Карелиноысь амбулаториез тупатон понна 2 миллион манет гинэ уг тырмы

Ильнур, 16 апрель 2014 - 16:52

1225

Берло аръёсы районамы республиканской программа чотын трос медициная учреждениослы ремонт лэсьтэмын ини.

Та уж туэ но азинтӥськоз. Балтасьысь центральной больницалэн валтӥсь врачезлэн Газинур Давлиевлэн верамезъя, туэ 10 фельдшер-акушер пунктэз ремонт карозы. 8-аз ужъёс йылпумъямын ини. Субаш гуртын выль модульем ФАП усьтӥськоз. Нош тужгес шумпотымонэз: туэ Карелиноысь амбулаториын ремонт ужъёс кутскизы. Та ужез «Стройград» организацилы оскизы. Туннэ нуналэ укноосты воштонъя ужъёс йылпумъямын, ӝоген липиськон ужъёс но быдмозы.

- Собере пуш ужъёс борды кутскомы. Шунтон системаез воштыса, канализация но ву трубаосты выльдомы, - шуэ организацилэн кивалтӥсез Наиль Сафиуллин.

Программая висъяськем 2 миллион манет уксё амбулаториез быдэсак тупатъяны уз ке но тырмы, ремонт ужъёс кутскемын. Со туж кулэ. Шӧтэм юртэ пыремен валче пинь но висемысь дугдэ вал. Карелиноысь амбулаториын ремонт липет, укно, шунтон системаез воштонэн гинэ уг йылпумъяськы. Вуоно аръёсы, программае пырыны луиз ке, вӧлдэт, выж, борддор но ремонт каремын луозы, шуо кивалтӥсьёс.