Выльысь пумиськизы

Сяме пыремъя пумиськизы Кукмор но Балтась ёросъёсысь удмурт компонентэн школаосысь 8-11 классъёсын дышетскись нылпиос. Соосын ӵош Ошторма Юмья школае вуизы анай кылъя дышетӥсьёссы, школаослэн директоръёссы. Асьме ёросысь та ужрадэ пыриськизы Ципья, Шор Кушкет но Покчи Лӧзя гуртъёсысь удмурт кылэз дышетскись пиналъёс, соослэн дышетӥсьёссы но Ципья но Покчи Лӧзя школаослэн директоръёссы, Сайдаш Нурмиев но Эмиль Гарипов.

Та пумиськон улосвылкуспо ужрадлэсь статуссэ басьтӥз шуыны кулэ. Малы ке шуоно балтасьёс сяна, та нуналэ Кукмор музъеме вуизы Удмуртиысь куноос но. Озьы ужрадлэсь авторитетсэ асьсэ пыриськеменызы ӝутӥзы ТР-ысь удмуртъёслэн НКА-зылэн тӧроез Андрей Герасимов, Удмурт Элькунысь «Ӟечбур!» газетысь корреспондентъёс, Камсьӧр удмуртъёслэн огазеяськонэнызы кивалтӥсь Флюра Чибышева но тросэзлы вакчи гинэ но туж мур пуштросо «Анай» фильм кылдытэменыз тодмо луэм егит кинематограф Денис Корнилов.

Пумиськон ужрад кутскиз Ошторма Юмья школаен, школаысь музеен тодматсконысен. Собере котькуд школа шулдыртӥз аслаз дасям творческой выступлениеныз. Нош тужгес тунсыкоез вал,  дыр, мастер-классъёсын ужан. Пиналъёс ньыль пӧртэм ӧръёсъя ужазы: журналистика, хореография, киуж но кино кылдытон удыс. Кылсярысь, журналистикая мастер-классын «Ӟечбур!» газетысь корреспондентъёс школьникъёсты газет поттон секретъёсын, статья гожтон но интыян амалъёсын тодматӥзы, туспуктэмъёсын ужаны дышетӥзы. Нылпиос асьсэос но газет дасяса утизы.

Удмурт кинематографен но мультипликаторен Денис Корниловен творческой пумиськон но пиналъёсты мылкыдтэм ӧз кельты, луоз, малы ке шуоно та ӧрен егитъёс пӧлын тунсыкъяськисьёс трос. Соин но таиз пумиськон но туж пайдаё луиз шуыны кулэ. Денис Корнилов тужгес тодмо ужъёсыз - «Анай» фильмез но «Курутой пуны» мультфильмез – бордын ужамез сярысь вераз, улонысьтыз куд-ог  тунсыко фактъёсын тодматӥз.

Кызьы верамын вал ини, та нуналэ нылпиос сяна, дышетӥсьёс, школаослэн директоръёссы но пумиськизы. Соос понна радъямын вал котырес ӝӧк, кытын удмурт кылэн, удмурт лулчеберетэн, но, огъя вераса, удмуртлыкен герӟаськем юанъёс, ужпумъёс но шуг-секытъёс эскериськизы. Кылсярысь, одӥгез сыӵе шуг-секыт кылдэ школаосын удмурт кылъя но литературая учебникъёслэн тырмыт луымтэенызы. Та сярысь вылӥ кивалтӥсьёс тодо, оскыны кыле, матысь дыре югдур умой пала воштӥськоз шуыса.

Тӥни озьы туж тунсыко но пайдаё ортчиз таиз но эшлыко пумиськон. Малпаны кулэ, пиналъёс понна но, дышетӥсьёс понна но со сыӵеен тодазы кылёз. Шулдыр мылкыдэн но выльысь пумиськонлы оскыса люкиськизы кузёос но куноос.