Бельгы

Информаторъёс но ваньмыз одӥг сямен уг верало, но котьма ке но, верам пуштросэз одӥг. Люкам материалъя анализ ортчытэм бере, кылдӥз сыӵе суред: Бельгы ним пыремын бигер «бильге» шуэм кылысь. «Бельгы» бигер кылысь берыктӥське, «тодмо карем инты», «пус понэм инты». Бельгы интыним, информантъёслэн верамзыя, пумиськылэ асьме котырысь вань гуртъёсын. Шошма удмуртъёслэн вань кык шайзы. Одӥгез шай, кудаз ватэмын кулэм муртлэн лысьӧмез. Ватэм интызэ пусйиллям вашкала дыръя юбоен, нош али дыре пусъё киросэн но котырто чардакен. Нош кыкетӥ шай «символической», сӥземын ышем муртлы, куке уг шедьто солэсь лысьӧмзэ. Сыӵе йылол асьме калыкын гинэ ӧвӧл, научной аббревиатураез солэн «кенотаф» (грек кылысь лысьӧмтэк символической шайгу шуыса берыктыны луэ). Ышем муртлэн ӵыжы-выжыосыз, со кулэм, дыр, ини шуыса, Бельгы интые потыса пус (бельгы) поно киросэн я юбоен. Со интые нош ватыны но быгато ышем муртэн гер€ам арбериосты. Ветлӥллям буре вайыны отчы мӧйыос но шоро-куспо арлыдъемъёс. Егитъёс Бельгые со аръёсы ветлымтэзы. Соос шулдыръяськыны Семык возь вылэ ветло вылэм. 1960-тӥ аръёсы, Семык возь 1958-тӥ таркаськем бере, Бельгы интылы матэгес интыяськыса, юмшаны кутскиллям. Бельгы шулдыръяськонлы пӧрмыны кутскем 1960-тӥ аръёсысен гинэ. Со дырозь отын кӧтӝожзэс вераллям-бӧрдӥллям. Кылдэмын та йылол одно ик туж кемалась. Ку кылдэмез тодмо уз луы ини. Али дыре та йылол кылемын кык гуртын: Сырья но Турья Починка (Карек-Серма) гуртъёсын. Кукмор ёросын но сыӵе йылол ортчытӥллям, нош кызьы со нимаськем, вераны ӧз тодэ. Сыӵе йылолъёс отын вунэмын ни. Дыръёс ортчо, одӥг поколение воштэ мукетсэ, йылолъёс сурасько но вуно.

Алексей Шмелёв