Жугиськонэн герӟаськем улон сюресъёс, вандэм йырси пунэтъёс

(Кутсконэз «Азьлане» газетлэн 30-тӥ номераз потӥз).

1942 арлэн май толэзез. Кышкыт, осконтэм нуналъёс. Советской солдатъёс ялан чигнало. Воргоронъёс ваньмыз сямен фронтын. Нылъёсты но фронтэ басьтыны кутско. Уноез асьсэос мылкыд карыса кошко. 

Тани Арбор гуртысь сизьыметӥ классын дышетскись Амина Аскарова эшъёсыныз Ципьяе дыртэ. Соос асьсэлэсь дышетӥсьсэс Сайда Мухамметшинаез фронтэ келяны мыно. Со нуналэ Тюнтерысь дышетӥсез Таскира Фазлыеваез, Пижмараысь дышетӥсез Асия Шаймуллинаез но фронтэ келяло. Мукет гуртъёсысь нылъёс но луо.

Жугиськон аръёсысь та учыр табере историе пыремын, отысь геройёс — Сайда, Таскира, Асия но улэп ӧвӧл ини. Улонзэ дышетон ужлы сӥзем Арбор ныл Амина Аскарова ачиз но улэп ӧвӧл ини. 

Сайда Мухамметшина 1919 арын Тюнтерын вордскем. 1939 арын Арскысь педагогической училищеез йылпумъя, ужан сюрессэ Смаиль школаын кутске. 1940-1941 аръёсы Арборысь сизьым аръем школаын завуч луыса ужа, химиен но биологиен дышетэ. 

«Ципьяысен вить нылъёс кошким. Казаньысен товарной вагонъёсы пуктыса келязы. Одӥг толэзь мында шунды ӝужан пала мынӥмы. Хабаровске дугдӥмы. Авиационной школае дышетскыны тодмоязы. Экзаменъёс сётэм бере, частьёсы лэзизы. Монэ 134-тӥ истребительной полке тодмоязы...» (Сайда Мухамметшиналэн тодэ ванъёсысьтыз, 1984 ар). 

Шунды ӝужан пала лэзем мукет нылъёслэн военной улонзы но Сайдалэн выллемгес луэ. Соос куинь ар ӵоже вылӥ военной дасьлык югдурын уло, границамес возьмало, Япониен жугиськонэ пырисько.

Таскира Фазлыева Арск районысь Казанбаш гуртысь ныл. 1923 арын вордскемын. Арскысь педагогической училищеез йылпумъям. 1941 арын Тюнтер школае немец кылъя дышетӥсе тодмоямын. 

Паймымон та улон. Таскира но Сайда одӥг частьын служить каро. Луэм шуг-секытъёсты ӵошен вормо, шумпотонъёссэс огазе каро, вормон шумпотонэз но ӵошен пумитало. 

Жугиськон бере соос люкисько. Огез Балтась районын, мукетыз Арск районын дышето. Соос берлозэ 1986 арын Балтасьын «Вань сюлмысен вераськон» торжествоын пумисько.

Сайда Мухамметшина Тюнтерын ужам. Дышетӥсь, завуч, директор луэм. Уно гинэ общественной ужъёсты нуэм: колхозысь парторганизацилэн секретарез, пропагандист, профсоюзной комитетлэн председателез, «Знание» обществолэн кивалтӥсез.

Бен, адямиослэсь улонзэс яркыт тылсиен, аслэсьтыз улонзэ ужен югдытэм со — дышетӥсь но фронтовик Сайда Мухамметшина. 

«Мирной улонын но капчиен, кинлы ке но оскыса улыны ӧз кылды тыныд... Вормонлэсь 50 арзэ но пумитаны ӧд быгаты тон, анай! Тодэ ваёнъёсамы орден-медальёсыд, ушъян грамотаосыд, ӵужектэм фотоосыд, батырлыклэн примерез луэм улон сюресэд гинэ кылиз». (Сайда Мухамметшиналэн нылызлэн Гульсина Закировалэн тодэ ваёнъёсысьтыз).

Дурга ныллэн Анастасия Архиповалэн улон сюресэз но батырлыклэн примерез луэ. 1915 арын вордскемын. 1932 арын Чутай школаын ужаны кутске, собере Сосна, Дурга школаосын дышетэ, ВКП(б)-лэн Ципья райкомаз инструктор луыса ужа. Анастасия Архиповна 1942 арын май толэзе военной службае басьтӥське. Связья отдельной полкын служить каре. Северо-Западной фронтлэн составаз пырись армиын луэ. 

1944 арын соослэсь полксэс Иранэ лэзё. Отчы бырйыса басьтэм адямиос гинэ мыно. Озьыен, солэсь дышетскемзэ ответственной постын ужамзэ, боевой опытсэ лыдэ басьто. Со Вормон нуналэз но отын пумита. Анастасия Архипова службазэ 1945 арын июль толэзе йылпумъя.

Собере сое райкоме отделэн кивалтӥсе тодмояло. Картэз Ахат Сагдуллин 1946 арын армиысь бертэмез бере, соос кыксы ик дышетон уже выжо. Нырысь Хасаншаих школаын, собере Шубан школаын ужало. Отчы ик интыяськыса кылё, отысен пенсие пото. «Тани 36 ар ини соос та гуртын. Соосты гурт калык матын кариз, малы ке шуид, соос гуртысь пиналъёслы воспитание но тодон-валан сётӥзы. Соос та гуртысь адямиослы пӧрмизы...» Та чуръёс басьтэмын 1990 арын районной газетын потэм Ильдус Юнусовлэн «Партилэн солдатъёсыз» статьяысьтыз.

Ольга Андреевна Петрова 1923 арын Дургаын вордске. 1941 арын Смаиль школалэсь 8-тӥ классэ йылпумъя. Собере Дурга сельсоветын секретарь луыса ужа. 1943 арын армие басьтӥське. Казаньын кылдытэм зенитно-артиллерийской полке тодмояло. Отын зенитчикъёслэсь курссэс ортчем бераз, 1944 арын 1-тӥ Украинской фронтэ лэзё. Соос чугун сюрес станциосты тушмон самолётъёслэсь возьмало. 1945 арлэн сӥзьылаз вордскем палъёсаз бертэ, картлы бызе. Ципья райкомын пропагандист луыса ужа. Собере калыкез дышетон системае выже. Ципья шор ёзо школалэн библиотекаяз ужа, отысен пенсие потэ. Ольга Андреевна — 7 нылпи будэтэм анай, «Материнская слава» орденэн пусъемын. Кулэмын ини.

Быдэс дуннеын тодмо луэм исторической событиез адӟись луэм Ципьяысь дышетӥсь Ираида Михайловна Савельева (1920 арын вордскемын). 1943 арын СССР-лэн, США-лэн, Англилэн кивалтӥсьёссы пыриськем улсын Тегеранын конференция ортчон нуналъёсы Ираида Савельева Тегеранын луэ. Со Сталинэз, Рузвельтэз но Черчилез ас синъёсыныз адӟем.

Ираида Михайловна Ципья шор ёзо школаез 1938 арын йылпумъям. 1938-1942 аръёсы татын ик старшой пионер-вожатой луыса ужам. 1942 арын май толэзе армие басьтӥське. Северо-Западной но Юго-Западной фронтъёслэн составазы ожмаськем связья отдельной полклэн секретной отделаз служить каре. Татын ик партилэн радъёсаз кутӥське.

Жугиськон бере Ираида Михайловна Арскысь педагогической училищеез йылпумъя, Ципья школаын начальной классъёсты дышетэ, отысен пенсие потэ. 1973 арын солы «Татарстанысь заслуженной дышетӥсь» ним сётӥське. «... Гумырыз ӵоже честной, каньыл мылкыдо, юрттӥсь адями вал, улонэзлэн берпуметӥ минутъёсыз дырозь сыӵе адями луиз!» — шуо со сярысь, Ираида Михайловнаез матысен тодӥсь адямиос. 

Арборысь ныл Сарвар Тазетдинова но улонзэ пиналъёсты дышетонлы сӥзьыны малпам, дыр. Таӵе малпан сое Елабугаысь педагогической училищее вуттэ. Нош жугиськон солэсь малпанзэ куспетӥ каре, училищеын дышетсконзэ куштыны тупа. 1942 арын Арбор школае дышетӥсе тодмояло. Со ик аре армие басьтӥське. Та дыре Москва дорын кужмо ожъёс мыно, Сарвар но та ожъёсы пыриське. Нош солы кема служить карыны уг тупа, висемысьтыз службалэсь мозмыто. 1943-1945 аръёсы Куремьял, Субаш школаосын дышетэ. 
Жугиськон бере солэн улонэз колхозэн герӟаське. Уно аръёс ӵоже пудо вордон удысын тырше, отысен пенсие потэ. «Почетной колхозник» ним сётэмын. Солэн тыршыса ужамез «Трудовой Год Знамя» орденэн пусъемын. Сарвар Галиева (Тазетдинова) — 11 нылпи утьыса будэтэм «Герой Анай». 

1937-1938 аръёсы Казанбашын радъяськем педагогической курсъёсты йылпумъям Тавзарысь ныл Зульхиба Хабибуллина (1920 арын вордскемын) Ципья районэ уже лэзиське. Ушла, Атня школаосын дышетэ. 1942 арын фронтэ басьтӥське. Азьпал линиын ожмаське, секыт сӧсырме. (Нылкышно фронтовикъёс пӧлын одӥг гинэ). Инвалид луэмысьтыз, Балтасьысь «Красный труд» артельын ужаны кутске. Отысен пенсие потэ. 
<...>

...1943 ар. Курск, Орел, Белгород палъёсын ӟырдыт ожъёс азинтӥсько. Чугун сюрес станциос понна но кужмо ожъёс мыно. Соосты зенитной орудиос возьмало. Орудиослэн расчётъёсазы уноез нылъёс...

Зенитной расчётын служить карись Махишарафлэн боевой биографияз гумырыз ӵоже вунонтэм событие луэ. Белгород областьысь Готни станциын со, витьымтэ-малпамтэ шорысь, Нурмабашысь егит пиен Кави Гиматовен пумиське. Соос 1940 арысен ик тодмо луо. Со дыре Кави Балтась школаын 10 классын дышетске, нош Махишараф Нурмабашын дышетэ.

Княысь ныл Махишараф Шаймуллина Нурмабаш школаын дышетон дыръяз 1942 арын 7 ноябре армие басьтӥське. Зенитно-артиллерийской частьысь орудийной расчетлэн составаз тодмояське. Та часть нырысетӥ Украинской фронтэ пыре, Украинаез, Киевез, Житомирез мозмытон понна мынэм ожъёсы пыриське. Днепр шурез выже. Махишараф та ӟырдыт ожъёсты ас синъёсыныз адӟе. 

Артиллерист Шаймуллина 1946 арын жугиськонысь бертэ, собере Кня, Тавзар школаосын дышетэ. 1947 арын фронтын луон дыръяз тодматскем Кавилы картлы бызе. Соос Саба районысь Иштуган гуртын уло. Махишараф татысь школаын ужаса пенсие потэ. 
<...>

Махишараф — 7 нылпи будэтэм, «Материнская Слава» орденэн пусъем анай.
Янгул шор ёзо школаез йылпумъям но дышетӥсь луыса ужаны кутскем ньыль ныллэн — Разия Хакимовалэн, Масрура Абдуллиналэн, Гульбика Хадиевалэн, Насима Сафиуллиналэн улон сюрессы но жугиськонэн герӟаськемын. Соос школаез 1939, 1940, 1941 аръёсы быдтӥллям — школалэн нырысетӥ ваёбыжъёсыз. 
<...>

Туннэ соослэсь жугиськонын ветлэмъёссэс тодэ уськыто калыкез дышетонъя отделлэн приказъёсыз, ӵужектэм фотоос, дышетэм дышетскисьёссы, возьмаськись куд-ог арбериоссы, тодмооссы.

Абдуллина Масрура — Салаусь ныл. 1921 арын вордскем. 1939 арын шор ёзо школаез йылпумъям. Собере вакчи дыръем педагогической курсъёсын дышетскем но 11 нылъёсын ӵош школае ужаны лэзиськем. Масрураез Салаусьысь сизьым аръем школае тодмояллям. Эшъёсыз но тодмоосыз сое Масар шуыса ветлытӥллям.

«Кырӟаны, эктыны туж усто ныл вал», — шуо сое тодӥсьёс. Соин, дыр, сое пиналъёс но, гуртысь егитъёс но туж матын кариллям, яратӥллям. Жугиськон кутскон азьын сельсоветлы секретаре быръё, дышетӥсьёс тырмымтэысь, выльысь школае лэзё.

1942 арын Масрураез армие басьто, зенитной частьын служить каре. Солэн частез Белоруссиез, Польшаез мозмытонэ пыриське. Жугиськон бере выльысь Салаусь школаын дышетыны кутске. Картлы быземез бере Казане кошке. Инмар Масруралы вакчи гумыр сётэм, туж вазь кулӥз со.

Вакчиятыса сётэмын.
(Кылемез вань на).

Магсум Мухамметзянов,
Балтась гурт
(«Азьлане» № 12, 22, 2005 ар).