Ас калыкезлэн дано пиез

Туннэ, 5-тӥ гудырикошконэ, 70 аресъем юбилейзэ пусъе адями, кудзэ чик мултэстытэк ас калыкезлэн зэмос пиез шуыны луоз. Василий Петрович Никитин — котькинлы тодмо ним. Куд-огез понна со — визьмо визьнодась но усто дышетӥсь, мукетъёсыз понна — жадёнэз валатэк, удмуртлыкез утён понна нюръяськись, куинетӥосыз понна — поэзия дуннее ӧсъёсты усьтӥсь, кылысь кылэ берыктӥсь но ёрос газетмес тунсыко гожъямъёсыныз узырмытӥсь. Туннэ ми солы шуиськом: «Тау!» но «Вордӥськем нуналэныды!» 

Василий Петровичлэн профессие сюресэз кутскиз вордскем Карек-Серма гуртысеныз: ӵапак отын со вордскиз кыдёкысь 1956-тӥ арын. Ципья шоръёзо школаез йылпумъямез но армиын служить каремез бере со бырйиз тужгес ӟеч сюресэз — педагогикаез. Та удысын тодон-валан басьтон понна Елабугаысь пединститутэ заочной отделение дышетскыны пыриз. Но диплом со понна котьку формальность гинэ вал, зэмос школа луиз нылпиосын ужан но улон. Узыр ужан стажзэ Василий Петрович люказ ёросысь кӧня ке школаосын. Нырысь Сизнер покчиёзо школаын директор луиз, собере Турья гуртысь школаын ужаз. Но ужам аръёсызлэсь троссэ со сӥзиз вордскем Карек-Серма гуртысьтыз покчиёзо школаын дышетонлы. Со ворсаськем бере Ӟаны шоръёзо школаын пиналъёслы тодон-валанлэсь ӟеч кидысъёссэ кизиз. Василий Никитин понна дышетӥсь луон — огшоры уж гинэ ӧвӧл, со адӟон, ӵапак та удысын тыршон понна ик со вордскем, луоз. Юнме шат солэн ужез тужгес вылӥ уровенен пусъемын. РСФСР-ысь Дышетонъя министерстволэн данъян грамотаосыз, Татарстанысь Дышетонъя но наукая министерстволэн таукаронъёсыз, Удмурт Элькунлэн Таукаронэз но медалез гинэ но — со дышетскисьёсызлэсь яратэмзэс но гажамзэс возьматӥсь но юнматӥсь официальной данъетъёс. 

Но Василий Петровичлэн данэз школа доскалэсь трослы паськытгес. Со ёросамы удмурт калыклэн зэмос азьветлӥсез. Солэн кичӧлтэмезлы но тыршемезлы луыса ёросын выльысь «Гырон быдтон» удмурт калык шулдыръяськонэз ортчытон сям улӟиз, «Жингырты, удмурт кырӟан!» творческой конкурс радъяськыны кутскиз. Озьы ик со «Азьлане» газетлэн улоназ но нимысьтыз инты басьтэ. Василий Петровичлэн гожъямъёсыз газет бамъёсмес тунсыкогес карыны юртто, визь-кенешъёсыз но ӵектонъёсыз ужаны мылкыд сёто, удмурт кыл но лулчеберет улыны кулэ шуыса оскыто. 

Юбилярлэн улонэзлэн нимаз бамез — солэн берыктон ужез. Василий Петрович ёросын улӥсьёс понна дуно кузьым лэсьтӥз — удмурт кыл пыр тодматӥз асьмеды быдӟым бигер кылбурчиосын Габдулла Тукаен но Муса Джалилен, озьы ик аспал кылбурчиен Гарифзян Мухаметшинэн. Туннэ но, цифровой технологиослэн дауразы, со та ужзэ азьланьтэ: берыктэмъёсыз «ВКонтакте» мерлыко вотэсысь «Удмуртский каждый день» усьтэм группаяз гожтӥськисьёсты шумпотто. 

Паймымон, праздник дыръя но Василий Петрович гань-гань улонэз уг тоды — со ялан утчаське, выльзэ тодыны но тодэменыз котырысьтыз адямиосты тодматыны тырше. Сыӵе пумтэм кужым, улон мылкыд но вордскем музъеммылы оскымон луон — ваньмы понна пример. 

Гажано Василий Петрович! Вань сюлмысьтымы ӟечкыласьком тӥледыз синмаськымон Юбилееныды! Дышетскисьёстылэн шуныт мылкыдзы но улосчиостылэн тау каремзы сюлэмдэс котьку мед шунтозы. Сӥзиськом юн тазалык, кузь гумыр, шулдыр мылкыд, трос шумпотонъёс но выль творческой вормонъёс. Тау, тӥ милям вань шуыса!

«Азьлане» газетын ужасьёс