люкамын. Ваньмыз историкъёслэн, пӧртэм ӧнерчиослэн сюлмысь тыршемзылэн бервылэз. 

Та одӥгпумо (уникальной) историко-этнографической проект, кудаз ТР-ын XIX даурлэн кыкетӥ палараз — XX дуарлэн нырысетӥ палараз улӥсь калыкъёслэн дӥськутъёссы выльдэмын вал. Дӥськут комплексъёслэсь ёзъёссэ усточиос ас киынызы лэсьтӥзы. 
Паймымон чебер дӥськутъёс котькуд лыктэм куноез одно ик синмаськытозы. Дӥськутлэн котькуд люкетэз рос-прос эскерыса пыртэмын, соин но ас калыкедлэн костюмез эшшо но дуно адӟиське. 

Со сяна, адӟытонлэсь нимысьтыз люкетсэ крезьгуро инструментъёс басьто. ТР-ын улӥсьёслэн ог-огзылы тупась инструментъёссы луэмысь, та люкетэз огазеяны малпаллям. Котькуд адямилы одно ик тае адӟыны кулэ, со зэмзэ но калыкедлэсь аспӧртэмлыкъёссэ, йылолъёссэ тодыны юрттэ.

Туспуктэм: https://www.antat.ru