Бурбаше ачиз лыктыны ӧз быгаты, оло, ӵыжы-выжыосыз куке но вуозы

Атаез Терекул Айтматов - киргизъёс пӧлысь одӥгез нырысетӥез коммунист. Чингизлэн анаез - Нагима Габделвалиева - со палъёсын шӧдскымон тодмо луэм вузчилэн бигер байлэн Хамзи Габделвалиевлэн нылыз, бигер но киргиз нациосты огазеясь кышномурт, киргиз но ӟуч кылъёсын классической произведениосты гожъясь писателез утем-вордэм анай.

1938-тӥ арын Терекул Айтматов репрессия улсы шеде. Чингиз анаеныз ӵош Каракул городын Хамза бабаезлэн юртаз 2 арлэсь трос уло.

Берлогес, быдэс дуннелы тодмо, дано гожъяськись луэмез бере, Чингиз Айтматов вань адӟемъёссэ, калыклэсь но нимаз адямилэсь секыт улонзэ аслаз произведениосаз возьматоз. Со гумырыз ӵоже бигер калыкез гажамзэ уг ваты.

2008-тӥ арын тулыс, май толэзе, Казане лыктыкуз, Чингиз Терекулович Кукмор районысь анаез паласен кыдёкысь бабаез улэм Маскара гуртэ вуылыны дасяське, Балтась районысь Бурбаш гурт калык но сое соку чидатэк вите. Но... 16-тӥ мае витёнтэм шорысь секыт висён сое Казаньын дыръяз пыд йылысьтыз погыртэ. Германиысь больницае лэзён но осконэз уг зэматы. 10-тӥ июне гожъяськисьлэн сюлэмыз йыгаськемысь дугдэ.

Малы асьме палъёсы вуись гожъяськисьлэн нырысетӥ дугдон интыез Бурбаш гурт луыны кулэ вал меда? Мугез валамон - быдӟым гожъяськисьлэн анаез паласен кыдёкысь бабаез ӵапак Бурбашысь луэм ук. Бурбаш гурт калык 1675-тӥ арын ватэм, улон нюжаез Чингиз Айтматовен герӟаськем Туктаргали бабайлэсь шайгу вылысьтыз иззэ кадырласа возё. Туктаргалилэн 2 пиез, Бурбаш гуртысь кӧчыса кошко но дано Маскара гуртэ интыясько.

Туннэ нуналэ Бурбаш гуртын улӥсь ог 80 семьялэн выжы нюжаосыз Туктаргали бабаен герӟаськемын, соос 9-тӥ но 10-тӥ поколение луо ини. Районын тодмо луэм Зялиль хазрат но солэн выжыысьтыз. Со али выль усьтӥськем школаязы гуртлэсь музейзэ кылдытон малпанэн ветлэ. Люкаськем синпель экспонатъёс, тодэ ваёнъёс гожъяськисьлэн выжы нюжаосаз вуттозы шуэм оскон Зялиль хазратэз выль утчаськонъёсы бурдъя. Азинсконъёс солы!