Хезмәт

Балтач районы

18+
2024 - Гаилә елы
Азьлане

«Ми понна котькуд вормон — со вормон»

Балтасьысь Ева Александрова аслаз но пиезлэн бочча шудонэн тодматскемзы сярысь вера.

Балтасьын улӥсь Александрова Еваез но солэсь Максим пизэ тросэз тодо, дыр. Тужгес но спорт удысэн герӟаськем улосчиосмы. Малы ке шуоно соос кӧня аръёс ӵоже ини ёрос, республика масштабын ортчись ӵошатсконъёсы пыриськыса, районмылэсь данзэ утё. 

Евалэн но, пиезлэн но ДЦП висёнзы вань. Но со шоры учкытэк, Ева Семёновна но, Максим пиез но мыло-кыдо пырисько пӧртэм спорт ужрадъёсы, улонлы ӝожтӥськытэк, луэмезлы шумпотыса уло. Самой валтӥсез — Александровъёс улонэз туж ярато, котьку маин ке выленыз тодматскыны дась соос. Тани, кылсярысь, боччаен но ёросын нырысетӥос пӧлын соос вырыны кутскиллям. Боччаен шудыны быгатон понна умой спортивной формаын гинэ луоно ӧвӧл, аслэсьтыд котькуд вамыштэ малпаськыны, вожвылъяськон амалъёсты пыр-поч эскерыны быгатыны кулэ. Ева Семёновна но Максим асьсэос гинэ тодо, макем трос тыршоно луиз соослы, спортын бадӟым вормонъёсы вутскыны быгатон понна. Бочча – со туж бадӟым адреналин, ялан, дугдылытэк ортчылӥськись тренировкаос, асэныд гинэ ӧвӧл, мугорэныд но нюръяськон со… Та сярысь Ева Семёновнаен вераськеме бере тодӥ (жаляса верано, Максим пиеныз вераськыны ӧз луы, малы ке шуоно со Казаньысь коррекционной школаын дышетске, шутэтскон нуналъёсы гинэ дораз, Балтасе, бертэ).

— Ева Семёновна, кызьы но ку тӥ Россия понна сыӵе дышымтэ, тодмотэм спортлэн видэныз тодматскиды?

— Зэмзэ ке верано, спортэн мон котьку но тунсыкъяськи. Азьло дырысен ик шашкаен, шахматэн шудонэн вырисько вал ини, али но шудӥсько, уг вунэтӥськы. Татарстанъя, районъя ортчылӥсь пӧртэм шудонъёсы, ӵошатсконъёсы, фестивальёсы мыло-кыдо пыриськылӥ. Нош боччаен мон ини берлогес тодматски. Тренермы Фагиль Гайнутдинов ӵектӥз милемлы, аслаз подопечнойёсызлы, та спортлэн ӧреныз тодматскыны. “Ойдолэ, шудыса утёме”, — шуиз. Ми соглаш луимы. Воксё тодмотэм луэм боччаен вырыны кутскимы. Тренермы милемлы пыр-поч та шудон сярысь вераз, валэктӥз, Арчае но мыныса бертӥмы — отын та шудон асьмелэсь азьлогес вӧлмыны кутскем вал. Учкимы, сокем со милемлы кельшиз. Соин ми но боччаен вырыны кутскимы.

— Кельшон — со одӥг. Нош тани солэн юрттэмез, пайда ваемез — мукет юан…

— Зэм. Бочча мыным соку ик кельшиз. Мон шудыны кутски, тренировкаосы ветлӥ. Дыр ортчыса, пайдазэ шӧдыны кутски. Нырысетӥен, бочча малпанэз, мышлениез умоятэ. Шудонын котькуд лэсьтоно действие азьын малпаськыны кулэ, кытчы, кызьыен тупез куштоно. Та шудон ведь огшоры тупез куяса шудон гинэ ӧвӧл, солэн аслаз куронъёсыз вань. Татын ваньзэ лыдэ басьтыса, сак луоно, тупез шонер куштоно. Озьы ик боччаен вырыса, киос умойгес ужаны кутско, йыр но ӟечгес ужа. Огъя вераса, пайдаез туж трос, соин ик кельшытӥ боччаез, шудыны но тунсыко.

— Кытын но кызьы ортчо тӥляд тренировкаосты?

— Туннэ нуналэ, жаляса верано, коронавирусэн сэрен, тренировкаосмы шер ортчо. Тросаз учыре дорамы тренироваться кариськомы. Яра али, тренировкаос понна нимысьтыз тупъёсмы вань. «Балтач» спорткомплексын но куддыръя тренироваться кариськомы, ӵемгес ӵошатсконъёс азьын отчы ветлӥськомы. Котьма шуид ке но, дорын тренировкалэсь висъяське ни со. Яра али тренермы Фагиль Гайнутдинов ветлытэ милемыз.

— Спортэн сяна, маин ке нош тунсыкъяськиськоды-а?

