Кык «5» пуктыны луэ

Улон сюресэз сое ноку но школалэсь ӧз люкы. Со кемалась ини дышетӥсь гинэ ӧвӧл, дышетӥсьёслэн дышетӥсьсы. Веранэ Покчи Лӧзя шоръёзо школаысь удмурт кылъя но литературая дышетӥсь Ольга Мироновна Пчельникова сярысь.

Ольга Пчельникова вордске 1969-тӥ арын 8-тӥ куарусёнэ Балтась ёросысь Сырья гуртын. Гуртысьтызы покчиёзо но Ципьяысь шоръёзо школаосты йылпумъяса, Ижкарысь удмурт кун университетэ удмурт кылосбуръя факультетэ дышетскыны пыре. Отын вылӥ тодон-валан басьтэмез бере, Покчи Лӧзя шоръёзо школаын удмурт кылъя но литературая дышетӥсь луыса ужаны кутске. Тӥни со дырысен 33 ар ӵоже ини со дышетон удысын мыло-кыдо тырше, нылпиослы анай кыллы гажан пыӵатон понна сюлмаське. Озьы ик трос аръёс ӵоже директорлэн воштӥсез луыса но ужа. Со сяна, мерлыко ужын но тырше, «Кенеш» НКА-лэн Правлениезлэн Тӧроез луэ, самодеятельной ансамбле ветлэ. Туэ та котькуд ласянь адӟем карымон кышномурт аслэсьтыз 55 аресъем юбилейзэ пусъе. Юбилеез азьын ми соин вакчияк вераськон ортчытӥмы. Тӥледлы но со вераськонэн тодматскыны ӵектӥськом.

— Ольга Мироновна, ойдолэ валтӥсь юанысен кутскомы: малы Тӥ дышетӥсьлэсь ӧнерзэ бырйиды?

— Эшъёсыным шудыку но мон котьку «дышетӥсь» вал. Мынам пичи дырысен аслэсьтым тодэм-валамме, быгатонлыкъёсме мукетъёсын люкеме потэ вал. Нош кин-о сое дышетӥсьлэсь умойгес лэсьтоз? Соин дышетӥсь луыны малпай, дыр (пальпотыса). 

— Соку, азинтэ, пожалуйста, та веранэз «Дышетӥсь — со...»

— Дышетӥсь — со нылпиосты яратӥсь, валась, юрттӥсь, азьмынӥсь, артист, суредась, эшшо трос азинтыны луысал на.

— Кинэ Тӥ асьтэлэн вал-тӥсь дышетӥсьёсыныды лыдъяськоды?

— Мынам валтӥсь ды-шетӥсьёсы, нырысь ик, анай но атай, апайёсы, нырысетӥ дышетӥсе — Анастасия Прокопьевна, собере ни удмурт кылъя но литературая дышетӥсе — Исаев Павел Петрович, озьы ик туж синмаськисько вал Роза Харисовна но Василий Фёдорович Трофимовъёслэн урокъёс нуэмзылы.

— Школаын ужан аръёсты ӵоже Тӥ рос-прос валады ни, луоз, педагоглэсь валтӥсь ужпумзэ? Кыӵе сямъёсыз луыны кулэ солэн, та удысын азинлыко ужан понна?

— Дышетӥсьлэн ужез туж секыт но кылкутымон. Со егит поколение понна кыл кутэ: кыӵе соос луозы, сыӵе ик луоз шаермылэн вуоноез. Дышетӥсь нырысь ик нылпиосты яратыны кулэ, пиналъёсты ӧд ке яраты школа доры матаз-дораз но лыктонэз ӧвӧл. Котьку нылпиосын огъя кыл шедьтыны кулэ, соослэн улонэнызы, кулэяськонэнызы, соос тӥ шоры эшсы шоры кадь, оскыса учкыны кулэ. Соку ваньмыз умой луоз шуыса малпасько. Мазэ веранэз, дышетӥсь чылкыт но ӟеч сюлэмо, саклык висъясь, зэмлыко но шонер дунъет сётыны быгатӥсь луыны кулэ.

— Тӥ Сырья покчиёзо но Ципья шоръёзо школаын дышетскиды, озьы ведь? Тодӥськоды на-а асьтэлэсь нырысетӥ классэ мынэмдэс? Нырысетӥ дышетӥсеныды пумиськемдэс? Кызьы со ортчиз?

— Тодӥсько на, монэ школае анае келяз! Дышетӥсе но каньыл гинэ пумитаз. Покчиёзо школаын но шоръёзо школаын но дышетскем аръёсы шунытэсь малпанъёс гинэ кельтӥзы.

— Нош асьтэлэн школае дышетӥсь луыса ужаны лыктэм нуналды тодады на-а? Кыӵе мылкыдъёсты соку шӧдӥды ӧд на-а вунэтэ?

