Жугиськонэн герӟаськем улон сюресъёс, вандэм йырси пунэтъёс (2-тӥ люкет)

(Пумыз. Кутсконэз «Азьлане» газетлэн 30, 33-тӥ номеръёсаз).

<...>

Гульбика Хадиева 1919 арын Кили гуртын вордске. 1937-1938 дышетскон арын Салаусь Сардыган гуртысь начальной школае ужаны тодмояське. Собере Куюкысь, Килиысь, Пусканьысь школаосын дышетэ. 

1943 арын апрель толэзе фронтэ басьтӥське. НКВД-лэн войскоосаз, чугун сюресъёсты возьмась полкын служить каре. 1945 арын июль толэзе дораз бертэ. Со ик аре Пусканьысь начальной школае уже лэзиське, та гуртысь пилы картлы бызе. Картэныз ӵош Казахстанэ кошко, Чимкент городэ улыны интыясько. Гульбика вузкарон системаын ужаса пенсие потэ. Вить нылпи будэто. 2002 арын кулэ. 

Насима Сафиуллина 1923 арын вордске. Бурнакысь начальной но Янгулысь шор ёзо школаосын тодон-валан басьтэ, Казаньысь дошкольной воспитаниея воспитательёсты дасянъя курсъёсты быдтэ. Балтасьысь нылпи садын воспитатель луыса ужа. Районысь калыкез дышетонъя отделлэн 64 номеро приказаз тазьы гожтэмын: «... Балтась нылпи садысь воспитатель Сафиуллина Насима армие басьтӥськемен валче, 1942 арын 4 майысен ужысьтыз мозмытӥське».

Насима связья батальонлэн составаз служить каре. Северо-Западной но Украинской фронтъёслэн боевой сюрестӥзы ортче. Солэн боевой биографиез Днепрез выжонэн, Молдавиез, Румыниез мозмытонэн герӟаськемын. «За победу над Германией» но кӧня ке юбилейной медальёсын пусъемын.
1945-1950 аръёсы Балтасьысь нылпи садын воспитатель луыса ужа. 1950 арын семья югдурезъя та ужысь кошке. Карадуванысь мебель фабрикаын ужаса пенсие потэ. Вормонлы 30 ар тырмонэн валче соослэн связья батальонзы Молдавиын пумиське. Та пумиськонэ Насима но пыриське. 

Мунира Зиннурова 1923 арын вордскемын, ВЛКСМ-лэн членэз, шор ёзо школаез йылпумъям. 1941-1942 дышетскон арын Пижмараысь сизьым аръем школае физикаен-математикаен дышетӥсе тодмояське. 1942 арын май толэзе армие басьтӥське, Дальний Востокын служить каре, Япониен жугиськонэ пыриське. 

Бибинур Гиниятова 1921 арын вордске, ВЛКСМ-лэн членэз, педагогической училищеез йылпумъя. 1940-1941 дышетскон арын Шудаысь начальной школаын дышетыны кутске. 1942 арын фронтэ кошке.

Нафика Шайхетдинова 1923 арын вордске, педагогической училищеез быдтэ. Ужан сюрессэ 1941-1942 дышетскон арын кутске. Субаш но Бакча школаосын дышетэ. 1942 арын апрель толэзе армие басьтӥське. 

Вылӥын вераса ортчем дышетӥсьёслэн фронтовой биографизы, жугиськон бере ужамзы сярысь даннойёссы РОНО-лэн но райвоенкоматлэн архивъёсазы уг адскы, регистрацие басьтӥськымтэ. Соос мукет районъёсысен армие басьтӥськиллям меда, жугиськон бере но отчы ик бертӥллям меда?

Махианвар Ибрагимова 1924 арын Шуда гуртын вордске. ВЛКСМ-лэн членэз. 1942-1946 аръёсы Казаньысь военной заводын ужа. Жугиськон бере Казаньысь педагогической институтэз йылпумъя. Шудаысь сизьым аръем школаын бигер кылэз но литератураез дышетэ. Отысен ик пенсие потэ. Кӧня ке юбилейной медальёсын пусъемын. <...>

Фронтовик нылъёслэн тодэ ваёнъёссы тодмотэм луыса кылё. Фронтысен лэзем куинь сэрего гожтэтъёссы но ӧвӧллы потэмын. Нош ӵыжы-выжыоссылэн, тодмооссылэн, дышетэм дышетскисьёссылэн мылкыдъёсазы соос туннэ но возьмасько. Соосты уг вунэто, мур гажан мылкыдын тодазы уськыто. Тӥни со тодэ ваёнъёсын — нылъёслэн пинал но егит дырзы, ортчем улон сюрессы.

