Татарстанда яңа законнар үз көченә керде

Республикада ТР Дәүләт Советының егерме беренче утырышында кабул ителгән кануннар үз көченә керде. Документлар кече һәм урта бизнеска ярдәм итүгә, сайлау процедураларын төгәлләштерүгә, түләүсез юридик ярдәмгә хокуклы гражданнар исемлеген киңәйтүгә, шулай ук һәлак булган Ватанны саклаучылар истәлеген мәңгеләштерүгә юнәлдерелгән, дип хәбәр иттеләр Татарстан Республикасы Дәүләт Советы матбугат хезмәтендә.

22 июньдә Ватанны саклаганда һәлак булганнарның истәлеген мәңгеләштерү мәсьәләләрен җайга салучы закон үз көченә керде. Документ мәңгеләштерү рәвешләрен билгели, бу өлкәдә дәүләт хакимияте һәм җирле үзидарә органнарының вәкаләтләрен яза. Яшьләрне патриотик тәрбияләүгә, тарихи хәтерне һәм буыннар дәвамчанлыгын саклауга аерым игътибар бирелде. Законның гамәлдә булуы шул исәптән махсус хәрби операциядә катнашучыларга да кагыла. Аерым статья белән Татарстан Республикасы Хәтер Китабын алып бару һәм саклау тәртибе җайга салына.

9 июньдә 2025 елга республика бюджеты үтәлеше турындагы канун үз көченә керде. Керемнәр – 605,1 млрд сум, чыгымнар-605,4 млрд сум. Татарстан, 2024 ел позициясен саклап, үз керемнәре күләме буенча РФ төбәкләре арасында дүртенче урынны алды. Салым һәм салым булмаган керемнәр 493 млрд сум тәшкил иткән. Барлык социаль йөкләмәләр тулысынча үтәлгән, акчалар социаль өлкәгә, юл төзелешенә, Торак-коммуналь хуҗалыкка һәм төзекләндерүгә юнәлтелгән.

22 июньдә 2025 ел өчен ММИ Территориаль фонды бюджеты үтәлеше турындагы канун үз көченә керде. Фондның керемнәре 93,2 млрд сум, чыгымнары – 92,6 млрд сум. 2024 ел белән чагыштырганда күрсәткечләр 12,3 һәм 12,4 млрд сумга арткан, дип билгеләп үтте ТР Дәүләт Советының Бюджет комитеты рәисе урынбасары Камил Нугаев.

3 июльдән Арча районында Сарай-Чокырча тимер юл разъездын бетерү турындагы канун үз көченә керә. Аның урынында тимер юл һәм тукталыш платформасы гына бар, торак корылмалар һәм инфраструктура юк. Урта Курса авыл җирлеге халкы аны бетерүне хуплый.

22 июньдә шикәрле эчемлекләр җитештерүчеләргә дәүләт ярдәме чараларын кире кайтара торган закон үз көченә керде. Элегрәк мондый эчемлекләрне акциз астындагы товарлар исемлегенә керткәннән соң, алар ярдәм алучылар саныннан чыгарылган иде. Апрельдә кабул ителгән федераль кануннарга төзәтмәләр бу коллизияне бетерде. Ярдәм Энергетиклар җитештерүчеләргә кагылмый.

22 июньдә түләүсез юридик ярдәмгә хокуклы гражданнар категорияләрен киңәйтүче закон үз көченә керде. Хәзер мондый хокук аларны мәҗбүри күченүчеләр яки качаклар дип тану турында үтенеч белән мөрәҗәгать итүче, шулай ук бу статус яки вакытлыча сыену алган затларга бирелә. Дәүләт Советы депутаты Игорь Бикеев аңлатканча, элек аларның бушлай ярдәмгә хокукы булмаган.

9 июньдә ТР Сайлау кодексына үзгәрешләр кертү турындагы канун үз көченә керде. Җирле администрация башлыклары сайлаучылар турында белешмәләр формалаштыру бурычыннан азат ителгән-хәзер моны үзәкләштерелгән теркәү системасы эшли. Тавыш бирү йомгаклары турындагы беркетмәләрне электрон рәвештә төзергә була (кәгазь вариант сакланып калган). Кандидатларның һәм партияләрнең финанс хисаплары сайлау комиссияләре сайтларында бастырылачак. Партияләр сайлау алды программаларын матбугат басмаларында яки үз сайтларында бастыра ала. Шулай ук закон агитациядә физик затларның сурәтләрен һәм тавышларын куллану тәртибен билгели.

Татар-информ