Котькуд гуртлэн аслаз ӝожтӥськонэз, аслаз данъяськонэз

Гондыргуртлэн лымшорпалаз Гондыр шурлэн бурпал ярдураз интыяськемын. XVlll-тӥ даурлэн кыкетӥ ӝыныяз Бадӟым Лӧзя гуртысь кӧчыса кошкемъёс нэгыз понӥллям. XIX-тӥ даурлэн нырысетӥ ӝыныяз Казань губерниысь Казань уездлэн Апазово волостяз пырем, «Починок Ярак-Чурма» шуыса ветлытӥськем. 1920-1930-тӥ аръёсы Арча кантонлэн Балтась волостяз пырем, 1930-тӥ арысен Балтась районлэн составаз пыре. 1919-тӥ арын сельсовет, 1931-тӥ арын М.Горький нимо колхоз кылдэм. Али дыре Шубан гурт поселение, «Алга» обществое пыре.

Балтасьлэн уйпал-шундыпуксён висказ (северо-запад) 8 иськеме, Шушмо шурлэн паллян притокез луэм Гондыр шур дуре интыяськем гурт. Гуртлы нэгыз понӥллям Бадӟым Лӧзяысь кӧчыса кошкем пӧйшуранэн вырисьёс. Отын улӥсьёслэн уноез Лӧзя воршудэ пыриллям. 1750-1800-тӥ аръёсы крашине пыриллям, гуртын улӥсьёс музъем ужанэн, муш утёнэн, гынсапег погыллянэн, пӧйшуранэн выриллям. 1919-тӥ арын Гондырево сельсовет, 1930-тӥ арын нырысетӥ колхоз («Ядро», 1935-тӥ арысен «Выль сюрес») кылдэм. 1919-1960-тӥ аръёсы Гондырево сельсоветлэн центрез. Али дыре Шубан гурт поселение но «Алга» обществое пыре.

Ми, пичи гуртъёсын тодматсконмес азинтыса, Гондыргуртэ но Ярак-Чурмае сюрес кутӥмы. Шубан гурт поселение пырем та гуртъёсын ваньзэ 64 хозяйство лыдъяське.

Гуртлы быдэ одӥг ке но тодмоед луон умой ини. Район газетлэн редакцияз ужасьёсын Гондыргуртэ лыктэм бере ик нырысь тодмомы, азьло редакциын ӵош ужам Александр Петров доры пыримы.

- Улонтэм ӧвӧл ми палан. Вуэз но, возез но, нюлэсэз но вань. ӝыны даур талэсь азьло аръёсын ӵошатыку, гурт шӧдскымон пичиёмиз ке но, али чаль гинэ уз быры. Берло аръёсы егит семьяос юрт лэсьтыса яна потыны кутскизы, - шуыса вордскем гуртэзлэсь азьпалзэ чебер ласянь гинэ адӟыса вераз Александр Сергеевич.

Улонысь эшез Елена но Борис пиез семьяеныз бадӟым, югыт коркан уло. Борис «Алга» хозяйствоын пудо сиён дасян комбайнэн ужа вылэм. Туж вужмем техникаез тупатъяса-вӧяса сезонлы быдэ азинлыко ужа. Толалтэ пӧртэм ужын ветлэ. Соиз ялан уг луы вылэм. Озьы ке но пудо вордыса, семьялэсь мултэс луэм йӧлзэ, сӥльзэ вузаса улонзэс каллен нуо. Ми мыныку Сандыр агай асьсэлэн лэсьтэм электровукоенызы фураж изэ вал. Кыкетӥ пиез Владислав кузпалзэ Вуж Кушкетысь шедьтэм, табере отын уло, пудо-живот вордыса, ужаса, нылпиос будэто.

Гондыргуртын паськыт урамлы, таза юртъёслы саклык висъямы. Татын куштӥськем юртъёсты, капка азязы кыллись арбериосты уд адӟиськыд. Нош гуртын социальной объектъёс: школа, клуб, медпункт ӧвӧл. Арнялы кык пол ужбергатӥсь Расима Сагитовалэн Карадуванысь магазинэз лыктыса вузкарон радъя вылэм.

- Ми ини таӵе улонлы дышемын. Ум ӝожтӥськиське. Тани та аръёсы гуртлэн урамаз векчи из вӧлдӥзы, сюресъёс ӧжытак радъяськизы. Мылкыдэз куашкатӥсез - уж луымтэ ини. Асьме дорын уж луымтэысь палэнэ кошкыса ужано луэ. Балтасе, Каменкае, Казане ветлыса ужасьёс вань. Егитъёслэн уноез Казане интыясько. Нош анай-атайзы доры, атай юртазы кылисьёс но вань. Гурт калык тросэн пудо вордэ, йӧл, сӥль вуза. Котькуд юртын сямен транспорт вань, - шуэ гуртлэн старостаез Александр Никифоров.

Кудӟыса ӧз ке но ветлэ, гуртын кышнояськымтэ пиослэн трос луэмзы сярысь но веразы. Уж луысал ке, егит паръёс уногес луонлы но оско.

- Сюлэмшугъяськытӥсь ужпумлэн нош одӥгез - нылпи садлэн луымтэез. Туннэ нуналэ гуртамы 10 мында дошкольной аресэн нылпи вань. 27 хозяйствоен Гондыргурт понна пичи лыдпус ӧвӧл. Ярак-Чурмаын но нылпи сад луымтэен тэльмыро. Машиназы луэмъёс М.Лызие нулло ини. Нош котькин но тазьы ужаны уг быгаты ук. Нылпи сад луымтэысь, анайёс но доразы пуконо луо. Нош улыны кулэ ук... - шуэ гуртлэн старостаез.

оло, вордскем палзылэн патриотъёсынызы герӟаськемын, дыр. Сюресъёс начар луизы ке но, уж луымтэен тэльмыризы ке но, район центрлэсь кыдёкын луизы ке но, вордскем юртсэс куштыса, шуд утчаса палэнэ кошкымтэ пиосыныз герӟаськемын, дыр. Нош сыӵеос Гондыргуртын трос. Александр Никифоров но сыӵеос пӧлысь.

- Мон ветеринарлэн ӧнерезлы дышетскыса бертэме дырысен пенсие потытозь колхозын ужай. Кышное Зинаида но гумырыз ӵоже фермаын ужаз. Анай-атае но колхозникъёс вал. Кык нылы гуртэ картлы быземын, одӥгез - Соснаын, нош пимы Эдуард семьяеныз милемын улэ, кенмы Лариса Ярак-Чурмаен Гондыргуртын почтальон луыса ужа, - шуэ со.

Никифоровъёслэн семьязы ньыль поколениысь представительёслэн тупаса улэменызы, вордскемез дырысен инвалид луэм Валентин ӵыжы-выжызэс асьсэ дорын воземенызы-утеменызы но синмаськон мылкыд кылдытӥз. Озьы ик Ксения но Николай Филипповъёс, Евгения но Николай Ефремовъёс но гумырзы ӵоже вордскем гуртазы ужаса, гажамон, юртазы егитъёсын ог-огзэс валаса улӥсь семьяос.

22 ар «Азьлане» газетын машинистка луыса ужам Мария Борисова Ярак-Чурма школаын ужаса, дано шутэтсконэ потэм. Куинь пиосыз но будыса вуэмын. Семья кылдытыса гуртэ кылиллям. Бадӟымзэ - Николаез - ӵошен юрт лэсьтыса яна поттӥллям. «Алгаын» бульдозерен ужа. Туэ выль трактор сётӥллям солы. Озьы ик «Алгаын» ужась Галина кузпалэныз 3 пи, одӥг ныл будэто. Анай-атаезлэн, ӵыжы-выжыосызлэн юрттэменызы юрт лэсьтыса яна потэм Виталий но «Алгаын» тракторен ужа. Кузпалэз Лариса Шубан фермаын скал кыске. Одӥг ныл будэто. Атай юртазы покчи пизы Алексей кылем. Со но механизатор. Сезон дыръя комбайнэ пуксиз ке, толалтэ пӧртэм ужын ветлэ. Кузпалэз Ирина Балтасьысь аптекаын ужа. Ачиз машинаен ветлэ бере, солы умой. Аслэсьтыззэ но, ӵыжы-выжыосызлэсь нылпиоссэс но М.Лызиысь нылпи садэ нуэ, вайыса бертэ. Борисовъёслэн котькудӥз трос пудо вордэ, семьязылэсь мултэс луэм сӥльзэ, йӧлзэ вузаса ватсаса уксё ужало, озьы хозяйствозэс ялан, выльдыса уло.

- Корка газ, ву пыремын, электроен но висъёс ӧвӧл. Сюресъёсты но тупатъязы. Табере азьло кадь тэльмырыса ветлонэз ӧвӧл ини, - шуыса шумпотэ Мария Константиновна.

Гондыргуртын мукетъёслэсь олома висъяськымтэ нош одӥг бадӟым, таза юртэ пыримы. «Мынэсьтым нимме эн гожтэ», шуиз кузё кышно. Дораз пичи нылпиез но вань. Высокая Гора районысь больницае ветлыса ужа вылэм. 20 ар ужам Балтасьысь туберкулёзной больница борӟаськем бере, районын уж шедьтытэк, отчы кошкем. Ньыль нылпиез вань. Арнялы кык пол мыныса сутка ӵоже ужа, кылемзэ дораз, нылпиосыз вӧзын. Ужын дыръяз пичиоссэ Балтасе анаез доры кельтэ вылэм. Картэз «Алгаын» тракторист. Нылпиосыз М.Лызи школаын дышетско, бадӟымез Казаньын вылӥ тодон-валан басьтэ. Школае ветлытӥсь автобуслэн туж ӵем тӥяськемезлы ӝожтӥськиз анай мурт. Та ӝожтӥськонэз дышетскись нылпиоссы луэм мукет анай-атайёслэсь но кылӥмы. Ялан умой палъёсты гинэ верам, ӝожтӥськыны яратымтэ Гондыргурт калык тазэ сюлмазы вуэмысь вераз, лэся. Тӥни, бускель Ярак-Чурмаысь фельдшерско-акушерской пунктэ, магазинэ ӝожтӥськытэк ветло ук соос.