Жугиськонэн герӟаськем улон сюресъёс, вандэм йырси пунэтъёс (3 люкет)

Балтась шор ёзо школаысен одӥг классын ӵош дышетскем вить нылъёс — Разия Набиева, Фатима Фахертдинова, Мадина Валиева, Рашида Фасхетдинова, Амина Фахертдинова но Быдӟым Отечественной войнае басьтӥськизы. <...> Соосыз кыкназэсыз (Разия Набиеваез но Фатима Фахретдиноваез — ред.) ик 1942-тӥ арлэн 20 маяз Дальний Востоке лэзё, авиациын служить каро. Соос служить карем 629-тӥ полк Артем, Сучан городъёсы интыяськем аэродромъёсты обслуживать карем нылъёс Северной Кореяез, Южной Сахалинэз мозмытонэ пыриськизы, «За победу над Германией», «За победу над Японией» медальёсын пусъемын.

Жугиськон дугдэм бере Разия улонзэ казах пиен капитан Макатов Шайкенэн герӟа. Со военной улон Ленинградын, Украинаын (Умань) но Казахстанысь Кустанай городын азинтӥське. 

Фатима вордскем палаз Балтасе бертэ. 1945-тӥ арлэн ноябрь толэзяз калыкез дышетонъя отделлэн приказэныз Балтась шор ёзо школае бухгалтере тодмояське, собере калыкез дышетонъя отделын, мех изделиосъя фабрикаын ужаса, дано шутэтсконэ потэ. 3-тӥ степенё Слава орденэн но «Ужысь ветеран» медален пусъемын.

Сосна школаын дышетэм Амина Фахертдинова жугиськонын действующей армилэн составаз 120-тӥ зенитно-артиллерийской полкын служить каре. Младшой сержант. Жугиськон бере Балтась шор ёзо школаын ужа. Картлы быземез бере Казань городын улэ, заводын ужа, шудтэм учыре шедьыса кулэ. 
Выль Салаусь школаын дышетӥсь луыса ужам Мадина Валиева 1942-тӥ арын июнь толэзе ас мылкыд каремезъя жугиськонэ кошке. Действующей армилэн полевой госпиталяз ужа. Вир, кулон, нунал потэм секыт яраосын пумиськон, палаткаосын, землянкаосын улон, сӧсырмемъёсты утён, соосты носилкаосын нуллон, толалтэ гур эстон, чылкытлык луытон но мукет ужъёс — ваньмыз но кулонлэн вужерез улын, полевой госпитальёсын ужам ужъёс. 

Армиысь бертэмез бере Мадина Валиеваез 1945-тӥ арын Бурбаш Сардыган школае тодмояло, отысен Балтась шор ёзо школае ӟуч кылъя дышетӥсь карыса выжто. 1955-58 аръёсы вылӥ партийной школаын дышетске. Собере партийной ужын ужа. КПСС-лэн Балтась райокмезлэн идеология отделэныз кивалтэ. 195-тӥ арысен райкомлэн секретарез. 1968-тӥ арын 46 аресэн кулэ. 

Рашида Фасхетдинова школаез йылпумъямез бере библиотекарь луыса ужа. 1942 арын армие басьтӥське, связья полкын служить каре. Сержант, связист. Жугиськон бере службазэ Армениын, Грузиын азьланьтэ. Уно гинэ орденъёсын но медальёсын пусъемын. <...>

1942 арлэн май толэзез. Кышкыт, осконтэм нуналъёс. Советской солдатъёс ялан чигнало. Воргоронъёс ваньмыз сямен фронтын. Нылъёсты но фронтэ басьтыны кутско. Уноез асьсэос мылкыд карыса кошко. 

(Кылемез вань на).

Магсум Мухамметзянов,
Балтась гурт
(«Азьлане» № 10, 12, 2005 ар).