Ваньды мыло-кыдо пыриськелэ

Эн ватэ вал асьтэлэсь удмурт луэмдэс, вазиськелэ палэнын улӥсь ӵыжы-выжыостылы но: медаз возьдаське асьсэлэн удмурт луэмзылэсь. Малы возьдаськонэз удмурт луэммылэсь? Дунне вылысь асьме удмурт калык кадь йӧно, тыршись, каньыл калыкез трос уд шедьты. Куке но ӟуч тодосчи Н.П. Рычков аслаз дневниказ гожтэм: «Нет в Российском государстве ни одного народа, могущего сравниться с ними в трудолюбии!» (Россия кунын одӥг но ӧвӧл сыӵе калык, кудӥз аслаз ужез яратэменыз соосын ӵошатскыны быгатысал). Асьме калык пӧлысь трос дано тодосчиос, инженер-конструкторъёс, гуртын но заводын ужасьёс потэмын, Россия данъяське асьме удмурт спортсменъёсынымы, Бурановоысь песянайёсын, Кремльын яркыт кизили ӝуа, отын но удмурт Б.Г. Ложкин тодосчилэн ужез адӟиське, трос аръёс ӵоже Казаньысь КАИ-ын ректор луыса ужаз, Ю.В. Кожевников, шат ваньзэ вераса быдтод! Асьмелы удмурт луэменымы данъяськыны гинэ кулэ, озьыен, асьмеос — удмуртъёс, анай кылмы — удмурт кыл!

Василий Никитин,

Карек-Серма гурт