«Песяелэн (куинь нылпизэ жугиськонэ келям, 100 арессэ тырмытыса кулэм анай мурт — Галиева Газза) жугиськонэ келям кыкетӥ нылпиез 20 арес но тырмымтэ нылыз — Набиева Разия. Со Балтасьысь библиотекаын ужам, 1942 арын 20 мае армие басьтӥськем. Ӝытазе повестка вуэм бере, песяй Бадӟым Лӧзя гуртысь Микаля (Михаил луэм, дыр) агай доры одӥг сукыри нянь пыжымон пызь курыны кошкем. Вукочи песяйлы пызь сётэм. Со солы вераса быдтонтэм шумпотэм. Нылзэс фронтэ келяны уйбыт дасяськиллям. Пуйыяз запас кут, дэрем, одӥг сукыри нянь но кӧня ке картофка понӥллям... Валэн Арск станцие поттӥллям...».
<...>

Бен, тодэ ваёнъёс асьмеды ортчем дыре вутто, ортчем событиосты тодэ уськыто, туннэ нуналъёсын герӟало. Улон умой палъёслэсь гинэ уг сылы. Со азьвыл но озьы луэм, али но озьы. Тодэ ваёнлэн умоез но, начарез но мылкыдэ юн пыӵаса кыле.

«Мадина апай со дыре Выль Салаусь гуртын дышетэ вал. Нуналъёслэн одӥгаз доре бертыса пыриз но, монэ фронтэ басьто шуыса вераз. Атай но ми (4 пинал вал) та кылъёсты кылыса мар шуыны паймимы... Сюрес вылэ потон понна расходъёс уно кулэ ведь. Озьы со 1942 арын ас мылкыд каремезъя фронтэ кошкиз». 

Та кылъёс гожтэмын Валиева Мадиналэн вынызлэн, технической наукаосъя докторлэн, профессорлэн Габдельфарт Валиевлэн тодэ ваёнъёсысьтыз (1995 ар).

«Ас мылкыд каремезъя фронтэ мынон» шуэм кылъёс бордысен кӧня ке примеръёсты веран интыё луоз, дыр. Та примеръёс фронтэ кошкем кӧня ке дышетӥсьёслы йӧтӥсько. <...>

Калыкез дышетонъя отделлэн 1942 арын 17 июне 72 номеро приказаз Валиева Мадиналэн ужан дыръяз прогул лэсьтэмез сярысь верамын но приказлэн кыкетӥ пунктаз тазьы гожтэмын:

«Выль Салаусь начальной школаысь дышетӥсьлэсь Валиева Мадиналэсь ужзэ, прогул лэсьтэмез понна, СССР-ысь Верховной Советлэн 1940 арын 26 июне кутэм Указэзъя, судэ сётоно».

Сыӵегес ик пуштросо приказ гожтэмын (25 апрель, 201 номеро приказ) Соснаысь дышетӥсьлы Амина Фахретдиновалы но Кили начальной школаысь дышетӥсьлы Гульбика Хадиевалы. Соос но армие басьтӥськеменызы валче ужысь мозмытӥсько.

Та приказъёсысь «судэ сётоно», «армие басьтӥськеменызы валче ужысь мозмытоно» шуэм кылъёс валамон ке но, та кылъёс сьӧры кыӵе ке но секрет ватскемын кадь. Мынам малпамея, сыӵеослэсь ужзэс судэ сётонэз фронтэ мынонэн воштӥллям, дыр. Котькызьы луиз ке но, та учыръёс фронтовик дышетӥсьёс сярысь тодэ ваён гинэ луыса кылёзы. Только тодэ ваён гинэ!

Нылъёслэн гожтыса кельтэм тодэ ваёнъёссы вань, соос али но возьмасько.
«Служить карыкумы куинь аэродроме выжимы. Аэродромез асьмеос дасяськом, землянкаос гудӟиськом, самолётъёслы пегӟон интыос лэсьтӥськом. Одӥг аэродромын вал гидлэсь но улон инты карыса пайдаяськимы...».

«...Нуналлы быдэ шуымон тревога. Лётчик кабинаын, ми винтовка кутыса, противогазъёс изьыяса самолёт дорын сылӥськом».

«Кезьыт, лымытэк тол. Быдэс мугорез сӥсъясь тӧл пельтэ. Пыдын бадӟым солдат сапегъёс, сырем чалбар, куртка, йырын пелё изьы... Тузон буранэн тэльмырыса но ветлэм нуналъёс али но син азьын...».

«Уин караулын сылон, киын винтовка, тодмоям территориын часъёс ӵоже котыръяськыса ветлӥськод. Вордӥськем пал, вордӥськем юрт, анайлэн шуныт валесэз тодэ усе...» (Сайда Мухамметшиналэн тодэ ваёнъёсыз, 1943-1945 аръёс. Дальний Восток).

