Мон кин луисько?

Шуныт но чебер кылъёсын Надяез ӟечкыламы. Ваньмы ик аспалъёс ке но, куд-огъёсыныз выльысь тодматсконо луимы, дыр ортчемъя адямиос но воштӥсько уга.

Косьтэй Тома юано кариськиз Новая Гора гуртын (али та гурт быремын ини) вордӥськем Мишалэсь.

— Миша, бен, тынад корка нимыд кызьы вал?

— Уг тодӥськы, мон шоры нокин но корка нимыя ӧз вазиськы. Ма , анай-атайёс гуртысь кӧчыса кошкыкузы мон туж пичи на вал. Бадӟым гурезьтӥ салазкиен нискыламме гинэ тодӥсько на. Ну зол нискыласькомы вал! Мукет номар йыре уг лыкты.

Надя шуак валатскиз:

— Кушкетэ анаелы жингыртыса юало ай, солы трос арес, котьмае тодэ, — шуыса телефонэныз мукет комнатае кошкиз. Анаеныз мар но со вераськемзы бере отысен кылӥськиз «Сӥтясь Илья» шуэмез. Ӝӧк котырын пукисьёс гурак! серекъяны кутскизы. Миша гинэ (со удмурт кылэз вунэтыны вуэм ини) номар валатэк пуке паймыса. Югдурез тодэмез бере, Миша нокыӵе ик ӧз кариськы.

— Илья со мынам песятае, нош атае «Сӥтясь Николай» шат? Нош мон кин луисько?!

Эх, шуисько мон, Надя лучше тон эн жингырты вылэм анаедлы. Мишалэн кышноез, Капа, та иворез кылыса шуиз: «Кулэ дыръяз та корка нимдэ одно ик тодад вайыто табере».

Собере ваньмылэсь корка нимъёсмес пыр-поч эскерим-тодӥм. Азьвыл котькуд коркалэн нимыз сяна пусэз но вань вылэм. Котькудӥз, киын арасьёс, ас пусэнызы аназэс тодмо карылӥллям. Музъем вылэ фамилиез уд гожты ук, яке ӵог борды, соку гожтэт тодӥсьтэмъёс но трос вал. Саник, мажес, мукет ужтӥрлыкъёс борды но со пусэз пуктылӥллям, медаз сураськы муртлэнэныз шуыса. Утчалэ асьтэлэсь пустэс вашкала арбериосты бордысь, оло, удалтоз, шедьтоды. Туж тунсыко вылэм таӵе вераськон.

Верош

Ижевск