Жугиськонэн герӟаськем улон сюресъёс, вандэм йырси пунэтъёс (1 люкет)

Фронтовик нылъёслэн <...> одӥгезлэн, Янгул гуртын улӥсь Разия Хакимовалэн сюлэм вӧсь луэмез али но тодам возьмаське: «... Йырсиме вандыса кельтӥзы. Йырси пунэтме Рашида апайлы сётӥ, тодаз возён понна возьманы косӥ...» — шуэ со. Бабылес, зӧк йырси пунэт со. 

Кузь, сьӧд йырсиё Балтась ныллэн Рашида Фасхетдиновалэн йырси пунэтъёсыз ӵужапаезлэн Зарифалэн сундук пыдэсаз возьмасько. Йыраз кыӵе малпанъёс луиллям, дыр, со йырси пунэтъёссэ вандыкузы?

«Авиационной специалистъёслэн школаязы дышетскыкумы йырсиме вандӥзы. Пиослы укшаса кылимы. Ог-огмы шоры учкиськомы но, я серекъяммы, я бӧрдэммы потэ». (Дальний Востокын служить карем Сайда Мухамметшиналэн тодэ ваёнъёсыз. 1943-тӥ ар, Хабаровск край).

«Йырсиосмес вандӥзы. Йырси пунэтъёсмес, тодэм вӧсьёсыз лыдӟыса, Приморьеысь сопкаосын будӥсь писпу выжыосы согимы. Нылъёс бӧрдӥзы...» (Балтась нылъёслэн Анвар Ахтямовалэн, Разия Набиевалэн, Фатима Фахретдиновалэн тодэ ваёнъёссы. 2004-тӥ ар, апрель-май). 
Жугиськонэн герӟась-кем улон сюресъёс, вандэм йырси пунэтъёс…

Районысен Быдӟым Отечественной войнае кошкем 68 нылъёслэн 23-ез — тодон-валан сётон удысын ужасьёс, дышетӥсьёс вал. Тани соос:
— Абдуллина Масрура — Салаусь школа, Салаусь гуртысь;
— Архипова Анастасия — Сосна, Дурга школаос, Дурга гуртысь;
— Арыкова (Макарова) Мария — Б. Лӧзя 2-тӥ люкет гуртысь;
— Валиева Мадина — Выль Салаусь школа, Балтась гуртысь;
— Ибрагимова (Хабибуллина) Махианвар — Шуда школа, Шуда гуртысь;
— Гиниятова Бибинур — Шуда школа;
— Зиннурова Мунира — Пижмараысь;
— Мухамметшина Сайда — Арбор школа, Тюнтер гуртысь;
— Набиева Разия — Балтасьысь;
— Сафиуллина Насима — Балтась нылпи сад, Бурнак гуртысь;
— Савельева Ираида — Ципья школа, Ципья гуртысь;
— Петрова Ольга — Ципья школа, Дурга гуртысь;
— Фахертдинова Амина — Сосна школа, Балтась гуртысь;
— Фазлыева Таскира — Тюнтер школа, Казанбаш гуртысь;
— Фахертдинова Фатима — Балтась школа, счетовод;
— Хакимова Разия — калыкез дышетонъя отделысь инспектор, Салаусь гуртысь;
— Хадиева Гульбика — Пускань школа, Кили гуртысь;
— Тазетдинова (Галиева) Сарвар — Арбор школа, Арбор гуртысь;
— Шаймуллина Махишараф — Нурмабаш школа, Кня гуртысь;
— Шаймуллина Асия — Пижмара школа;
— Шайхетдинова Нафика — Субаш, Бакча начальной школаос;
— Хабибуллина Зульхиба — Вуж Пукшинер (Ушла), Атня начальной школаос, Тавзар гуртысь.

Жугиськонэ басьтэм нылъёслы нимысьтыз куронъёс пуктӥськем:
— тодон-валанэз 7 класслэсь улӥ луоно ӧвӧл;
— ӟуч кылэз тодоно;
— медицинской карточкаез гожтэмын но таза луыны кулэ;
— политической дасьлыкез но моральной ласянь юн луэмзэ лыдэ басьтоно.

Нылъёслэн жугиськон дырысь биографиязы таӵе чуръёс возьмасько: «Воспитанной, оскем ужез быдэсъя, аслэсьтыз военной ӧнерзэ умой тодэ. Мӧйыосты, командиръёсты гажа, ӟеч мылкыдо, юрттыны дась. Ожын кышкамтэзэ возьматӥз, политической дасьлыкез умой, юн...»

Та — огъя дунъет. Нош фронтовик нылъёслэн котькудӥзлэн жугиськон дырысь но жугиськон бере аръёсысь ужысь биографиоссы, улонысь учыръёссы, тодэ ваёнъёссы вань.