Хезмәт

Капчиез — ӝӧк вылын

Кемалась ӧвӧл коллегаосынымы Улын Ушма гуртысь фермае ветлӥмы. Фермаын ужасьёс милемыз мыло-кыдо пумитазы но, трос ужзы шоры учкытэк, милемын вераськыны дыр шедьтӥзы.

— Уж ноку но уг быдмы ведь со. Мае ке йылпумъяд ке, кыкетӥ уж кылдэ, сое быдэстӥд ке, тонэ куинетӥ уж вите ини, — пумитаз фермаын скал кыскись луыса ужась Ираида Михайлова.

Ираида Александровна Улын Ушма гуртысь фермаын 2007-тӥ арысен ужа вылэм. Вордскемын со Ярак-Чурма гуртын, туннэ нуналэ улэ Покчи Лӧзя гуртын. Егит дыръяз сизьым ар ӵоже Ираида Александровна редакциысь типографиын ужам, собере кӧня ке ар ӵоже Бадӟым Лӧзя 1-тӥ люкет гуртысь фермаын кунянъёсты сюдэм.

— Лӧзяе мон огдырлы гинэ ужаны интыяськиськем вал, кӧня ке толэзьлы шуыса гинэ. Но озьы ик отчы ужаны кыли ини. Соку фермае ужаны кылеме сярысь мон ноку но ӧй жаля, малы ке шуоно та уж мыным сюлэмея луиз. Со сяна, редакциын со дыръёсы ик кулэстон но луиз. Огъя вераса, ваньмыз кулэезъя радъяськиз. Лӧзя фермаын но, типографиын кадь ик, сизьым ар ӵоже ужай, собере ини татчы ужаны лыктӥ.

Дас ньыль ар ӵоже Улын Ушма гуртысь фермаын скал кыскись луыса ужа ини Ираида Михайлова. Ужзы соослэн сменаен радъямын. Кулэ луиз ке, кивалтэтсы шутэтскон нунал но сётэ, пе, уждунзэ но дыраз тыро, юртто но вылэм. «Яра али ферма вань, яра али колхоз вань шуыса шумпотыса улӥськомы ини. Гуртын сотэк нокызьы но уг луы ведь. Тросэз гурт калык понна ужан инты ук со», — малпанъёссэ шара вера скал кыскись.

Ираида Александровналэн кузпалыз но, Юрий Петрович Спиридонов, «Сурнай» обществоын ужа вылэм, со — машина нуллӥсь. Быдэс гумырзэ Юрий Петрович колхозын тырше.

Кузпалъёс кык нылпиосты будэтӥллям — Надеждаез но Андреез. Туннэ нуналэ кыксы но соос Казаньын уло. Надеждалэн аслаз семьяез вань ини, кык нылъёсыз будо. Андрей пизы полициын ужа.

Кузпалъёс доразы но пудо вордо. «Пудо пушкын улэм бере, соосты туж яратӥсько. Соосты утисько бере, скалъёс но монэ ярато. Скал кыскыны но мыным кельше. Сомында ар ужам бере, та удыслэсь ас секретъёссэ но тодӥськод, шуг-секытэзлы но дышиськод, чурыт график но сокем секыт уг йӧты ини, — шуэ Ираида Александровна. — Ӵапак пудоосты яратэмысь, дорын но скалъёсты вордӥськомы. Пудоосты яратыны кулэ, соосын мукет сямен уг луы. Соос улэпесь ук, ваньзэ шӧдо, валало. Тани мыным, кылсярысь, фермаын но аслам скалъёсы чебергес но, мусогес но пото. Дорысьёсыз сярысь веранэз ӧвӧл ини».

Скал кыскисьлэн пудоосты яратэмез адскиз — вераськонмы куспетӥ Ира апай скалъёсыз шоры учкыса, соосты маялляса яратӥз. 

— Егитгес дыръя трос маин тунсыкъяськисько вал. Али но куддыръя керттӥськисько. Но арес мынэмъя, мыл уг поты ини маин ке вырыны, дыр но котьку уг луы. Тани таос вань бере, мукет номыр но кулэ ӧвӧл кадь, — шуэ со пальпотыса.

Зэмзэ верано ке, Ираида Александровна кадь ужзэ яратӥсь адямиосын тодматскыны, вераськыны туж шумпотымон. Скал кыскисьлэн ужез туннэ нуналэ шӧдскымон капчиёмиз ке но, солэн аслаз шуг-секытъёсыз вань. Со шуг-секытъёс шоры учкытэк, кема аръёс ӵоже фемаын ужась нылкышноос гажамон. Тужгес шумпотымон, «Сурнайын» сыӵе гажамон но адӟем карымон скал кыскисьёс ӧжыт ӧвӧл.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: