Котьма ужлы кибашлы, пӧртэм ужпумъёсты сэрттэ-пертче

Бигер-а со, ӟуч-а, яке пор ваньмыныз мылысь-кыдысь вераськоз, тодазы уськытозы Ципья школаын ӵош дышетскемзэс, «Труд» колхозын ужамзэс. Ма, сизьымдон аресаз вуэм воргоронлэн улоназ мар но ӧй вал, дыр.

Юра Кузнецов школаез йылпумъямез бере армие кошкиз. Пересь песянаез тодӥсь-валась, ӟеч визьнод сётӥсь вал, со ик шуиз солы: «Юра, армие мынод, одно ик мынод. Армие мынымтэ мурт бызьымтэ кышномуртлы кельше». Армиысь кыльыны мугез вал ке но Сибирьын Омск городын кык ар служить  карыса бертӥз. Ужаны кутскиз «Труд» колхозын бригадир луыса, собере завсклад, гсм заправщик. Берло заправщике мукет адямиез кутӥзы, сое токарь луыса ужаны косӥзы, та учыре но песянаез аслэсьтыз малпанзэ шонерак вератэк ӧз чида, кызьы вераз озьы ик луиз.

Азьвыл колхозын туж шуг вал гурт техникалы запчастьёс шедьтыны. Юриклы трос ужано луиз, котьку юрттӥз механизаторъёслы шуг-секытысь потыны, лэсьтыны луонтэм арбериосты но лэсьтыны пӧрмытылӥз. Гырон-кизён дыръя, ӵош ужась эшеныз Лёва Хрисановен уен-нуналэн ужазы. 43 ар ӵоже, быдэс ужан стажез «Труд» колхозын тыршыса ортчиз. Тыршемзэ Данъян грамотаосын, премиосын пусйылӥзы, Болгарие турпутёвка сётӥзы. Юра Кузнецов Нина кузпалэныз синмаськымон ныл но пи будэтӥзы. Нунокъёсыз ньыль кузя, куд-огез студент но ини. 70 аресъем бабайзы соослы гуртэ сётэм уроксэс но валэктэ, матматикая задачаосты быдэстыны юрттэ. Куддыр школаысеныз телефон жингыртыса ик задачаез лэсьтыны юрттэт куро, бабайзы математикаез усто тодэ уго. Дышетскись нунокъёсызлы вераськыны но эш луэ, историез но политикаез эскеро. Со яратэ газетъёсты лыдӟыны, арлы быдэ кӧня ке изданиослы гожтӥське.

Тулысысен сӥзьылозь нюлэскын ветлыны яратэ. Нырысь узы-боры, эмезь бича, эмъяськыны турын-куаръёс октэ, собере чидатэк вите губиослэсь потэмзэс. Губи интыосты умой тодэ, ноку буш ведраен уг бертылы. Собере легезь, сусыпу мульы, палэзь, шу, пушмульы бича, озьы бер сӥзьылозь нюлэска. Кык коркаё юрт катырзэ утялтэ, ваньзэ чакласа выльдыса улэ, семьяезлы юрттэ трос кузя  пудооссэ вордыны.

Ижевскын улыса пенсие потэм бере, вуж юрт басьтыса гуртын улоно кариськи. Ма, весяк Вукогуртын улэме потэ вал. Юра (со мынам кырсие) но Нина апае дунъяны луонтэм зол юрттӥзы. — Та куашкам-ёмырам интыез сэрттоно луоз, капка но кырыжмемын номарлы ярантэм шуэмелы, ярамон валэктон, визькенеш сётылӥз Юра. — Сэрттоно уз луы, татизэ ‡утом, тупатом, созэ шонертом. Озьы солэн юрттэменыз улоно интые улымон луиз. Вашкала лэсьтӥськон амалъёсты уже кутыса ужамез тужгес ик паймытӥз пиме, мон но паймисько солэн котьмае йондыремезлы. Солэн ужамез шорыучкыса малпан кылдэ: вот ведь кыӵе усто, ӧткын ужаллям вашкалаос туала электро инструментъёстэк но.

Котырес лыдпусэныд сюлмысьтым ӟечкыласько. Тынад азьпалан улонэд шудо мед луоз, гумырыд таза-чырткем кузь мед кыстӥськоз. Котырад котьку яратӥсь семьяед, улонад яркыт но шуныт дыръёс мед луозы, вань ӟеч малпанъёсыд мед быдэсмозы.

Вера Лобанова, Вукогурт.