Жугиськонлэн нылпиосыз

Секыт, сютэм улонэз адӟыса будэм, жугиськон дырозь но жугиськон бере вордскем адямиосын пумиськыса вераськыны, тодматскыны тунсыко гинэ ӧвӧл, туж пайдаё но. Соос тыныд азьло улон сярысь но мадё, кыӵе ке визь-кенеш но сёто, улонлы но дышето. Котькудӥзлэн соос пӧлысь улонэз адӟем карымон, синмаськымон, со дыре ик жалямон но. Соослы пичиысен быдэ вуыны, егитысен секыт ужъёслы дышыны тупам.

Евдокия Ивановна доры лыктыку, со ӵукна вӧськылзэ лыдӟе вал. Обросъёс азьын вӧсяськыса сылӥсь кышномуртэз куспетӥ кароно луиз. Соин вераськыны журналист лыктэ шуыса тодэмез бере, вазьгес но султэм вылэм, дасяськем, сюлмаськем Евдокия апай. Удмурт кылын ӟечъяськемме кылыса туж шумпотӥз, пальпотӥз но, «Ой, удмурт ныл лыктэм вылэм мон доры» шуыса, юн-юн ӟыгыртӥз.

— Сыӵе кужмо ӟыгыртыны кужымды вань вылэм, кыӵе умой, — шуисько, пальпотыса.

— Мон сыӵе тӥни песяй ини — котькинэ ӟыгыръяны дыртӥсько, — шуэ серекъяса Евдокия апай. — Инмарлы тау. Ӝожтӥськыны муге ӧвӧл. Пыд йылам сылыны, вераськыны, тани тазьы ӟыгыръяськыны быгатӥсько 94 аресам вуыса но. Тодӥськод-а, мынам анае но 96 аресозь улэм. Оло, выжыямы, дыр, со, — йылпумъян лэсьтэ песянай.

Евдокия Ивановна та гуртын ини кема аръёс ӵоже улэ вылэм. Ачиз со Шор Ушма гуртын 1927-тӥ арын трос нылпиё семьяын вордскем.

— Вордскем гуртэ пичи вал азьло но, али но. Мон пичи дыръя, отын ог 9-10 юрт сылэ вал. Секыт аръёс вал со гуртмы понна но, ёрос понна но, вань шаер понна но. Атаймы мыным куинь арес дыръя кулӥз. Ми, ньыль кузя нылпиос, анай вылэ кылимы. Со милемыз огназ будэтӥз шуыны кулэ. Туж секыт будӥмы… Бадӟым агае Василий жугиськонын кулӥз. Апае Мария вань вал, Валентин агае. Туннэ нуналэ соос кулэмын ини. Мон самой покчиез луи. Пичиысен ужатӥзы но ужатӥзы. Кӧжы, етӥн ишкаллямы. Соку колхозлэн председателез Павел Автономов вал. Со милемлы, бусые лыктыса, кампет сётъяз, сое уг вунэтӥськы ноку но. Тӥни сыӵе йӧно пиосмурт вал со, — малпанъёссэ шара вера Евдокия апай.

Шор Ушма гуртын покчиёзо школаез йылпумъяса, пичи Евдокия Покчи Лӧзя школае дышетскыны выже, отын сизьым классэз йылпумъя. 14 аресъем ныллэн соку туж потэм Арчае дышетӥсьлы дышетскыны пыремез, отчы мынон понна кулэ луись кагазъёсты но дасям со. Но та чебер малпанъёсызлы быдэсмыны кылдымтэ — Быдӟым Атыкай ож кутске.

Дышетӥсь луыны малпанъёсыз сярысь Евдокиялы вунэтыны тупа. Парта азьын дышетскон интые кема аръёс ӵоже солы секыт пиосмурт ужъёсты быдэсъяно луэ — сое но мукет нылъёсты Шеморданэ пу кораны келяло.

— Пичиысен ужаса будӥмы бере, жугиськон кутсконлы, секыт ужъёслы, сютэм улонлы ӝог дышыны тупаз. Соин, жадемысь, сютэм луэмысь гуртамы пегӟылыса но бертылӥмы. Гуртын ведь кыӵе шулдыр вал — егитъёс мызганэн юмшазы, шудӥзы, жугиськон шоры ӧз учке. Сыӵе шулдыр бере, дорад бертэмед уз поты-а? Потӥз, туж потӥз. Озьы пегӟыса ветлыку, одӥг пол пичи гинэ кутытэк кылизы… Валче ужам одӥг нылэз пытсэт сьӧры но пуктӥзы, ужан интыысь пегӟемез понна…

Сӥзьылозь озьы но тазьы Евдокия апай но солэн эшъёсыз Шеморданын ужало. Собере соосты лэзё Ключ гуртэ нюлэс кораны.

— Трос ужамы, туж трос. Сиён ӧвӧл, кужым ӧвӧл, валъёс но сютэмесь — соосты но сюдыны номыр ӧй вал. Озьы, секытэн ортчизы жугиськон аръёс. Жугиськон йылпумъяськыку, мон Карадуван гуртысь мех фабрикаын вуриськись луыса ужасько вал. Туннэ кадь тодӥсько, кызьы радио пыр жугиськон йылпумъяськиз шуыса ивор вуттӥзы. Кыӵе бадӟым шумпотон вал со… Сыӵе шумпотымон, кема витем иворез кылэммы бере, ваньмы шумпотыса бӧрдӥмы, собере ваньместы доре лэзизы, — синкылиоссэ ӵушылыса вера Евдокия апай.

Жугиськон йылпумъяськем бере одӥг арскын вуоно кузпалэз, ожысь бертэм Иван нимо воргорон, Евдокияез кышнолы лушка. Со колхозын плотник луыса ужам.  Ачиз но Евдокия Ивановна бератаз колхозэ пудо-живот сюдӥсь луыса ужаны интыяське. Отысен 1977-тӥ арын дано шутэтсконэ потэ.

Кузпалъёслэн сизьым нылпиоссы вордско — Лидия, Пётр, Михаил, Валерий, Мария, Юрий, Галина. Соослэн котькудӥзлэн ас семьяоссы, ас нылпиоссы но внукъёссы вань ини.

— Кузпалэ 2002-тӥ арын кулӥз ини. Та юртын Михаил пиеным ӵош улӥсько, покчи нылы Галина но дорам гинэ, бускельын улэ. Яра али соос вань мынам татын. Нылы монэ туж уте, одӥг нунал но пырытэк уг кыльы. Солы мон туж шумпотӥсько, — вӧзаз сылӥсь нылыз шоры яратонэн учке Евдокия апай.

Мукет нылпиосыз, внукъёсыз но песянайзы сярысь уг вунэто, быгатэмзыя куное берто. Ассэ туж узыр песянай шуыны быгатэ Евдокия апай: туннэ солэн дас ньыль внукез, дас одӥг правнукез но одӥг праправнукез вань!

Кошкон азьын Евдокия апаен нош ик ӟыгыръяськимы. Сыӵе вераськись, каньыл, огшоры песянай вылэм Евдокия апай. Али кема-кема сӧл-таза луыса улыны мед кылдоз солы.