Ӵыжы-выжыос пумиськизы Ӟаны Починкаын

13-тӥ толсуре Пор шаерысь Ӟаны Починка гуртын чебер ужрад ортчиз — «Выль нянь сиён» шуыса нимаськись кыкетӥез улосвылкуспо удмурт йӧскалык фестиваль. Кема витем пумиськонэ вуизы Татарстанысь Балтась но Кукмор ёросъёсысь, Киров улосвылысь творческой коллективъёс, этнографической но фольклорной ансамбльёс, нимаз кырӟан быдэстӥсьёс. Ортчем ужрадлэн валтӥсь ужпумъёсыз луизы удмурт калыклэсь фольклор традициоссэ утён но азинтон, калыклэсь асваланзэ ӝутон, удмурт калыклэсь лулчеберет мерассэ утён, ог-огедлы юрттыса ужан, этнокультурной кусыпъёсты юнматон но опытэн вошъяськон. Ужрадэз учкыны лыктэмъёс пӧлын егитэз но мӧйыез но, пичиез но бадӟымез но вал. Тросэз понна та ӝыт зэмос семья праздниклы пӧрмиз, малы ке шуоно соос бускель улосъёсын улӥсь (Татарстан но Киров улосвыл сярысь вераське — ред.) ӵыжы-выжыосынызы пумиськизы.

Котькудӥз коллектив, ужрадэ пыриськем котькудӥз артист аспӧртэмлыко выступлениеныз шумпоттӥз. Ӵапак соослы луыса, фестивальмы тужгес но яркыт пӧрмиз. Зэмзэ но, ваньзы но лулысь-сюлмысь тыршиллям, рос-прос дасяськиллям, яратоно удмурт калык сиён (мар но ӧй вал отын: нянь, пӧртэм пушкесэн мыльым, перемеч, пельнянь, крендель но трос мукет — ред.) пӧраллям. Ваньзэ пыр-поч малпаллям: рецептысен кутскыса сиён-юонэз калыклы ӵектон амалозь — чебер, тодэ кыльымон представлениосын шумпоттӥзы. Жюриослы туж секыт вал, дыр, вормисьёсты тодмостыны. Но Федотова Галина Анатольевна, Зарипов Насих Садыкович но Надрова Ирина Васильевна, бадӟым кылкутонэз шӧдыса,  асьсэ ужпумзэс чылкыт сюлмын быдэстӥзы — вормисьёсты бырйизы. Озьы, жюрилэсь членъёссэ аспӧртэмлыко выступлениенызы паймытыса, нырысетӥ интыен пусйиськиз но вормисе потӥз Балтась лулчеберетъя юртысь «Зангари» ансамбль. Кыкетӥ интыын, калыкез туж тунсыко но вашкала рецептэн тодматэмез понна, Киров улосвылысь Вятской Поляна городысь «Чипчирган» кырӟан сямъёсты утись удмурт калык ансамбль луиз. Куинетӥ интыез сётӥзы Кукмор ёросысь Нырья гуртысь «Сактон» удмурт калык фольклор ансамбльлы. Соос тужгес ческыт пӧрам сиёнэн паймытӥллям жюриосты.

Фестиваль йылпумъяськем бере культура юртмылэн  фойеаз ваньзы, сцена вылэ потамъёс но, учкисьёс но мылысь-кыдысь калык кырӟанъёс но юмшан гуръёс улсын шулдыръяськыны быгатӥзы. Шумпотымон одӥгез но куно милесьтым «пор акцентэн» удмурт сиён-юонъёсмес веръятэк но ӧз кошкы.

Келяськимы туж кема но люкиськимы мылпотытэк, ваньмыз сямен коллективъёс вуоно арын выльысь вуыны оскытӥзы.  

Веста Андреева, Марий Эл республикаысь Мари-Турек районысь Карлыган гурт