Чананы – яздан, теплицаны көздән әзерләгез

Теплицаларны кышкылыкка әзерләргәндә иң элек эчке ягын кер сабыны кушылган җылымса су белән юганнан соң, янә бер тапкыр чиста су белән сөртеп алырга кирәк. 

Аннан соң теплицаның ишекләрен, форточкаларын ябып, булган тишекләрен томалап, эченә күкерт шашкасы яндырырга куярга кирәк. Теплицаның бер кубометр күләменә 60 грамм күкерт шашкасы кулланыла. Биш көн үткәч, корылманы яхшылап җилләтергә дә була.

Күкерт шашкасы гөмбәле чирләр һәм корткыч бөҗәкләргә каршы кулланыла. Янганда күкерт газы барлык ярыкларга кереп тула, ул корткычлар, күгәрек гөмбәчекләре, зарарлы микроорганизмнарны юк итә. 

Язын күкерт шашкасы белән үсемлекләр утыртырга кимендә өч атна алдан эшкәртергә кирәк.