Хезмәт

«Егитъёс частной поликлиникаосты быръё»

Туннэ кыӵе ӧнерен ужасьёсын вераськид ке но: «Та поколениысь адямиос кошкизы ке, соос интые кинъёс кылёзы но, кинъёс лыктозы меда?» шуэм сюлэмшугъяськытӥсь малпанэз кылӥськод.

Интыё сюлмаськон. Туннэ тодон-валан, ӧнер сётон системаын сураськонъёс, тырмымтэос дипломен специалистъёслэн тодон-валанзылы, дасьлыксылы но осконтэмлык кылдыто ук. Нош вераськон тазалыкез утён система сярысь мынӥз ке, тужгес но. Таин валче ми та пумысен районысь центральной больницалэн валтӥсь врачезлы Газинур Давлиевлы вазиськимы.
- Районамы та ӧнерез бырйисьёс, пӧртэм городъёсын вылӥ дышетскон юртъёсын врач луыны дышетскисьёс трос. Но, туж жалямон, дышетскем егитъёслэн одӥгезлэн но гуртэ бертэмез уг поты, перспектива ӧвӧл шуо, дыр. Семья кылдытыса, городэ кылисьёс но трос. Куд-огъёсыз мынам нейрохирург луэме потэ шуо, нош татын таӵе специалистлы штат но, луонлыкъёс но ӧвӧл. Озьы ик, кардиохирургиез бырйисьёс но районэ бертыны уг быгато. Солэн мугъёсыз трос пӧртэм. Кылем арын, кылсярысь, туж перспективаё, тодӥсь-валась одӥг хирург бертэм вал. Луонлыкъёс но кылдытӥмы, опытэн хирургъёс но туж мылкыд карыса, асьсэ пӧлазы кутӥллям, пациентъёс но матын карыса, яратыны вутскиллям вал но, жаляса верано, город со пимес ас бордаз кыскиз. Соин ик хирургъёслэн проблемазы ализэ шара кыле. Шонер, асьме дорын врачъёсын проблема бадӟым шуыса ӧй верасал. Кылсярысь, огъя практикая врачъёс дас вить участокын ик вань, офтальмолог, лор, кардиолог но вань. Туэ одӥг дерматовенерологез, кык педиатрез витиськомы. Сое но вераны кулэ, бертыны мылкыд карем куинь специалистлэн кыкез Кировысь. Трос аръёс ӵоже асьме дорын ужаса, Казане кошкем нылпи врач Динара Максутовна берен бертӥз, умой специалист, ми талы шумпотӥськомы гинэ.
Табере одӥг системаын но ужаны капчи ӧвӧл, дыр, ини со. Ми дорын но романтикалы инты ӧвӧл. Врачъёс ужан чассы быдмыку пызьыртэм лимон кадь луо, соос шутэтсконысен но тодон-валанзэс ӝутонысен гинэ кужым люкаса берто. Висёнъёс но секыт луизы - эмъянлы чаль гинэ уг сётско, кагаз-документация уж но трос, диспансеризация, медосмотр ужез ӝегато. Али кемалась ӧвӧл гинэ сюрслэсь уно ветеранъёсты эскеризы, солэсь азьлогес 6000 нылпилы медосмотр ортчытӥллям вал - таос ваньмыз но дырен герӟасько ук. Висисьёс пӧлын тупамтэос трос луо, куара-даллашон. Кошкыны интызы луымтэысь гинэ чидась врачъёсмы вань. Мед кошкозы, мукетъёс бертозы шуыса, вераны но уг луы. Та кылъёсты ӝожтӥськон шуыса медаз малпалэ, егитъёслэсь государственной больницаосы лыктыны мылкыд карымтэзэс гинэ возьматэме потэ. Нош частной поликлиникаосын соос кӧня ке час ужало но трос уксё басьто. Егитъёсты тӥни со тунсыкъяськытэ.
Фото: http://titan-clinic.spb.ru/novosti/klinika-titan-klinika-goda.html

Реклама

Теги: 250
Нравится
Поделиться:
Реклама
Комментарии (0)
Осталось символов: