«Азьланеослэн» матысь эшсы

Ёросамы Василий Петровичез тодӥсьтэмез ӧвӧл, дыр. Кин сое дышетӥсен тодэ, мукетыз ёросысь удмурт калыклэн азьветлӥсеныз, усто гожъяськисен но кылысь кылэ берыктӥсен. Огъя вераса, аспӧртэмлыко но трос пумо быгатонлыкъёсын адями.

Василий Петрович Никитин вордске 5-тӥ гудырикошконэ (августэ) 1956-тӥ арын Карек-Серма гуртын. 1971-тӥ арын, Ӟаныысь 8 аръем школаез йылпумъяса, дышетсконзэ Ципья шоръёзо школаын азинтэ. Армилэн радъёсаз луэмез бере, 1977-тӥ арын, Елабугаысь педагогикая кун институтэ математика ӧръя заочной отделение дышетскыны пыре. Огдыре ужа но. Нырысь Сизнер покчиёзо школаын директор луэ, 1978-1979 аръёсы Турья гуртысь школаын ужа. Но ужан стажезлэсь тужгес бадӟым люкетсэ Василий Петрович вордскем гуртаз, Карек-Серма гуртысь покчиёзо школаын дышетонлы сӥзе. 2011-тӥ арын, гуртысьтызы школа борӟаськемен, Шор Кушкет шоръёзо школаын математикаен дышетыны кутске. Отын со 5 ар тырше 2016-тӥ арозь.

Василий Петрович — зэмос дышетӥсь, ас ужезлэн усточиез. Та сярысь солэн дышетскисьёсыз но верало, трос пумо Таукарон но Данъян кагазъёсыз но. Василий Никитин — РСФСР-ысь Дышетонъя министерстволэн, ТР-ысь Дышетонъя но наукая министерстволэн Данъян кагазъёсыныз пусйиськем дышетӥсь (Дышетонъя министерстволэн ёрос отделениеныз сётӥськемъёссэ уг но вераськы ни). Удмурт шаер нош Удмурт Элькунлэн Таукарон гожтэтэныз пусъем сяна, медален но данъяз али Василий Петровичез.

Паймемысь уг дугдӥськы мон солэн котьмаин тунсыкъяськись луэмезлы (аслыз но трос пол вераме вань). Сыӵе адямиос шер пумиськыло шуыса малпасько. Тодӥсько, уг яраты со ушъямез. Но данъямон ке адями, малы ушъянтэмез. Удмуртлыкез, удмурт кылэз но удмурт калыклэсь лулчеберетсэ, сям-йылолъёссэ утён но азинтон ӧрын тыршемез вылӥ дунъямон. Та удысын но вань сюлэмзэ сётыса тыршемзэ но трос пӧртэм Данъян но Таукарон кагазъёс юнмато.

Удмурт ужрадъёсты ортчытонын но Василий Петровичлэсь кичӧлтӥсь луэмзэ пусйыны кулэ. Кылсярысь, солэн кичӧлтэмезъя но ёросамы «Жингырты, удмурт кырӟан!» творческой конкурс радъяськыны кутскиз, «Гырон быдтон» удмурт калык шулдыръяськонэз ортчытон сям улӟиз. «Азьлане» газетлэсь 85 аръем юбилейзэ ортчытонын но валтӥсез кичӧлтӥсьмы со луиз. Василий Петрович мыло-кыдо пыриськылӥз но али ке но луонлык шедьыку пыриське йӧскалык лулчеберетъя пӧртэм фестивальёсы но.

Солэн кылысь кылэ берыктон быгатонлыкезлы луыса, район калык Габдулла Тукайлэн, Муса Джалильлэн  но Гарифзян Мухамметшинлэн кылбурет дуннеенызы тодматскыны быгатӥз. Берыктон ужез сярысь нимаз вераны кулэ. Та удыс Василий Петровичлэн улоназ нимысьтыз инты басьтэ — туннэ нуналэ «ВКонтакте» социальной вотэсысь «Удмуртский каждый день» усьтэм группа понна кылбуръёсты берыктыса дася. Тӥни озьы дано шутэтсконын луыса но, шутэтскемез уг поты та адямилэн, чик но тэк уг пукы, ялан маин ке тунсыкъяське, марлы ке вылезлы дышетскыны тырше.

Зоя Никитина, Карек-Серма гуртысь клубен кивалтӥсь:

— Василий Петрович мынам но валтӥсь юрттӥсе. Кыӵе ке ужрад ортчытоно луи ке, нырысь ик солы вазиськисько, солэсь кенеш курисько. Туж мыло-кыдо адями со. Кылем арын республикая комсомоллы сӥзем творческой конкурс ортчем вал. Отчы но мылысь-кыдысь пыриськиз но Кукморын ортчем ужрадын вормисе потӥз — дипломант луиз. Вань Карек-Серма гурт калык понна ӟеч уж лэсьтонлэн — Быдӟым оже пыриськем гуртоосмылы сӥзьыса синпелет лэсьтонлэн — кичӧлтӥсез но, та ужез радъясь но Василий Петрович луиз. Со понна вань гурт калыклэн нимыныз тау карисько солы.

Гажано лыдӟись эшъёсы! Ваньдэс сюлмысь ӟечкыласько вордскем кылын поттӥськись «Азьлане» газетмылы 85 ар тырмемен валче, сӥзисько юн тазалык, шудбур, ужады шумпотонъёс. Мед луоз «Азьлане» газетмы, мед улоз удмурт анай кылмы. Удмурт калык — тыршись, сабырлы, визьмо калык, мукет калыкъёслэсь номаин кулэс ӧвӧл со, соин ик асьмеос котькудмы данъяськыны быгатӥськом удмурт луэменымы.

Герӟалля, тодматэ асьмемыз

«Азьлане» газетмы — юлтошмы.

Жадьыса ке доре бертӥськом,

«Азьлане» ‡утъялля мылкыдмес.

Сю куасьмем кадь ялан витиськом.

Ас кылын поттӥськись газетмес.

Нуналысь нуналэ тунсыко

Иворъёс пуксьыло бамъёсаз.

«Кадырлы но мусо анай кыл —

Инмарен кылдытэм ваньбурмы!

Тӧлсяська кадь медаз пурӟиськы, —

Изьытэк сюлмаськон асьмелэн.

Нянь колды кадь ялан ‡ӧк вылын,

Ваньмылон дыръёсы лыдӟыны, —

Пайдаё кенешъёс басьтыны

Мед луоз «Азьлане» газетмы!

Тямыстон вить арес ни тыныд,

Яратон «Азьлане» газетмы!

Мамында ӟеч ужъёс тонэныд лэсьтэмын:

Ымнырдэ тон ӧд сапта ноеу калыкын.

Секытэсь аръёсы сётылӥд тон оскон,

Тонэныд (тыршыса ужасез тон ӧд кыль адӟытэк) данъямын ӟеч ужась калыкмы.

Огинэ тон возид ас удмурт калыктэ,

Нырулӥсь муртъёсты пуктылӥд пыд вылаз.

Весь азьлань но азьлань вамышъя улонмы,

Интыяд ӟеч ивор сётъяса мед улод на кема,

Табере витёмы ини сю ар тырмемдэ.

Ь..........................................................

«Азьлане» газетмы весь азьлань мед валтоз асьмемыз,

Родняос-удмуртъёс, газетлэн азьпалыз асьмелэн киямы.