Татарстан буенча «Куркынычсызлык лабораториясе» автомобиле узып, балаларга юл хәрәкәте кагыйдәләрен өйрәтәчәк

Бүген «Куркынычсызлык лабораториясе» комплексын Татарстанның Түбән Кама районы «Балаларга өстәмә белем бирү үзәге» муниципаль бюджет белем бирү учреждениесенә тапшырдылар. Ул республика буенча йөриячәк һәм 17 яшькә кадәрге балаларны юл хәрәкәте кагыйдәләренә өйрәтәчәк.

«Монда барлык юл ситуацияләре өчен җиһазлар тәкъдим ителгән. Балалар җәяүлеләр һәм велосипедчылар сыйфатында юлда барганда, юл йөрү кагыйдәләре нигезләрен белергә тиеш. Әлеге җиһазлар ярдәмендә балалар теоретик әзерлек алачак, аннан соң юлга чыгачак», – дип сөйләгән ТР буенча Юл хәрәкәте куркынычсызлыгы баш дәүләт инспекторы Ленар Габдрахманов.

Ул билгеләп үткәнчә, Татарстанда әлегә шундый бер комплекс бар, ләкин ул үзенең нәтиҗәлелеген күрсәткәч, республикада тагын берничә шундый лаборатория барлыкка киләчәк.

«Программа биш яшь төркеменә исәпләнгән. Аларның һәркайсы өчен 30-40 минут дәвамында дәрес каралган», – дип аңлаткан «Куркынычсызлык хәрәкәте» эксперт үзәгенең проект эшләре буенча директоры Валентина Кульбицкая.

«Татарстан буенча әлеге автомобильнең ничек йөрү  графигы төзелә. Ел азагына кадәр республиканың өч районына бару каралган», – дип өстәгән Валентина Кульбицкая.

Мондый комплекслар Россиянең барлык төбәкләрендә дә барлыкка киләчәк. Татарстан кырык дүртенче булып әлеге күчмә «Куркынычсызлык лабораториясе»н алган.

«Куркынычсызлык лабораториясе» проекты «Юл хәрәкәте иминлеге» федераль проекты кысаларында тормышка ашырыла.

Фото: «Татар-информ»/Михаил Захаров