«Милемыз эн вунэтэ ини…»

Дунне вылэ вордскем котькуд мурт бӧрсяз чебер пытьы кельтыса улыны тыршысал ке, улонмы трослы тунсыкогес но чебергес луысал. Тае валам егитъёс понна герой улосчиосмылэн ортчем улон сюрессы пример луыса уло.

9 толсур — Геройёслэн нуналзы луэмысь, районлэн главаез Социалистической Ужысь геройлэн Рим Зариповлэн кузпалэз, Балтасьын улӥсь Люция апай доры мыныса, синпель кузьымен пусйиз. Та пумиськон югдурзэ тодыса бертон гинэ ӧз луы, соос Рим Зариповлэн быдэстэм ужъёсыз сярысь но вераськизы. Та вераськон Люция апайлы туж шуныт мылкыд кузьмаз. «Ужысь геройёсты кулэмзы бере но уг вунэто», — шуыса шумпотэмзэ вуттӥз со.

Та нуналэ ик Рамиль Нутфуллин Вуж Кушкет гуртын вордскыса будэм, геройлыко бырыны шедем лётчиклэн, Россиысь Геройлэн Олег Исаевлэн анай-атаез Вера но Николай Исаевъёс дорын куноын но луиз. Озьы ик та пумиськонэ районысь военной комиссар Васил Валиев но пыриськиз. Арлыдоосты та праздникен ӟечкыланы шуыса, Олег Николаевичлэн эшез Виктор Павлович Камаев но лыктэмын вал. Та пумиськонлы чеберлык ватсазы егит армеецъёслэн движениязы пыриськись дышетскисьёс но. Рамиль Рашитович Исаевъёслэн улон-вылонэнызы тунсыкъяськиз, арлыдоос ас черодазы пизы сярысь но мадизы.

Келяськон минутъёсы арлыдоос районэн кивалтӥсьлы тау каронзэс вуттыса тазьы шуизы: «Милемыз эн вунэтэ ини, дорамы лыктылэ!»