Дышетскисьёслэн кыкетӥ анайзы

Дышетӥсь, педагог, кык визьмо нылъёслэн анайзы, мерлыко ужъёсын мыло-кыдо вырись но удмуртлыкез азинтон сярысь сюлмаськись кышномурт, огъя вераса, синмаськымон адями — ваньмыз та Артемьева Наталия Михайловна сярысь.

Вордӥське Наталия Михаловна 28-тӥ инвожое 1973-тӥ арын Арча ёросысь Сурнарской лесничествоын удмурт семьяын. 1975-тӥ арын атайзэ Малмыж ёросэ ужаны ӧтё, Плотбище посёлокын улон инты сёто. Со дырысен Исаевъёслэн семьязы Плотбищеын улыны кутске. 

— Наталия Михайловна, малы дышетӥсь луыны малпады но малы одно ик математикен дышетӥсь? 

— 1980-тӥ арын 1-тӥ классэ мынӥ. Милемыз дышетӥз Евгения Савельевна. Со пенсиын дышетӥсь вал ини, кызьы ӟучъёс шуо, «человек старой закалки». Мон паймисько вал, аляк улӥсь нылпиос гинэ но солэн уроказ шып пукылӥзы. Соку мынам малпан кылдӥз, сыӵе адямиослэсь нылпиос кылзӥсько шуыса. Мынам но со кадь луэме потӥз. Соин, дыр, мон дышетӥсьлэсь профессизэ бырйи. Мон малпай, дышетӥсь луи ке, монэ но сыӵе гажалозы, верамме санэ басьтозы шуыса. Нош математикалы яратонэ атаелэсь, дыр. Со но математикаез туж яратэ вал. Математикая урокъёсты но соин дасясько вал.

— Улон тӥледыз Балтась ёросэ Улын Ушма гуртэ, Покчи Лӧзя школае вуттэ. Та сярысь но вералэ вал.

— 1990-тӥ арын школаез йылпумъяй, одӥг ар ужай артэн гуртысь школаын, пионервожатой но историен дышетӥсь луыса. Собере пыри Киров улосвылысь педагогикая Орловской училищее. Отын куинь ар дышетскыса, покчи классъёсты но математикая дышетӥсьлэсь ӧнерзэ басьтӥ. 1994-тӥ арын Покчи Лӧзя шоръёзо школае ужаны пыри, нырысь ужай интернатын, дышетӥ историез. Собере 1995-тӥ арын 1-тӥ куарусёнэ монэ басьтӥзы Улын Ушма покчиёзо школае ужаны. 2016-тӥ арозь ужай отын. 2016-тӥ арысен Покчи Лӧзя шоръёзо школаын математикаез дышетӥсько. Быземын Улын Ушма гуртэ. Огъя вераса, улонэ но, уже но та кык гуртэн герӟаськемын.

— Тросэз понна математика секыт предмет, со ваньмызлы капчиен уг сётӥськы угось.

— Математикаез дышетыны тужгес но секыт, малы ке шуоно нылпиослэн малпаськемзы уг поты, гожъямзы уг поты, уноез шуо: «Трос гожъяны кулэ тӥляд урокъёсады». 5-6 классъёсын дышетскисьёс гожъясько, дышетско ке али, 7, 8, 9 классъёсын пиналъёслэн гожъяськемзы уг ни поты, азьтэмъяськыны кутско ни. Но али тани 5-6 классъёсын дышетскисьёс пӧлын но шӧдӥське ини, трос телефонын пуко шуыса, асьсэлэн малпаськемзы уг поты нылпиослэн.

— Ма понна уждэс яратӥськоды?

— Школаез мон яратӥсько соин: татын нылпиосын кусып возён вань. Нылпиосын ужаса, аслэсьтыд арлыд люкамдэ но уд шӧдӥськыд, нылпиос кадь ик астэ егит шӧдӥськод, мылкыд пиналъёслэн кадь возиське.

— Дышетӥсьлэн ужез туала дыре но востребованной шуыса малпаськоды-а?

— Дышетӥсьлэн ужез, котьма ке но, востребованной, дыр, шуыса малпасько мон, малы ке шуоно адямиосын кусып возён кулэ котьку но. Мазэ веранэз, туннэ нуналэ туж трос информация интернетын вань, видеоурокъёс но учко нылпиос, интернет пыр но дышетско, но традиционной формаен дышетсконлэн аслаз аспӧртэмлыкъёсыз.

— Наталия Михайловна, математикаен дышетэм сяна, тӥ эшшо классэн но кивалтӥськоды. Шонергес луоз, дыр, ини табере кивалтӥды шуыны. Тӥляд туэ выпускной класс, нылпиосты 11-тӥ классэз йылпумъязы, али дыре экзаменъёсты сёто. (Ваньзылы умой гинэ сётыны мед кылдоз). Кӧня кузя соос тӥляд? Кызьы тӥ малпаськоды, классэн ужанын тужгес секытэз ма луэ?

