Юрт понна пайдаё луись дас сяська

Сяськаос юртэз кислородэн узырмыто, мебельысь, пластмассаысь потӥсь кышкыт веществоосты кыско, кынмамлэсь но депрессилэсь эмъяло. Тодматскоме дасэныз тужгес пайдаё сяськаосын.

1. Алоэ. Та сяськалэн куаръёсысьтыз потӥсь нимысьтыз веществоос линолеумысь вӧлмись ядъёсты кыско. Озьы ик со толалтэ кылдӥсь электризациез быдтэ. Уйин алое кислород поттэ. Соин сое изён комнаталэн шораз пуктэ. Алоэ — со дорад луись «ӝог эмъюрттэт» но. Солэн вуэныз ныр тыремез, ӝуш висёнъёсты эмъяло. Нош миськыса, кыклы люкем куарзэ ярае поныны луэ. Та сяська умой дезинфекция ужрад луэ, яраӟектэм мугорлы ӝоггес бурмыны юрттэ. Выжыезъя со пустыня шаеръёсысь.

2. Герань (пеларгония). Мултэс тыршыса утялтэмез кулэ карисьтэм та сяська туж пайдаё но али. Солэсь лэсьтэм компрессэн азьло ныр тыремез, пель косканэз, йыр но быгыт висёнъёсты эмъяллям. Пеларгония котьку но яратоно сяськаос пӧлын сылэ. Та будослэн сяськаосыз горд, льӧль, тӧдьы тусо луо. Бордысьтыз аспӧртэмлыко зын лыктэ. Герань коркась люкаськем омырез выльдэ, микробъёсын но мултэс мускытэн нюръяське. Нош гужем кутъёсты кышкатэ. Та сяська кухнялы, изён комнаталы туж тупа. Изёндылы матэ гинэ эн пуктэ. Гераньлэн зыныз вир зӥбетэз уськытэ. Изьыны быгатытэк курадӟыку но юрттэ.

3. Кактус. Та экзотической сяськаез вашкала дыръёсы сииллям, нош веньёссэ пинь сузяны кутӥллям. Будэтыны кактусэз туж капчи, нош аспӧртэмлыко вылтыръёсыныз со кузёзэ паймытыны быгатэ. Сое изён но нылпи комнатаослэсь кыдёкын возе. Уйин яке сак луымтэен веняз бышкалскыны медад шеде шуыса. Ужан кабинетын солы туж тупамон инты.

4. Фиалка (Сенполия). Та чебер сяськаен будос быдэс ар ӵоже сяськаяськыны быгатэ. Соос но будэтон ласянь туж капчиесь, уно кулэ уг каро. Соос шоры учкыса, адями депрессилэсь мозме.

Та сяськаос котькуд комнаталы но тупало. Мылкыдэз буйгато, пӧртэм буёлъёсынызы юртэз чебер каро.

5. Фикус. Небыт но сӥлё куарен будос котьку но яратоно сяськаослэн радазы луэ. Соос комнатаез кислородэн узырмыто, пылесос выллем ядъёсты кыско.

Фикусэз изён комнатаын будэтыны косо. Та сяська мылкыдэз каньыл каре.

6. Азалия. Со ас кузёзэ синмаськымон чебер сяськаосыныз шумпоттэ. Буёлъёсыз тӧдьыысен бусӥрозь луо. Куддыръя азалия сокем кужмо сяськаяське, куарез ик уг адскы.

Азалия жадёнэз, нерваосын герӟаськем шуг-секытъёсты быдтэ. Синъёслы шутэтскон сётӥсь амалэн лыдъяське. Нош творческой адямилэсь со творчествоен вырон мылкыдзэ но ӝутыны быгатэ. Та сяська кутъёсты, чибиньёсты, кейёсты, юрт кузьылиосты но мукет изъян вайись кибыосты кышкатэ.

Но будэтыны сое секытгес. Со салкым омырез яратэ.

7. Хлорофитум. Ӝог будэ, уно утялтэмез кулэ уг кары. Комнатаысь омырез дуно кондиционерлэсь но умой сузя, тае Америкаысь тодосчиос юнматӥллям. Космосэ сое огшоры гинэ уг басьто, дыр. Хлорофитум изъян вайись бактериосты быдтэ, боддорын будӥсь пӧртэм губиослы, пурысьтамъёслы тушмон луэ.

Та сяська котькуд сиськон интыын будыны кулэ. Со сутка ӵоже омырысь 80 процент изъянтӥсь веществоосты быдтэ.

8. Спатифиллум (нылкышно шудбур вайись сяська). Стресслэсь мозмытӥсь веществоосты кылдытэ, омырез умой сузя но мускытгес каре. Микробъёсты быдтэм сяна, со аммиак, бензол, ацетон но  мукет спирт паръёсты кыске. Угарной но мукет кышкытлык кылдытӥсь газъёсты кыске. Соин ик ремонт карем коркан спатифиллум будыны кулэ.

9. Сансевиерия. Тазьы учкыса, та сяськалэн номыр паймымонэз ӧвӧл кадь. Но огшоры тусыз сьӧрын туж пайдаё пуштросэз ватскемын. Калыкын сое пӧртэм сямен нимало, шайтан кыл но кый будос шуыса но верало. Солэн вуэз яраосты туж ӝог эмъя, пельвисёнлэсь, нылкышно висёнъёслэсь юрттэ. Озьы ик кормаськонлэсь но паразитъёсын сэрен луэм мукет висёнъёслэсь эмъя.

Со уно кислород кылдытэ. Синтетикаысь, линолеумысь потӥсь ядъёсты кыске.

10. Огшоры (обыкновенный) мирт. Со вир, син висёнъёслэсь эмъя. Чебереныз кузёзэ буйгатэ, мылкыдзэ ӝутэ.