Кешенең табигате – ит ашау белән бәйле

Хәзерге заманда вегетарианство бик актуальләшеп китте. Төрле галимнәр һәм белгечләр моңа төрле бәя бирә. Дин күзлегеннән чыгып, вегетарианство файдалы микән?

Иттән баш тарту мәсьәләсенә ачыклык кертәр өчен Татарстан мөселманнары Диния нәзарәтенең шәригать мәсьәләләре бүлеге башлыгы, Казан казые (шәригать хөкемдары) Булат Мөбәрәковка мөрәҗәгать иттек.

– Мөхәммәт пәйгамбәрнең дүртенче хәлифәсе Гали Радыяллаһу ганһе әйткәнчә: “Әгәр кеше 40 көн рәттән ит ашамаса, аның холкы, әхлакы бозыла”. Холкы бозыла дигәндә, без галимнәр сүзләренә нигезләнеп фикер йөртәбез. Кеше көчсезләнә, аның гыйбәдәте камил булмый, ягъни ул гыйбәдәтен тиешле рәвештә кыла алмый. Шуңа күрә аның холкы бозыла.

Без бу сүзләргә ышанабыз, чөнки ул Мөхәммәт пәйгамбәрнең дүртенче хәлифәсе, Гали Радыяллаһу ганһедән риваять ителгән. Әлбәттә, идеологик рәвештә дә без иттән ваз кичә алмыйбыз. Веганнар: “Без хайваннарны жәллибез, шуңа ит ашамыйбыз”, – диләр. Андый хәл булырга тиеш түгел, чөнки Аллаһы Тәгалә кайбер хайваннарны аларның итләре ашалсын өчен яралтты. Бу хакта мәгълүмат турыдан-туры Коръәни Кәримдә әйтелгән. Кыскасы, кешенең табигате – ит ашау белән бәйле.