«...Дорын огыр-бугыр, бӧрдо. Ӵукна ӟардэм бере сюрес вылэ потӥмы. Анаен бадӟым апай гурт пумозь келяса мынӥзы. Гуртысь кутьы келясь апайёс бӧрдыса ӟеч сюрес сӥзё, сӧл-таза берытскыса бертыны мылкыд каро... Секыт люкиськон минутъёс вал... Валэ пуксьыса Арске кошкимы. Ми Балтасьысь куинь нылъёс: Анвар, Фатима но мон».

«Милям военной ужпум аэродромез, бомба, эстӥськон складъёсты возьман. Одӥг пол постын сылыку кыӵе ке но вужер адӟиськиз. „Стой, кто идёт?“ — шуыса черектэм бере, вужер пегӟыны кутскиз. Кӧня ке пол ыби. Солань-талань бызьылыны кутскизы, со вужерез кутӥзы. Со диверсант луыса потӥз. 

Мыным строй азьын благодарность ялӥзы, кык нунал шутэтскон, „ефрейтор“ звание сётӥзы...».

«Ваньмон дыръёсы, соос луизы ке, керттӥськон ужен выриськом вал. Керттӥськон шорт марляез сэрттэм сӥньыс вал...».

«Уин постын сылыку дырез кизилиосъя лыдъяны дышетски...».
(Разия Набиевалэн тодэ ваёнъёсыз. 1942-45 аръёс, Приморской край). 

— ... Жугиськонын кормаськон висён вӧлмиз. Быдэс частенымы «карантинэ» борӟазы, эмъязы. (Та учыр сярысь Массар Абдуллина мадиз. 1945 ар. Разия Хакимовалэн тодэ ваёнэз). 

«Ми ньыль нылъёс вал. Лидия — Москваысь, Сания, Зоя но мон Татарстанысь. Ми эшъёс вал, куспамы тупаса улӥмы. Асьмеос ик эскерись но, телефонистка, часовой но, сиён пӧрась, домохозяйка (землянкалэн кузёез) но. Ялан землянкаын улыны тупаз». (Арыковалэн (Макарова) тодэ ваёнъёсыз. Улын Ушма, 2004 ар, апрель). 

«...Японецъёс пуртэн туж усто жугиськиллям. Шпионъёссы, диверсантъёссы тужгес ик. Казармаосы пырыса адямиосты вандылыса потэм учыръёс но луиллям. Утиськон ужрадъёс чурыт пуктэмын вал». (Дальний Востокын служить карем нылъёслэн тодэ ваёнъёссы. Анвар Ахтямовалэн (Гилязева) тодэ ваёнъёсысьтыз. 2004 ар, май, Балтась гурт).

Жугиськонлэн азьпал линиез. Отын но шумпотымон событиос луиллям. Разия апай одӥг событиез тодаз уськытӥз. 

«Белоруссилэн музъемаз вал. Одӥг пичи гинэ гуртын аслэсьтым кык класслы азьло дышетскем Янгул пиез Гарафиез пумитай. Со командир луэм частьысь нылъёс пумиськытӥзы. Кыкнамы ик туж шумпотӥмы, куинь часкын сюресъёсмы люкиськизы... Гожтэмез озьы луэм, дыр, жугиськон бере выльысь пумиськимы, кузпалъяськимы».

Бен, жугиськонын адӟемъёсты тодэ ваён секыт, сюлэмез вӧсь карись.
«... Германилэн Магдебург городысьтыз немецкой пленнойёсты поттон но асьмелэсь пленэ шедем солдатъёсты кӧчырон операцие пыриськыны тупаз. 

Сюлэмез туж вӧсь карись картина вал со», — шуэ ветеран секыт лулӟыса.
Тодэ ваёнъёс... Историлэн кылем бервылъёсыз...

«Вормон иворез постын сылыку связистъёслэсь кылӥ. Ӧм оске... Шумпотон, серекъян, синкылиос».

«9-тӥ Май — Вормон нуналэз шумпотыса пумитамы. Со нуналэ монэ партилэн радаз кутӥзы. Япониен жугиськон кутскиз. Милям полкысь самолётъёс но та жугиськонэ пыриськизы. Ми вормимы! Шумпотонлэн пумыз-йылыз ӧй вал».
(Дальний Востокын служить карем Разия Набиевалэн, Сайда Мухамметшиналэн гожтэмъёссы. 1945 ар).

«Аэродромысен японецъёслы пумит жугиськонэ ӝутӥськем самолётъёсты лыдъяса келяськомы вал, бертэмзэс витьыса, лыдъяса пумитаськомы вал». (Японилы пумит жугиськонэ пыриськем нылъёслэн Разиялэн но Анварлэн гожтэмъёссы. 1945 ар, Дальний Восток).