— Азьло трос маин тунсыкъяськисько но вырисько вал. Берло дыре ваньмызлы дыры уг тырмы ни. Нылпиосы, внуке но вань ини… Но куддыръя керттӥськыны, вуриськыны дыр шедьтӥсько. Со сяна, дорысь ӧжытлы ке но потыса, эшъёсын но пумиськылэме, вераськыса пукеме, шутэтскеме потэ. Огъя вераса, активной, таза улон сям нуыны тыршисько. Пиме Максимез но спортэ кыскыны тыршисько. Солэн тазалыкез умойгес, иммунитетэз кужмогес мед луоз шуыса сюлмаськисько. Со ассэ мукетъёслэсь кулэс медаз шӧды кадь потэ мыным… Мед со адямиосын кусып возёз, аслыз эшъёс шедьтоз.

— Максим пиды сярысь вераськон потэм бере, со сярысь но юатэк кылеме уг луы. Со но, тӥ кадь ик, боччаен выре шуыса тодӥсько. Тренерды Фагиль Гайнутдинов кыкнадылэн но вормонъёсты ушъямонэсь шуыса вераз.

— Максимлы дас одӥг арес, куать аресысеныз со но боччаен выре ни. Мон сое та шудонэ кыски. Спортлэн та видэныз ачим вырыны кутскем бере, солэсь пайдазэ адӟем, ас вылам шӧдэм бере, пиелы но тренировкаосы ветлыны ӵектӥ. Милям, зэмзэ но, кыкнамылэн но вормонъёсмы вань. Ачим сярысь верано ке, нырысетӥ ӵошатсконме али ке но тодам возисько. Со ӵошатсконъёс Арчаын ортчизы (ӵем дыръя ӵошатсконъёс отын ортчо, малы ке шуоно отын боччаен шудон азинскемгес), мон кыкетӥ инты басьтӥ. 2014-тӥ арын Нижнекамск городэ ветлӥмы, командной шудонын 1-тӥ инты басьтӥмы. Зеленодольске ветлэме вань, отын но кыкетӥ инты басьтӥ. Командной, личной ӵошатсконъёсы но пыриськылӥ. Али та боччая ӵошатскемъёсты гинэ лыдэ басьтыса. Со сяна, ыбылӥськонъя, капчи атлетикая ӵошатсконъёсы но мыло-кыдо пыриськылӥ, 1-тӥ, 2-тӥ интыосты басьтылӥ. Али туэ октябрь толэзе но Арчаын инвалидъёс пӧлын боччая Татарстанлэн чемпионатэз ортчиз. Отын но асьмеды умой возьматӥмы. Пие но, мон шоры учкыса, туж кыстӥськыны кутскиз бочча шудонэ. Туннэ ини со но призо интыосты басьтылэ. Кылсярысь, кылем арын Татарстанын ортчем юниорской ӵошатсконъёсын кыкетӥ инты басьтӥз. Со но ини пичи дырысеныз боччаен выре шуыны кулэ. Тау бадӟым тренермылы, Фагиль Фаляхутдиновичлы. Максим но, мон кадь ик, Арчаын, Зеленодольскын ортчись ӵошатсконъёсын ассэ утиз.

— Сыӵе вормонъёсы вутскон понна трос тыршоно луиз, дыр?

— Веранэз ӧвӧл. Котькыӵе уж борды басьтӥськид ке но, нырысь ик тыршон кулэ. Чидан, опыт, тренировкаос, ужез ӝог лэсьтыны быгатон… Боччаез гинэ басьтом. Огласянь, со туж капчи шудон кадь адске, нош шудыны кутскид ке, валаськод, макем секыт, но со дыре ик тунсыко шудон со. Татын тренер сярысь вератэк уг луы. Фагиль  — туж умой, аслэсьтыз ужзэ ӟеч быдэсъясь тренер. Туж бадӟым тау солы монэ но, пиме но спортэ кыскемез понна. Максим пиелэн киосыз кужмогес луизы та спортэн вырыса. Туннэ со ини ручкаез умойгес кутыны быгатэ. Ачиз тырше умойгес шудыны дышетскыны, малы ке шуоно солэн табере стимулэз вань, та самой валтӥсез. Мон ведь со понна туж сюлмаськисько… Солэн котькуд пичи гинэ вормонэз но туж шумпоттэ. Мон анай ук. Но зэмзэ ке верано, ми понна котькуд вормон — со вормон. Пичи-а со, бадӟым-а. Малы ке шуоно котькуд ӵошатсконэ дасяськиськод, тыршиськод, трос кужымдэ но дырдэ сётӥськод. Спорт ук со. Оскисько, вуоно ӵошатсконъёсын но асьмеды умой возьматыса, вормонъёсы вутскомы али шуыса.

— Сыӵе мылкыдды котьку но тӥледын мед луоз, Ева Семёновна. Мед со юрттоз тӥледлы азьпалан но пӧртэм ӵошатсконъёсын призо интыосты басьтыны. Ваньзэ умойзэ тӥледлы!

 

 

 

 

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Галерея

Оставляйте реакции

1

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: бочча