— Школае лыктэм нуналме но туж умой тодӥсько на. Шурдыт вал: ваньмыз выль, тодмотэм школа, дышетӥсьёс, дышетскисьёс. Коллективлы чаль дыши, соос но монэ ӝог асьсэ пӧлы басьтӥзы, пиналъёсын но огъя кыл шедьтӥ. 7-тӥ классэн кивалтыны оскизы. Жаляса верано луэ, соосын одӥг ар гинэ ужаса вуттӥ, собере кивалтӥсьлэн воштӥсез луи. Со классын ик дышетске вал али коллегае Наталия Львовна Антонова но. Со мынэсьтым ӧнерме басьтӥз бере, анай кылмылы яратон пыӵатыны быгатӥськем, дыр.

— Верало ук, котькудӥз дышетӥсь аслэсьтыз предметсэ тужгес умоен но кулэен лыдъя шуыса. Тӥ ма понна яратӥськоды предметтэс?

— Нырысь ик, та кыл мыным пыӵамын анай йӧлэн, со мынам выжыосылэн кылзы, Инмарен сётэм кыл. Со понна ик яратӥсько удмурт кылэз но предметэз.

— Вань-а Тӥляд профессиональной устолыкъя асьтэлэн кыӵе ке нимысьтыз амалды, кудзэ Тӥ дышетон ужады кутӥськоды но кудӥз Тӥледлы котьку юрттэ?

— Одно ик, котькуд ды-шетӥсьлэн вань, дыр, со. Мон тыршисько курон пуктонэз но небыт кыл веранэз интыяз но дыраз кутыны. Астэ пиналъёслэсь вылӥе пуктоно ӧвӧл, соослэн ӵошталаяз (уровеняз) но куд-ог дыръя луыны тупа.

— Дышетӥсь луэм сяна, Тӥ эшшо трос аръёс ӵоже директорлэн дышетон ужпумъёсъя воштӥсез но луиды.

— Бен, вылӥын верамъя, школае вуэм бере одӥг арскын директорлэн дышетон ужпумъёсъя воштӥсез луи. Та ужез 27 ар ӵоже быдэстӥ.

— Нош али дыре Тӥ вылын эшшо но бадӟым кылкутон — «Кенеш» НКА-лэсь ужзэ нуон. 

— Озьы, та ныпъетэз но нуисько на, кинлы ке но ужано ведь.

— Ужды трос, кылкутон бадӟым. Кызьы ваньзэ вутскиськоды? Шутэтскыны дырды кыле-а? Кызьы со дырдэс ортчытыны яратӥськоды?

— Бен уж трос, кылкутон бадӟым. Улонын ваньмыз вольыт уг луы — ӵемтылон дыръёс но луо. Соку эшъёсыным ӵош ваньзэ вормыны тыршиськом. Шутэтскыны дорам бертӥсько, кытын монэ матысь семьяе возьма. Губияны, бакча емыш будэтыны, соосты консервировать карыны туж яратӥсько.

— Выльысь ӧнер быръёно луысал ке, воштысалды-а дышетӥсьлэсь ужзэ кыӵе ке мукетэзлы?

— Ноку но йырам сыӵе малпанэ ӧз лыктылы. Выльысь бырйыны луонлык луысал ке, та ӧнерме ик бырйысал. Мон асме мукет удысын уг ик адӟиськы.

Аръёс ортчемъя кужмогес валаськод вылэм, школа тодон-валанлэн шорсюлмыз луэ шуыса. Адямилэн азьпал улон шоры учконэз но, ужпумъёсыз-малпанъёсыз но, улон сямъёсыз но школаын кылдо но юнмало.

Аслэсьтыд уждэ яратыса быдэсъян, макем секыт луиз ке но, со туж бадӟым шуд. Та ласянь Ольга Мироновна ассэ шудо адямиен лыдъяны быгатэ, дыр: сое дышетскисьёс ярато, ужъюлтошъёсыз но анай-атайёс гажало, матысьёсыз дунъяло. Минутъёс, часъёс, нуналъёс, толэзьёс пӧртэм сюлэмшугъяськонъёсын, шумпотонъёсын туж ӝог ортчыса кошко. Татарстанысь сӥё-дано дышетӥсьлэн Ольга Мироновна Пчельниковалэн куамын арлэсь уно педагогической стажезлы, дышетон ужезлы, оценка пуктоно луысал ке, шумпотыса кык «5» пуктыны луысал. 55 аресъем юбилеезлы кузьым, ужезлы самой бадӟым дунъет но тӥни со, дыр.

