Фольклоръя книга поттэм… физик

Соглаш луоды, дыр, котырамы паймымон но синмаськымон адямиос туж трос. Балтась ёросысь Сырья гуртын вордскем но будэм воргорон Леонид Сапожников но сыӵеос пӧлысь одӥгез луэ. Трос ӧнерез тодӥсь, одӥг интыын пукыны быгатӥсьтэм, ялан утчаськыса улӥсь, ассэ пӧртэм ӧръёсын эскерем, туж тунсыко, калыксэ гажась сюлэмо мурт.

Со физикаен-математикаен-информатикаен вылӥ тодон-валанэн дышетӥсь. Армиын служить карыса ёросысь Шор Кушкет шоръёзо школаын куать ар нылпиосты дышетэмез бере, сое вордскем гуртаз усьтӥськем школа-нылпи сад комплексэ директоре тодмосто. Со сяна, кык ар ӵоже азьло интыяз ветлыса ужанзэ но азьланьтэ на ай. Но каньылэз тодӥсьтэм мылкыдыз мае ке но выльзэ утча: 2000 арын, вить гектар музъем басьтыса, «Оскон» шуэм КФХ радъяса, турын будэтыса, вузаса, пудо вордыса, ас ужзэ кутске. Но, жаляса верано, со сӥльлы кулэяськон бырон, дунъёс усён дыръёслы тупа. 2002 арын, вань Казанез котыръяса, сӥльзэ вузаны инты уг шедьты но та ужлэсь куштӥське (озьы ке но сое 2008 арозь кыске али). Оскон шуонэз, оло, ӧй но кысысал, дыр, но, аслаз верамезъя, «школаысь кошкыса но, одӥг пыдыныз отчы кылем» воргорон вала, та уж солэн ӧвӧл шуыса. 2016 арозь школаын удмурт нылпиослы бигер кылъя тодон-валан сётэ.

Ёросын 1992 арын удмуртъёслэн йӧскалык огазеяськонзы кылдэ. 1997 арозь та организациен «Азьлане» газетлэн со дырысь редакторез Александр Кунаев кивалтэ. Со аръёсы Александр Михайлович газетын ёросысь удмуртъёслы вазиськон поттэ: калыклэсь кылан-буранзэ люканы ӧте. Кызё котыр арлыдо адямиос асьсэлэсь тодэм кырӟанъёссэс, сям-йылолъёс сярысь газетэ гожтыса келязы. Леонид но палэнэ уг кыльы: та ужпумъя туж малпаськытӥсь бадӟым статья гожтэ. «Ойдолэ, та люкам узырлыкмес книга карыса поттомы. Вуоно поколениослы но мед кылёз», — шуэ со. Гожтэмез бере кема дыр уг ортчы, сое ассэ «Кенеше» кивалтӥсе тодмосто. 20 ар кивалтэ та организациен каньылэз тодӥсьтэм Леонид Дмитриевич. Со дыр куспын йӧскалык сям-йылолъёсты улӟытон, поколениослэсь кусыпъёссэс юнматон ӧрын трос ужаське. Гырон быдтон праздникез республикая вӧлмытонын но солэн люкетэз верантэм бадӟым. 8 ар радысь сое ёросын ортчытыса, арысь аре уногес куноослэн пыриськеменызы радъяса, мукетъёслы но пример возьматӥзы. Черодэзъя котькуд ёросын ортчытонэз радъяны быгатӥзы.

«Фольклор книгаез дасяломы» шуыса вазиськеменыз гинэ уг дугды, ачиз саесъёссэ пужалляса басьтӥське со уж борды Леонид. 1997 арысен 2019 арозь кужмо уж нуэ. Шошма удмуртъёслэн кылоссылы, этнографилы, сям-йылолъёслы сӥзем; Балтась, Мари-Турек, Малмыж ёросъёс, Кукмор ёросысь Лельвиж гурт – огъя ньыльдонлэсь трос удмурт гуртъёсысь калык лулчеберет мерасэз люкам туж узыр, 900 котыр туспуктэмъёсын чебермам (пӧлазы одӥг даур талэсь азьло уськытэм туж дуноосыз но вань), 752 бамен книга печатлаське. Зэм, али со дас экземплярен гинэ. Ёросамы но Ижевскын сое ӵектон ӝытъёс но ортчизы. Котькытын книгалы вылӥ дунъет сётӥськем. Ижевскысь этнография тодосчиос та книга дунлыкез ласянь кун премиен пусйымон шуыса шумпотто. Леонид, трос пӧртэм конкурсъёсы пыриськыса, кык грант утыны быгатэм: ТР-ысь Дышетонъя министерствоен радъямаз 250 сюрс манет тыр, Финляндиын радъямаз 4 сюрс евро. Та грант коньдонэн 12 сюрс экземплярен книгалы кык аудио, кык видео гожтос ужам. Книга 3 сюрс экземпляр тиражен ке потӥз, котькуд книгалы аудио но видео гожтэмъёс но ватсаськозы. Али книгаез поттон луонлыкъёс бордын ужало.

Берло аръёсы Леонид вордскем гуртаз клубен кивалтэ. Та удысын но со кемалась ас адями луэмын ини. Гуртысь фольклор ансамбленызы трос пӧртэм конкурсъёсы пыриськыса, призо интыос басьтыло.

Шонер наукая дышетӥсьлы йӧскалык ваньбурез, анай кылэз сюлмысь яратон мылкыд кытысен пыӵам шуыса зэмзэ но паймымон. Нош со уг паймы: солэн сюлмыз удмурт кыллэн гинэ ӧвӧл, нош огъя анай кылъёслэн бырон калэ вуэмзы пумысен висе. «Милям Сырья гуртмы котьку но тужгес чылкыт удмурт кылын вераськись гуртэн лыдъяськиз. Берло аръёсы пор кенъёсмы уно луизы. Соос ведь милесьтым кылмес уг тодо, соин семьяосазы ӟучен вераськисьёс адскыны кутскизы. Нылпиоссы но ӟучен верасько. Нылпи садэ но школаын удмурт кылэз дышетскымтэ визьнодасьёс лыктӥзы. Тӥни озьы милям но туннэ удмурт кылмы кухняын гинэ вераськоно кыллы пӧрме ини. Азьло школаын удмурт кылэз трос дышетӥзы. Солэн пайдаез трос вал. Туннэ нуналэ кадь арняяз одӥг-кык час гинэ дышетыса, нылпиослэсь тунсыкъяськонзэс но яратонзэс улӟытыны уг луы», — сюлмаське со.

Леонидлэн эшшо одӥг сюлэмшугъяськонэз вань: кӧня ветлыса но, Татарстанлэн, Удмуртилэн Президентъёссылы гожтэтъёс гожтыса но, ёросысь но бускель ёросъёсысь удмуртъёслы анай кылын телепередачаосты учкыны луонлык кылдытыны ӧз пӧрмы. «Цифровой телевидение вуиз шуыса шумпотӥськомы. Но отын 1000 программаос пӧлын но одӥг гинэ но удмурт кылын передача ӧвӧл. Оло Анай кылъёслэн аразы кыӵе ке воштӥськон луоз?..» — шуыса оске Леонид Дмитриевич.