«... Южной Сахалинэз мозмытӥмы. Ярдурысь гуртъёс, посёлокъёс но портъёс бушаса кылизы. Адямиоссы (японецъёс) ӧвӧл. Сопкаосы, нюлэсъёсы пегӟиллям вылэм. Бертыны кутскизы. Дышизы, милемыз куно каро вал. Пегӟемзылэсь мугзэс бератаз тодӥмы. „Ӟучъёс виыса быдто вылэм“, шуэм кыл вӧлмытӥллям. Адямиос оскиллям, соин ик пегӟиллям». 
(Фатима Фахретдиновалэн тодэ ваёнъёсыз. 2004 ар, май-июнь, Балтась гурт).

«Фатима но, мон но жугиськонысь бертӥмы. Балтасьысен ӵош кошкем, ӵош служить карем, ӵош жугиськем, Северной Кореяез, Южной Сахалинэз мозмытонэ пыриськем эше Разия картлы бызьыса, Дальний Востоке кылиз. Вунонтэм секыт тодэ ваён луыса кылиз эшелэн анаезлэн Газза апайлэн бӧрдэмез... аслым сое буйгатымон кылъёс шедьтыны быгатымтэе...

Аръёс ортчыса, ачим анай луэм бере нылзэ витем анайлэсь куректэмзэ, синкыли кисьтэмзэ валай». (Анвар Ахтямовалэн (Гилязева) тодэ ваёнъёсыз. Балтась, 2004 ар, май). 

Нош Разиялэн картэз умой адями луыса потӥз. Газза песяез нылыз но, эмеспиез но кадырласа-утьыса улӥзы, соос доры куное ветлӥз, кузьымъёс басьтӥз. Внучкаезлэн Нуриялэн:

«... Кырсимы Макатов Шайкен туж умой адями вал. Гумырез ӵоже военной службаын луиз. СССР-лэн кыӵе гинэ городъёсаз ӧз улэ. Песяй огзэ но ӧз кельты, куное ветлӥз», — шуыса верамез сое юнматэ.
(Районной газетэ потэм «Нылпиос жугиськонэ кошкизы» статья. 11 март, 2000 ар). 

Фронтовик Насима Сафиуллиналэн сузэрезлэн Фарваз Саляховалэн (Балтась гурт) кылъёсаз сак луымтэлы, мылкыдтэм луэмлы ӝожомон но, вожпотон но шӧдӥське. 

«Газетъёсын гожъям фронтовик кышномуртъёс сярысь лыдӟыку ялан Насима апае тодэ усе. Малы гожтэмъёсын солэн нимтулыз ӧвӧл, малы со сярысь уг гожто?» шуыса сюлэм вӧсь луэ вал. Со но дано ож сюресэз ортчем ук, медальёс басьтэм. Огшоры гуртысь нылэз утчаса шедьтыса, бадӟым карыса Вормонлэн 30 ар тырмонэзлы Молдавие ӧтё. Бадӟым торжествое пыриське, кузьымъёс басьтэ. СССР-ын тодо, нош районын ук«.

Бен, улонын сыӵе учыръёс пумиськыло ай. Куд-огъёсты уг тодо, соос сярысь уг гожъяло, соос ялан палэнэ, вужере кылё, соослэн ужзы ушъям муртъёслэн ужзылы ӵоша, куддыръя соослэсь уногес луэ ке но. 

Эриктэм:
«Огшоры мурт ялан уг адӟиськы,
Котьмакем тыршиз ке но. 
Одӥгъёсыз инмозь кыстӥсько
Шултэм куара кылӥзы ке но»
— шуэм кылбур чуръёс тодэ усизы. 

«Салаусь Сардыганысь мӧйы арлыдэн Зиннат агайлэн: »... Апайдэс гурт калык туж яратӥз. Аслам нылы вордӥськем бере, солы Гульбика ним понӥмы" шуыса верамезлы но адямиослэн мылкыдазы Гульбика апаймы сярысь ӟеч тодэ ваёнъёс утиськемлы мон туж шумпотӥсько«.
(Хадиева Гульбикалэн сузэрезлэн Ильсияр Хадиевалэн тодэ ваёнъёсыз, Карелино гурт, 2004 ар, сентябрь).
<...>

Та гожтэм — дышетӥсь нылъёслэн Быдӟым Отечественной войнаын вормонэ пыртэм люкетсы, жугиськонлэн историяз кельтэм пытьызы сярысь тодэ ваён. Соосын адӟем жугиськонлэн шуг-секытъёсыз азьпал улонлэн чебер, адямиослэн ог-огенызы кусыплэн ӟеч луонэз понна вал ук!..

Магсум Мухамметзянов.
Балтась гурт.

(«Азьлане», 2005 ар.
10, 12, 22, 26 номеръёс)
Вакчиятыса сётэмын.