Агачларны яз көне түгел, көздән агартырга кирәк!

Агачларны яз-көз агарталар. Көзге агарту мөһимрәк. Ул кайры астында кышлый торган корткычларны киметергә булыша, гөмбәчекләрдән, суык, кояш яргалаудан саклый.

Көзге агартуны температура +4...+5 градуска кадәр төшкәч эшлиләр, бу, гадәттә, октябрь азагы-ноябрьнең беренче яртысына туры килә.

Иң элек кәүсәне мүк-лишайниктан чистартырга кирәк. Моны яңгырлы көннәрдә эшләргә тырышыгыз. Гөмбәчек спораларына каршы кәүсәгә 3 %лы тимер яки бакыр купоросы яисә «Ордан», «Скор», ХОМ кебек бакырлы препарат сиптерегез.

Ә агарту өчен кояшлы коры көнне сайларга кирәк. Хәзер агарта торган әзер буяулар сатыла. Кышын кимерүчеләр зыян салмасын өчен, аңа креолин яки каен дегете өстәргә мөмкин, дип яза «Ирек мәданы».