Эшъяськон юнма

Киров улосысь, Марий Эл но Татарстан республикаосысь нылпиослэн огъя праздниксылы пӧрмем та ужрад туэ Балтась музъемын ортче. Ог ӝыны даур талэсь азьло кутскем эшъяськон улэмъя юнма, улосъёс куспысь экономической, политической нюжаосын шара адске. «Эшъяськон тылскем» куинь республикаысь нылпиосты огкадь шунтэ, огмылкыд сётэ.

1966-тӥ арын Киров улосысь Ральник гуртын нырысетӥзэ «Эшъяськон тылскем» ӝуатске. Но ужрадлэн кичӧлтӥсез Ципья шор ёзо школаысь пионервожатой Фарт Гильманов луэ. Озьыен, нырысетӥ тылскемез «асьмелэн» шуыса вераны правомы вань. Нырысетӥ слётын дышетскисьёс, ог-огенызы тодматскыса, куспазы сувениръёсын вошъясько, спортивной ужрадъёсын кужымзэс эскеро, самодеятельной искусствоя конкурсэ пырисько. Кыкетӥез слёт Ципья гуртын ортче. Таиз тылскем тросэзлэн Фарт Гильмановлэн кивалтэмез улсын кырӟанъя но эктонъя ансамбльлэн выступлениеныз тодаз кыле. Куинетӥ тылскемез Марий Эл Республикаысь Арбор гуртын ӝуато. Со, МАССР-лэн 50 ар тырмонэзлы сӥземын луыса, «Пиштэ, Ленинлэн кизилиосыз!» шуэм девиз улсын ортче.

Тӥни со дырысен ини нылпиослэн, дышетӥсьёслэн, куинь республикаысь калыклэн эшъяськон кусыпъёссы юнмало. Пиналъёслэсь эшъяськонзэс мӧйыос азинто. «Эшъяськон тылскеме» пыриськись нылпиослэсь пальпотӥсь, шудо ымнырзэс адӟыса, ас эрказ улонысь сюлмаськонъёс вуно, шугъяськонъёс ӧвӧллы потэм кадь луо.

Туэез слёт пиналъёслэн организацизылэн - 90, Быдӟым Вормонлы 69 ар тырмонзылы сӥземын. Дышетскисьёс «Ӟечлыклэн планетаез» шуыса нимаськем творческой ужын кужымзэс эскеризы, «Эшъяськон Олимпиадае» пыриськизы.

Ужрад арысь аре умояса, пӧртэм ужан амалъёсын узыртӥське. Эшъяськон гинэ воштӥськытэк кыле. Со пиналъёслэн сюлэмъёсазы ӟырдыт ӝуа. Озьы гинэ мед луоз. Эшъяськон тылскем ноку медаз кысы. «Дуслык», «Эшъяськон», «Дружба», «Кельшымаш» кылъёс котьку данлы мед чузъяськозы.