Жугиськонэн герӟаськем улон сюресъёс, вандэм йырси пунэтъёс (2 люкет)

Районысь калыкез дышетонъя отделлэн архиваз 76-тӥ номеро приказ возьмаське. Отын: «Политпросвещениея инспектор Хакимова Разия армилэн радъёсаз басьтӥськемен валче, 1942-тӥ арын 22 июльысен сое ужысьтыз мозмытоно», шуэмын. Та учырез Разия апай ачиз тазьыгес валэктӥз: «1942-тӥ арлэн гужемез вал. Райисполкомлэн отделаз ужась нылъёсты ӧтьыса, асьмеос мылкыд карыса мынӥськомы шуыса, заявление гожтыны косӥзы. Гожтымтэысь, больницае нуыса комиссия ортчытӥзы, дась луыса улыны косӥзы». Тӥни озьы Разия солдатлэсь шинельзэ дӥся, 136-тӥ отдельной сюрес батальонлэн составаз жугиськон сюресэз ортче. Регулировщикъёсты дасясь нимысьтыз курсъёсты быдтэ, сержант звание басьтэ, КПП-лэн начальникез карыса тодмояло, Прибалтикаез, Белоруссиез, Восточной Пруссиез мозмытон понна мынэм ожъёсы, Польша, Германия музъемъёсын мынэм жугиськонъёсы но Берлинэз штурмовать карон операцие пыриське. 

И. Сталинлэн 317-тӥ номеро (1945-тӥ ар, 29 март) приказэныз, Кёнигсберг дорын немецъёслэсь юго-западной группировказэс котыртыса басьтонэ но пазьгонэ пыриськемез понна тау карон яло. Сое «За боевые заслуги», «За взятие Берлина», «За Победу над Германией» медальёсын пусъё. Нош ик «Жуков» медаль но Отечественной война орден сёто.

Адске, кышкасьтэм ныл луэм Разия. Со сярысь старшина В. Юрченко тани маръёс гожтэм: «... 1943-тӥ арлэн гужемез. Командование полклэсь 200 иськем пала сьӧре кыле, городэ сюрес люкемын. Разведкае кошкем 5 муртлэсь 5 нунал ӵоже ини ивор ӧвӧл. Мар кароно? Штабе адями лэзёно-а? Ачим мынӥсько, шуэ Разия. Азьын немецъёс. Дугдылытэк ыбыло, минаос пуштыло. Нош Разия заданиез быдэстэ». 

Жугиськонэ кошкыкуз 18 арес луэ ныллэн военной улонэз 1945-тӥ арлэн гужемаз йылпумъяське. Жугиськон бере аръёсы Рахия Хакимова Салаусь но Янгул школаосын дышетӥсь луыса ужа. «Ужысь ветеран» медален пусъемын. Янгул гуртысь пиен, дышетӥсь Гарафетдин Гариповен семья кылдыто, 7 нылпи будэто. Разия апай 3-тӥ степенё «Материнская слава» орденэн пусъем анай но али. Сыӵе адямиос гуртлэн, районмылэн данъяськонэз ӧвӧл-а бен?!
<...>

«Стойко перенести все тяготы и лишения воинской службы» шуэмын военной уставын. Жугиськон шуг-секытъёс вылэ аслэсьтыз нош но лек, возьмамтэ-витьымтэ законъёссэ, куронъёссэ ватсам. Озьы кулэ луэм, дыр. Нимысьтыз куронъёслы, приказъёслы подчиняться кариськиллям 12-тӥ ВНОС (воздушной наблюдение, оповещение связи) полкысь нылъёс Лилия (Москваысь ныл), Сания, Зоя (Татарстан) но Б. Лӧзя 2-тӥ люкет гуртысь Мария Петровна Арыкова (Макарова). ПВО-лэн составаз пырем та полк Москваез омырысен нападенилэсь возьмам. Город котырын, тужгес но шунды пуксён палан, постъёс луиллям. Эскерон уен-нуналэн мынэм. Москва пала лобем котькуд самолётлэсь пӧртэмлыксэ, лобон ӝуждалазэ, дырзэ, направленизэ тодмояллям но центре ивортӥллям. 

Постысь нылъёс асьсэос часовой но, телефонистка но, эскерисьёс но, завхоз но, сиён пӧзьтӥсьёс но луиллям. «Землянкаын улӥмы», — шуэ Мария Петровна. «Ялан одӥг интыын-а?» — шуэм юанэлы, «озьы», — шуэ. 

3 ар но 4 толэзьлэсь мултэс странамылэн эрикез понна жугиськонэ пыриськон, землянкаын улон…

Со Великой Отечественной орденэн, тямыс медален пусъемын. Солы «1941-1945-тӥ аръёсысь фронтовик» знак но документ сётӥське. Тодон-валан сётонын ужъёсыз понна «За трудовое отличие» (1945 ар), «Ужысь ветеран» медальёсын пусъемын. 
<...>