Гажано Ольга Мироновна! Сюлмысь ӟечкыласьком Тӥледыз дано лыдпусэныды! Сӥзиськом шудо-буро улон, яркыт но чебер нуналъёс, юн тазалык, сайкыт инбам. Чебересь малпанъёсты улонэ мед быдэсмозы, сюрес вылын лякыт сямо адямиос но оскымон эшъёс гинэ мед пумиськылозы! Матысь адямиосыныды кусыпъёсты котьку мед луозы юн но шуныт, уж дурын бадӟымесь выль вормонъёсы вутскыны мед кылдоз!

Тодэ ваёнъёс. Сӥзёнъёс.

Дышетӥсь. Ужъюлтош. Матысь эш. Та 3 кылъёс герӟало монэ Ольга Мироновнаен. Али кадь син азям солэн нырысьсэ школаямы ужаны лыктэмез. Кыдёкысь 1991-тӥ ар. Мон соку 6-тӥ классын дышетскисько вал. Туж синмаським ми соку школаямы веськрес мугоро, чиль-вальк кисьтаськись сьӧд бабля йырсиё удмурт кылъя дышетыны лыктэм егит дышетӥсьмылы. Урокъёсын ыммес усьтыса ик сак кылзӥськом вал литературной нормаосъя чылкыт вераськемзэ. Малпасько, дышетӥселы синмаськыса, солэн удмурт кылэз яратон мылкыд пыӵатэмезлы луыса, азьланяз дышетӥсьлэсь ӧнерзэ быръён мон борды соку ик биниськиз. Озьы, 2001 арын ми Ольга Мироновнаен ӵошен ужаны кутским. Со мынам бадӟым пыкетэ луиз. Тани 20 арлэсь трос ини ӵошен ог-огмылы юрттыса, кенешыса ужаськом. Та дыр ӵоже дышетӥсе директорлэн воштӥсез луыса но ужаз, удмурт кылъя но литературая дышетӥсьёслэн огазеяськонэнызы но кивалтӥз (та ужзэ берло 10 арзэ мыным оскизы). 5 ар ӵоже ини Ольга Мироновна Балтась ёросысь удмуртъёслэн НКА-енызы кивалтэ, вӧзаз нош ик мон юрттӥсез луисько. Ёросамы одӥг удмурт концерт но солэн эктэм-кырӟамезтэк уг ортчы шуи ке, уг янгыша, дыр. Инмар та адямилы котыр ласянь визьзэ сётэм. Со ик дышетӥсь но, кивалтӥсь но, артист но. Нош мон понна со матысь эш. Соин котьку луэ сюлмысь оскыса вераськыны. Ольга Мироновна котьку дыртытэк но лад-лад валэктоз, ӟеч визь-кенеш сётоз, кулэ дыръяз либатыны но быгатоз. Шумпотӥсько дышетӥселэн ужан удысаз вормонъёсызлы. Азьпалан но азинсконъёсыз мед луозы. Котырес Юбилееныз ӟечкыласа, сӥзисько солы юн тазалык, шудбур но ваньзэ умойзэ. Шумпотӥсько но Инмарлы тау карисько улонам таӵе адямиен пумиськемелы.
Нялтас вераса, вордӥськемын но ми соин одӥг нуналэ, одӥг толэзе, куспамы 10 ар.

Наталия Антонова

Ольга Мироновнаез ужаз тыршись, адямиосты гажась, нылпиосты яратӥсь дышетӥсен тодисько. Школаын дышетскыку, со мынам кумире вал. Урокъёс котьку но тунсыко ортчо вал, выль материалъёсты Ольга Мироновна туж капчи валэктэ вал. Анай кылэз со мур гажаса дышетыны быгатэ вал. Со сюлме пыӵатӥз анай кыллы яратон. Семья куспын вераськиськом удмурт кылэн, гажаськом но данъяськиськом соин. Туж бадӟым тау шуэме потэ мынам яратоно но гажано дышетӥсьлы. Ӟечкыласько юбилееныз Ольга Мироновнаез, сӥзисько капчи мылкыд, юн тазалык. Котьку малпам ужъёсыз мед быдэсмозы, котькуд нунал мед ваёз шумпотон гинэ.

Ирина Камаева (Афанасьева)

5-тӥ классэ бадӟым школае вуэм бере, ас бурд улаз басьтӥз но будэтӥз милемыз яратоно удмурт кылъя дышетӥсьмы — Ольга Мироновна. Солэн урокъёсаз котьку но дасяськыса, ваньзэ дышетыса мынӥськом вал. Чебер, вольыт но литературной кылын вераськеменыз со удмурт кыллы яратон пыӵатиз. Сӥзиськом солы выль вормонъёс, малпанъёс но инвисъёс!

Ӟырдыт ӟечкыланъёсын Елена Тубылова (Иванова) но
Наталия Петрова (Исаева)

Туспуктэм https://rais.tatarstan.ru/