Кушкетын Йӧвылэсултон праздник

Йӧвылэсултон праздник гуртын кутске уйшор бере. Ведраен карнан кутыса мынӥськом колодчае ву басьтыны. Оскиськом, та ву юрттоз вань висёнъёсты быдтыны.

Та колодчаез туэ гинэ лэсьтӥзы. Табере ми но ошмес ву юиськом. Инмарлы тау! Колодчаез адӟыса, пичи дыры тодэ усе. Пичи дыръя одӥг нунал ӵоже кӧня ветлӥськом вал вулы ведра карнанэн…

Ву ваем бере, кин ке соку ик кошке Ӟуч нюке. Татын милям ӵыпет вань. Вӧсямзы бере, кин уг кышка, вуэ пыре, кин ке но бамзэ но кизэ гинэ миське, кирос карыса. Туж бадӟым тау татчы вуэ пырон инты лэсьтэмзы понна. Дораз ик кылиськон-дӥсяськон будкаез но вань. Татын ӝытозь адями уг быры. Туж кыдёкысен лыктӥсьёс но вань. Кинъёс нуназэ ӧз вуэ, ӝытазе пыро. Та нуналэ урамын ӵукна ик вӧлме ческыт зын. Со табань зын. Анайёс уже кошкемзылэсь азьло ик табань пыжо, пичиос изьыса вырӟемзы бере, ческыт но пӧсь табань мед веръялозы шуыса. Кинлэн ке но песяйзы пыже, дыр.

Ӝытазе люкаськиськом клуб доры. Милям мызганчимы но вань. Со туж шулдыр кариз урамез арган куараеныз. Со доры, азьло дыръя кадь, люкасько кырӟасьёс, эктӥсьёс. Сюлэм куре шулдыръяськонэз! Ваньзэсты: пичиосты но бадӟымъёсты, люказ ас дораз милям завклубмы, Света апаймы. Ачиз табань но пыжиз, чай но самоварен пӧзьтӥз. Со куспын пичиос но анай-атайёс нискылазы ледянкаосын, салазкиен. Кыдёке кылӥськизы куараосмы, туж кужмо но шулдыр нискыламы. Нош ледянкаысь усемъёс клуб азьын футболэн шудӥзы. Футболэн шудэмзы бере нош нискылазы. Туж ӟырдыт ширтылӥмы ми ледянкаен но салазкиен, нокин но дораз бертыны ӧз ик дырты. Кӧт тырытозь нискылам бере, ческыт пӧсь чаен но табанен кунояз Света апаймы. Чай юэм бере дискотека луиз. Со куспын бертон дыр но вуиз. Люкиськеммы но ӧз поты. Туж шулдыр ортчиз праздник. Бурдъяськем мылкыдын бертӥм. Вуонояз нош ик люкаськом ай валче!

Татьяна Клеймёнова