Анай кылын диктант гожтӥзы

16-тӥ коньывуонэ Татарстанын улӥсь калыкъёс анай кылъёсын диктант гожтон ужрадэ пыриськизы. Вордскем кылын диктант гожтӥзы Татарстанын улӥсь удмуртъёс но.

Асьме ёросын анай кылын диктант гожтонъя куинь площадка ужам. Котьку сямен со этнокультурной компонентэн Покчи Лӧзя, Шор Кушкет но Ципья шоръёзо школаос. Та сярысь ивортӥз ёросысь удмурт кылъя дышетӥсьёслэн методической огазеяськонзылэн кивалтӥсез Наталия Антонова.

— Удмурт кылын диктант гожтонэ та куинь школаосысь быдэн 15 мурт пыриськиз. Соос ваньзы 6-11 классъёсын дышетскисьёс. Текст пумысен верано ке, со Ю. Ельцовлэн «Кыӵе писпу чебергес?» шуыса нимаськись текстэз вал. Тунсыко текст. Шумпотымон, 6-тӥ классысь пиналъёс но диктантэз туж умой гожтӥзы. Кылсярысь, Покчи Лӧзя школаын диктант гожтэм 15 мурт пӧлысь тямысэз витьлы гожтӥз, куинез — ньыльлы, ньылез — куиньлы, — шуэ Наталия Львовна.

Ципья шоръёзо школаын удмурт нылпиос сяна, пор пиналъёс но анай кылзыя асьсэлэсь тодон-валанзэс эскерыны быгатӥзы, соос но пор кылын диктант гожтӥзы.

Огъя вераса, удмурт кылын диктант гожтонэ асьме ёросмы сяна, Бавлы, Агрыз, Кукмор, Мамадыш, Саба ёросъёсын улӥсь удмуртъёс но пыриськиллям. Казаньын но Калыкъёслэн эшъяськон юртазы удмурт егитъёс анай кылынызы шонер гожъяськыны быгатэмзэс эскериллям.

Пусйыны кулэ: «Татарстанын улӥсь калыкъёслэн анай кылъёсынызы диктант» элькун ужрадэз Анай кылъёслэн но калык огазеяськонлэн арзы улсын но Калык огазеяськон нуналэн валче ортчытӥзы. Ужрадлэн валтӥсь мугез — Татарстанын улӥсь калыкъёслэсь анай кылзэс дышетон мылкыдзэс ӝутон, вордскем кылын шонер гожъяськыны дышетон но анай кылъёсты паськыт вӧлмытон. Та ужрад пыриськем адямиослы асьсэлэсь анай кылын шонер гожъяськыны быгатэмзэс эскерыны луонлык кылдытӥз. Диктант гожтонэ котькуд мылкыд карись адями пыриськыны быгатӥз. Вань пыриськисьёслы таукарон гожтэтъёс сётӥзы.