«Азьлане» газет: толон но туннэ (арлыдоослэн синмынызы)

«Кемалась-а тӥ «Азьлане» газетэз лыдӟиськоды?», «Маиз кельше но маиз уг кельшы газетын?», «Мар сярысь газетысь лыдӟемды потэ» — та но кӧня ке мукет юанъёслы пӧртэм гуртъёсысь арлыдоос ответ сётӥзы.

Елена Чакмина, Ципья:

— «Азьлане» газетэз азьло дырысен туж яратыса лыдӟисько. Азьло бигеръёс сярысь гожъяло ке вал, туннэ нуналэ удмуртъёс сярысь но статьяос ӵем потало. Соиз туж шумпотымон. Котьма ке но, одӥг бамзэ но кельтытэк лыдӟисько — бигеръёс сярысь гожтэм статья-а со, удмуртъёс сярысь-а. Трос тодмоосы сярысь «Азьланеын» материалъёс потылӥзы ни. Ваньмыз вань район газетамы — колхозъёс сярысь но, передовикъёс сярысь но... Пӧртэм кенешъёс сётыса гожъякузы но туж яратыса лыдӟисько. Озьы ик черк сярысь материалъёс туж тунсыко пото, ми егит дыръя улон политика мукет вал ук, соин-а мар-а. Огъя вераса, газет туж кельше, азьланяз но озьы луоз шуыса оскисько.

Михаил Папаев, Ӟаны:

— 50 арлэсь тросгес «Азьлане» газетлы гожтӥськиськом ни. Арнялы огпол гинэ лыктэ ке но, бамъёсыз тросгес луизы ни. Туж мыным кельше туспуктэмъёслэн трос луэмзы. Материалъёс но асьме калык ярысь трос печатласько, кызьы талы уд шумпоты. Но мон понна сыӵе материалъёс ӧжытгес. Лыдӟисьёс асьсэос но ӧжыт ке но мед гожъясалзы гуртооссы яке тодмооссы сярысь. Озьы ик дышетӥсьёс но ӧжыт гожъяло. Нош одӥгез — туала газетын критика уг тырмы. Котьку ваньзэсты ушъяса гинэ гожъян шонер ӧвӧл, дыр, со.

Тамара Данилова, Кӧргем:

— «Азьланелы» ми кема аръёс ӵоже гожтӥськиськом ини. Пинал дырысен район газетэз лыдӟиськом. Туж яратӥськом, витиськом. Азьло газетын бигер калык сярысь гинэ материалъёс потыло вал, нош али удмуртъёс сярысь но гожъяло. Газетысь тодмо адямиез адӟид ке, кыӵе шумпотыса лыдӟиськод ук со материалэз. «Азьлане» газет луэмен районысьтымы удмуртъёсын матысен тодматскиськом, ог-огмылы матын луиськом но кадь.

Полина Поликарпова, Кӧргем:

— «Азьланемы» туж кельше. Котьку витиськом, лыдӟиськом. Али газетын ини удмуртъёс сярысь трос материалъёс потылыны кутскизы, таиз туж шумпоттэ. Районамы кыӵе данъяськымон удмуртъёс гинэ ӧвӧл вылэм! Нош газетын валляна улон сярысь тросгес гожъясалды ке, удмурт гуртъёслэн кылдэмзы сярысь, эшшо но тунсыкогес луысал, дыр. Кылсярысь, милям Кӧргем гуртмы гинэ но азьло бадӟым гурт луэм, солэн трос данъяськымон адямиосыз луиллям... 

Римма Исьмекова, Вуж Турья:

— «Азьлане» газетэз дышетскем дырысеным лыдӟисько, одӥг сюрессэ но лыдӟытэк уг кельтӥськы. Воксё малпамтэ-утчаськымтэ шорысен кемалась ӧвӧл 1961 арлэсь выль ар номерзэ шедьтӥ (#1). Туж тунсыко, ортчем аръёсы мар луэмзэ лыдӟыны. Милям Турья гуртысьтымы кролик вордонын ужась Андреев Михаил сярысь ушъяса гожтӥллям. Ужаны потатэк юыса ветлӥсьёсты критиковать кариллям. Гожъясьлэн пероез туж лэчыт.

«Азьлане» газетэз азьло дырысен туж яратыса лыдӟисько, но малы ке но аслам гожъяны «кужымы» уггес тырмы, мылкыд вань гожъяны, но йӧны собыдӟагес-а, мар-а ини. Берло аръёсы редакциын удмурт журналист ужаны кутскем дырысен газетмылы удмурт шӧм пыриз, со туж шумпотымон. Газетэз азьвыл ик электронной вариантэн лыдӟисько, туспуктэмъёсын тунсыкъяськисько. Туж трос тодмоосты адӟисько, соослэн ушъямон ужъёссылы шумпотӥсько. Газета кельше, уг кельшы шуыны уг быгатӥськы. Азьпалан но тӥледлы азинсконъёс, чебересь статьяос гожъяны мылкыд карисько. Ӝоген мӧйыослэн праздниксы районысь вань кадь мӧйыосты праздникен ӟечкыласько, ваньзылы тазалык но кузь гумыр сӥзисько.