— Та классэ мынам нырысетӥ выпуске луэ. Мон Ушма школаын ужакум али, 2014-тӥ арын соосыз 2-тӥ классысен басьтӥ. Собере соосын ӵош Покчи Лӧзя школае лыктӥ, 5-тӥ классын но та классэн ик кивалтыны оскизы. 11 классэз соос 6 кузя йылпумъяло: вить ныл но одӥг пи. 

Нош классэн кивалтон сярысь верано ке... Классэн ужаны табере малы секыт? — Нылпиослэн номыр каремзы уг поты. Соосыз тунсыкъяськытыны секыт. «Малы со кулэ?» — пиналъёслэн яратоно веранзы. Анай-атайёсты но ӝутыны, дорысьтызы поттыны туж секыт. Азьло анай-атайёс шумпотыса школае лыкто вал, малпанъёссэс, ӵектонъёссэс верало вал. Огъя вераса, шуг-секыт со бордын.

— Асьтэ нылпиостылы, выпускникъёстылы, ма сӥзьысалды?

— 11-тӥ классэз йылпумъясь нылпиосылы мынам сӥземе потэ нырысь ик тазалык, шудбур но ваньзэ умойзэ. Огъя кун экзаменъёсты умой мед сётозы но улонын шонер сюрес мед быръёзы, ӟеч адями мед луозы.

— Дышетон, классэн кивалтон сяна, общественной ужен но выриськоды, СВО-е пыриськисьёслы пӧртэм юрттэт люканэз радъяськоды. Со сярысь но вералэ вал. 

— Общественной ужъёсы пыриськыны тыршисько. СВО кутскем бере волонтёр луыса ужай. Жаляса верано, котьку но дыр уг тырмы. Но быгатэммыя юрттӥськомы: школаысь нылпиосын но, ачим, асьме семьяен но. 

Хисматуллин Айдар Покчи Лӧзя школаын дышетскемын. СВО кутскем бере вазиськиз со милемлы юрттэт курыса. Со бордысен кутскиз милям ужмы. Мон, оло, соин пыриськи но, дыр: мынам аслам но двоюродной, троюродной вынъёсы, племяннике СВО-е пырисько. Соин но мынам соослы юрттэме потӥз, дыр. Мон валасько ке, адямилы юрттыны быгатӥсько шуыса, мынам юрттэме потэ но мон маин быгатӥсько, соин юрттыны тыршисько. 

— Удмурт кылэз, лулчеберетэз, огъя вераса, удмуртлыкез азинтон сярысь но сюлмаськиськоды шуыса тодӥсько.

— Плотбище посёлокын удмурт семья ми гинэ вал. Та шорын анай-атайлы тау шуэме потэ, милемлы удмурт кылэз дышетӥзы шуыса. Удмурт кылэн вераськиськомы (сузэре вала, но уг вераськы). Пичи дыръя Сизнер гуртын ӵужанай-ӵужатай дорын, Кушкетын песяй дорын улӥмы. Отын, удмурт нылпиосын шудыса, ми удмурт кылын вераськыны дышимы, волятӥмы, дыр. 

Ушма школае ужаны лыктыку, удмурт кылъя но литературая урок вал. Екатерина Денисовна мыным вераз: «Тани тыныд книга, тани тыныд нылпи — дышетскы, со тыныд кулэ луоз». Тау кылъёс верам потэ солы, со монэ дышетӥз, секыт дыръя котьку юрттӥз.

Удмурт этнокультурной компонентэн школаын ужасько бере, пӧртэм ужрадъёс ортчытыкузы мынам палэнэ кылеме уг поты. Нылпиос ӟучомемын ини, удмуртэн туж вераськемзы уг поты, соин математика урокын но удмурт элементъёс пыртыны тыршисько, сям-йылолъёсын тодматэме потэ, внеклассной ужрадъёсын но ми туж трос удмурт ужрадъёс ортчытӥмы. 

Одӥгез тужгес бадӟымез но масштабноез со, конечно, Анна Самсоновалэн #будудмурт проектаз, удмурт егитъёслэн «БиГерд» форумазы пыриськон. Со ужрадъёсы пыриськыса, мынам удмуртлыкез азинтон мылкыды эшшо но ӝутӥськиз.

Кузпалэным кык нылъёсты будэтӥськом. Нылъёсмес но удмурт кылэз гажаны дышетӥмы, дорын но атайзы соосын удмуртэн гинэ вераське, ӟуч кыл воксё уг поты куспазы. Соин но, дыр, нылъёсмы кыкназы но удмурт кылэз котьку гажазы, яратӥзы. Дышетӥсьсы но, Ольга Мироновна, соослы ялан мылкыд сётыса улӥз, олимпиадаосы ветлӥзы, пӧртэм конкурсъёсы пыриськизы, котьку призёръёс, вормисьёс луизы. Али Настя нылмы дышетске КФУ-ысь Международной отношениосъя институтын культурологияя факультетын, туэ 3-тӥ курссэ йылпумъя. Даша нылмы 11-тӥ классэз йылпумъя.

— Вераськемды понна бадӟым тау, Наталия Михайловна! Сӥзисько тӥледлы котькуд тыршем удысады азинсконъёс, дышетэм нылпиосты но вормонъёсынызы шум мед поттозы!