Али ик кутсконо дасяськыны

Ваньзылэн мылкыдъёссы капчиесь. Кызьы-о сотэк, кӧня дасяськизы, кӧня чидатэк шумпотыса витизы, вылды. Нырысь ик эктонын устолыксэс возьматӥзы. Эктон — со сцена вылын бызьылыса, тэтчаса ветлон гинэ ӧвӧл, отын вамышъёс, берытсконъёс, чабонъёс — ваньмыз огдыре луоно яке синхронность кулэ. Кырӟанъёс тани шулдыръёсыз но, мӧзмытъёсыз но луо ке, нош асьме калык эктонъёсмы шулдыресесь гинэ. Соин эктонын одно ик пальпотон кулэ на, со учкисьлэсь мылкыдзэ усьтэ, эктонэз чеберма. Тани огез бӧрсьы мукетыз шулдыр крезьгур улсын эктыны пото. Нырысь вамыш! Нош кӧня луозы на соос! Котькудӥз пинал ог-огезлэсь адӟыса, сцена сьӧрын «ӝуась» визьнодасьсылэсь возьматэмзэ учкыса, янгышъёс лэсьтытэк, макем тыршыса эктӥз. Эктон номинациын нырысетӥ инты Ципьялась нылпи сад басьтӥз. Соослэн эктонзы пиналъёслэсь арлыдзэс утьыса дасямын вал. Покчи пиналъёсты бадӟымъёслы тупатэм крезьгурен эктытон — со туж бадӟым янгыш. Крезьгур чебер, но ведь солэн ӝоглыкез кужмо. Сыӵе ӝог крезьгурен пичиос гинэ ӧвӧл, дасо аръёс ӵоже эктэм бадӟымъёс но сурасько. Покчиослы каллен гур кулэ. Визьнодасьёслы Удмуртиын ортчытӥськись таӵе ик вожвылъяськонэз учкыны интыяз луысал. Пыралэ ВК-ысь («ВКонтакте» интернетысь социальной вотэсысь — Ред.) «Шудон корка» группае. Ӵапак со нылпи садэ ветлӥсь пиналъёс понна, соослэн визьнодасьёссы но анай-атайёссы понна.

Кыкетӥ люкетэз кырӟанъёслы сӥземын вал. Соос трос ӧй вал. Татын мон пусйысал Ӟаныысь Чирикова Лераез. Куараезъя кырӟан бырйыны быгатӥллям. Туж умой!

Куинетӥ люкетаз покчиосмы кылбур вераны быгатэмзэс возьматӥзы. Татын вормисен лыдъямын вал Ципья нылпи садысь Григорьева Кристина. О! Мамында кылбуръёс асьмелэн. Вазиськысалды ке, ачим но интызэ возьматысал. Кылбур веракузы, шӧдӥське ни пиналъёслэн ӟучомемзы. Ӝ, Ӟ, Ӵ куараосын кылъёсты вераны шугъясько соос. Анай-атайёс, уката ик песяй-бабайёс, талы туж шумпото. Малпало, ӟучен гинэ тодыса, пе, умой дышетскозы. Умой дышетскыны ӟуч кылэз тодон гинэ уг юртты. Мон тодӥсько сыӵе ӟучен гинэ вераськись семьяосты, кудаз нылпиоссы туж ик кужмоесь, удмурт кылэз тодӥсьёслэсь ортчыт ӧвӧл, куддыр кулэс но али. Пиналэз удмурт кыллэсь люкыса, асьмеос туж бадӟым ыштон гинэ лэсьтӥськом. Кылсярысь, мынам тодмоелэн нылызлэн Петербургын я Москваын журналистикая факультетын дышетскыны луонлыкез вань вал, малы ке шуоно со — удмурт. Но, жаляса верано, отчы удмурт кылэз дышетскем мурт кулэ луэм. Нош та ныллэн со ӧй вал. Уг юртты шуид ке но, коть лушкем со та вераськыны ке но яра ук. Собере кун сьӧрын удмурт луэмдэс ке тодӥзы, удмурт сямен вераськемдэс ке кылӥзы, тӥледыз котькытын капчи мылкыдын пумиталозы. Уго асьмелэсь Буран песянайёсмес, «Айкаймес», спортсменъёсмес трос странаосын тодо ук. Вылӥ кивалтон ужъёсын но куддыр удмурт кыл тодэмез кулэ каро. Верало одӥг учыр шуод-а, мар-а. ВК-ын «Удмуртский каждый день» группа вань. Лыдӟисьёс пӧлын сое тодӥсьёс вань. Та группа удмурт кылмес дышетон понна кылдытэмын. Солэн администраторез луэ ӟуч кышномурт. Кельшиз, пе, мыным удмурт кыл. Кылдытэм та группаез. Ачиз но дышетске, мукетъёсты но дышетэ. Вить ар куспын кышномурт удмурт сямен лыдӟе, гожъя, вераське. Вераны кулэ созэ но. Та группаын удмуртэз но, ӟучез но, украинэз, порез, чувашез... вань. Егитэз но, мӧйыэз но. Пӧртэм-пӧртэм интыосысь. Соослэн удмурт кылмес тодэмзы, волятэмзы потэ, анай кылын кырӟанъёсты кылзыса, кылбуръёсты, веранъёсты лыдӟыса сюлэмзы капчия. Нош асьмеос ыме понэм макеез сялӟиськом, юрдӥськом! Луонлыкенымы пайдаяськыны кулэ. Семьяямы удмурт сямен вераськыны кулэ.

Празднике шонерак пыриськизы Балтась нылпи садъёсысь пиналъёс но. Кудӥз малпалоз, малы соос татчы? Туж умой со визьнодан ужын. Озьы калыкъёс куспын ог-огдэ валан кылдэ, эшъяськон юнма. Эшъяськон — со югыт инбам, чылкыт омыр, тыр но шумпотыса кышкатэк улон. Балтась бигер пиосты но нылъёсты вераськемзыя гинэ тодманы луэ вал. Юри та фестивальлы шуыса, костюмъёс но вурытӥллям, шӧдске. Тау соослы!

Азьланяз эшшо но умоесь номеръёс дасяны мылкыдзы ӝутскиз, дыр.

«Мудорвай» фестивальмы, мон малпасько, берпуметӥез ӧй вал, дыр. Соин али ик кутсконо ни солы дасяськыны. Дырыз вуэм бере, со туж огыр-бугыр луэ, уката ик сентябрь толэзе. Котькуд класс, группа одӥг арскын одӥг вольыт номер дасяны быгатоз, дыр, шуыса малпасько. Выльысь пумиськытозь, мусоесь покчи артистъёсмы, гажано визьнодасьёсмы, дышетӥсьёсмы. Кинлы ке ярамтэ маке гожтӥськем ке, вождэс эн вае, мон сое ваньзэ ӟечлы гожтӥ. Удмуртъёс понна но, мукет калыкъёс понна но урод малпанэн уг улӥськы.

Василий Никитин